Novidades

Abr 17
0

#CienciasMariñasGal

By | Novidades | No Comments

O Programa de Ciencias Mariñas de Galicia avanza cara a unha estratexia de observación e monitorización que modernice e reforce a xestión sustentable dos recursos mariños

  • Os primeiros resultados dos traballos realizados para cumprir este obxectivo foron presentados hoxe nunha reunión do paquete de traballo 2, celebrada na sede do Centro Tecnolóxico do Mar-Fundación CETMAR en Vigo

A sede do Centro Tecnolóxico do Mar-Fundación CETMAR en Vigo foi escenario hoxe dunha reunión de seguimento do paquete de traballo 2 do Plan de Ciencias Mariñas de Galicia, responsable do desenvolvemento dunha estratexia de observación e monitorización mariña que modernizará e reforzará a xestión sustentable  dos recursos mariños.

O encontro, que se prolongou durante a mañá, serviu para presentar os avances e os traballos realizados ata agora, fundamentalmente no que se refire ao proceso de compilación de información sobre programas, redes, servizos e sistemas de alerta, así como respecto das necesidades neste ámbito.

O encontro serviu tamén para abordar a metodoloxía, os contidos preliminares e a folla de ruta que se desenvolverá nos próximos meses para o deseño da estratexia de observación e vixilancia mariña, e que incluirá diferentes tarefas, obradoiros e grupos de traballo, tamén en relación con paquetes de traballo 1 e 4 do Plan Galego de Ciencias Mariñas. Finalmente, durante o encontro abordouse a identificación de coñecementos potencialmente transferibles do paquete de traballo 11, dedicado á cultura científica, transferencia de coñecemento e formación.

Coordinado por Intecmar, CETMAR e a Universidade de Vigo, o PT2 busca desenvolver a devandita estratexia a través dunha análise exhaustiva e un enfoque multidisciplinario, fortalecendo as sinerxías identificadas. Este plan persegue a modernización e o reforzo da observación e monitorización do medio mariño adecuándoa ás necesidades da sociedade, incluíndo administración, tecido produtivo e público en xeral, para un aproveitamento sostible do medio mariño, apoiado no coñecemento científico. O obxectivo final e converter o sistema nunha rede de redes, facilitando e promovendo a súa conexión e integración a nivel estatal, europeo e internacional.

O Programa de Ciencias Mariñas de Galicia enmárcase nos Plans Complementarios de Ciencia do Ministerio de Ciencia, Innovación y Universidades incluídos no Plan de Recuperación, Transformación e Resiliencia (PRTR-C17.I1), e está financiado a través da Xunta de Galicia con fondos Next GenerationEU e o Fondo Europeo Marítimo de Pesca e Acuicultura da Unión Europea.

Abr 04
0

#CienciasMariñasGal

By | Novidades | No Comments

O Programa de Ciencias Mariñas de Galicia abre o debate sobre o sistema de capacitación, transferencia de coñecemento e cultura científica nun obradoiro con expertos organizado polo CETMAR e Campus do Mar

A sede do Centro Tecnolóxico do Mar-Fundación CETMAR en Vigo foi escenario hoxe dunha xornada sobre o sistema de capacitación, a transferencia de coñecemento e a cultura científica que reuniu a expertos na materia e que fomentou o debate sobre a situación actual no ámbito das ciencias mariñas e sobre os retos e accións para o futuro.

O obradoiro foi organizado por CETMAR e o Campus do Mar dentro das actividades do Programa de Ciencias Mariñas de Galicia, dedicadas ás ferramentas de transformación social para o desenvolvemento sostible de Galicia no medio mariño.

O obxectivo foi promover unha reflexión sobre o estado actual do sistema en relación coa súa capacidade, as súas estruturas de funcionamento e os recursos dispoñibles para levar a cabo este tipo de actividades de apoio. Todo isto partindo do consenso de que se trata de actividades imprescindibles para conseguir un maior impacto da actividade científica e de desenvolvemento tecnolóxico, e no contexto da ciencia que se realiza en Galicia sobre o mar e das actividades que del dependen, identificando tamén conxuntamente as oportunidades de mellora e as actuacións necesarias para materializalas.

Durante a xornada, na que participaron non só expertos do programa galego senón tamén outros axentes relevantes deste sector, presentáronse os resultados dunha enquisa que se realizou no marco do proxecto co obxectivo de establecer un diagnóstico da situación actual desde a que desenvolver o debate.

Tras analizar a situación actual e os retos futuros do sistema, os participantes no obradoiro concluíron o debate coa identificación de estratexias e accións para avanzar cara á mellora e reforzo das actividades de capacitación, transferencia de coñecemento e cultura científica. As propostas xurdidas alimentarán o traballo interno no Programa de Ciencias Mariñas de Galicia para poder iniciar, a nivel piloto, a senda de mellora identificada.

O Programa de Ciencias Mariñas de Galicia enmárcase nos Plans Complementarios de Ciencia do Ministerio de Ciencia, Innovación y Universidades incluídos no Plan de Recuperación, Transformación e Resiliencia (PRTR-C17.I1), e está financiado a través da Xunta de Galicia con fondos Next GenerationEU e o Fondo Europeo Marítimo de Pesca e Acuicultura da Unión Europea.

Xuñ 19
0

EurOCEAN 2023

By | Eventos, Novidades | No Comments

Galicia será o epicentro do debate europeo sobre o futuro da ciencia oceánica e do mar coa celebración en Vigo da Conferencia EurOCEAN 2023

  • O evento celebrarase no auditorio Mar os días 10 e 11 de outubro e reunirá a comunidade científica, responsables políticos e administracións de todos os niveis, así como a representantes da industria e da sociedade para debater sobre os retos e oportunidades do ámbito do mar
  • A conferencia está promovida pola European Marine Board en colaboración co Centro Tecnolóxico do Mar-Fundación Cetmar, o CSIC, o Centro de Investigación Mariña da Universidade de Vigo e o Campus do Mar así como da Comisión Europea e das principais redes de investigación mariña de Europa
  • Ademais o 8 e 9 de outubro Santiago de Compostela acollerá o primeiro foro de profesionais do océano na etapa inicial da súa carreira e o 12 e 13 terá lugar a reunión de socios do EMB na sede do Cetmar en Vigo

Galicia converterase o próximo mes de outubro no epicentro do debate europeo sobre a restauración dos océanos e sobre o futuro da ciencia mariña ao acoller a Conferencia EurOCEAN 2023, un foro que reunirá na cidade de Vigo a comunidade científica europea, a responsables políticos da Unión Europea e dos Estados Membros, a industria marítima e outras partes interesadas do mar.

O EuroOCEAN 2023 terá lugar os días 10 e 11 de outubro e a súa sede será o auditorio Mar de Vigo, que se converterá nun espazo de intercambio e debate sobre os últimos avances e desafíos de futuro na investigación mariña e o uso sostible do océano. O lema da conferencia será One Ocean, One Voice e buscará consensuar as mensaxes clave para a comunidade científica internacional sobre a necesidade de restaurar e salvagardar para as xeracións futuras o bo estado do océano e a sustentabilidade dos servizos que prestan os ecosistemas mariños mediante o fomento da investigación e do coñecemento relevante para este fin.

A Conferencia EuroOCEAN é o principal foro de encontro a nivel europeo sobre política e a ciencia mariña. Ofrece unha oportunidade única para que a comunidade investigadora mariña e todas as partes interesadas actúen coas persoas responsables das políticas e estratexias dos Estados Membros da Unión Europea para considerar, discutir e responder aos novos desenvolvementos, desafíos e oportunidades en ciencia e tecnoloxía mariña. Esta será a décima edición do evento, forma parte da Axenda da Presidencia española da UE e busca reforzar as sinerxías entre a Misión da Unión Europea para a restauración do océano e as augas continentais ata 2030, a Década das Nacións Unidas das Ciencias Oceánicas para o Desenvolvemento Sostible e outras iniciativas internacionais e europeas de investigación e innovación. As edicións anteriores de EurOCEAN tiveron lugar en Bruxelas (1993), Sorrento (1995), Lisboa (1998), Hamburgo (2000), Galway (2004), Aberdeen (2007), Ostende (2010), Roma (2014) e París ( 2019).

A conferencia subliñará a importancia de unir esforzos cara á acción colectiva e a prol das ciencias mariñas para garantir o cumprimento dos Obxectivos de Desenvolvemento Sostible da ONU para 2030 e a Misión da UE “Restaurar o noso Océano e as Augas no horizonte do 2030”. Todo iso a través dun amplo programa que se dará a coñecer proximamente na páxina web de EurOcean 2023, onde xa é posible inscribirse como participante.  

O European Marine Board organiza esta xornada en colaboración co Centro Tecnolóxico do Mar-Fundación Cetmar, o Instituto Español de Oceanografía e o Instituto de Investigacións Mariñas do Consello Superior de Investigacións Científicas, o Centro de Investigación Mariña da Universidade de Vigo, o Campus do Mar e a Comisión Europea.

A organización tamén conta coa participación da Joint Programming Initiative on Oceans (JPI Oceans), a European Marine Research Network (EuroMarine), o compoñente europeo do Global Ocean Observing System (EuroGOOS), o European Centre of Information on Marine Science and Marine Technology (EurOcean) e a Axencia Europea de Control da Pesca (EFCA). Ademais, no ámbito local, manifestaron o seu apoio á celebración da conferencia o Padroado de Cetmar representado a través da Consellería do Mar da Xunta de Galicia, o Concello de Vigo, o Porto de Vigo e as asociacións Conxemar e Anfaco.

Outros eventos vinculados a EuroOCEAN

Dous días antes da reunión EuroOCEAN 2023 e tamén por iniciativa do European Marine Board (EMB) a través do seu programa Young ‘Ambassadors, terá lugar do 8 ao 9 de outubro na Cidade da Cultura en Santiago de Compostela un foro de traballo para Early Career Ocean Professionals (ECOP), que reunirá a 70 representantes desta mocidade profesional, dous por cada unha das organizacións socias do EMB.

Este foro trasladará as súas conclusións á Conferencia posterior e converterase así nun espazo de formación e diálogo interxeracional entre os ECOP do EMB e os líderes da política europea, expertos e membros da comunidade científica ao máis alto nivel.

A semana pecharase coa celebración da reunión de membros do European Marine Board, que terá lugar os días 12 e 13 de outubro na sede do Centro Tecnolóxico do Mar-Fundación CETMAR en Vigo.

Feb 20
0

Formación e eólica mariña

By | Novidades | No Comments

Galicia participa na mellora da capacitación laboral no eido das enerxías renovables mariñas a través do proxecto europeo Flores

  • O Centro Tecnolóxico do Mar-Fundación Cetmar coordina a iniciativa Visión de Futuro nas Enerxías Renovables Mariñas, na que interveñen un total de 15 socios de 8 países
  • Esta acción, que arrancou en xaneiro e durará dous anos, contribuirá ao Pacto Europeo de Capacidades, apoiando ao consorcio no impulso da formación neste ámbito

O consorcio do proxecto Visión de Futuro nas Enerxías Mariñas Renovables (Forward Looking at the Offshore Renewables, Flores) iniciou este mes os traballos para impulsar a capacitación no sector das enerxías renovables mariñas baixo a coordinación do Centro Tecnolóxico do Mar-Fundación Cetmar, dependente da Consellería do Mar, e financiado pola Unión Europea. Os investigadores de Flores centrarán os seus esforzos nos vindeiros dous anos en promover formacións específicas e carreiras neste ámbito profesional, organizar un observatorio da oferta e demanda de capacidades e o impulso de alianzas duradeiras para avanzar neste eido.

O sector das enerxías renovables mariñas xera na actualidade arredor de 80.000 postos de traballo en toda Europa e prevese que medre nos vindeiros anos. Tendo en conta este escenario, un dos grandes desafíos do proxecto Flores é cubrir a demanda de profesionais cualificados coas capacidades da poboación.

A iniciativa pretende contribuír así a que a oferta formativa en toda Europa atenda as necesidades actuais e futuras do sector habilitando un observatorio de aptitudes laborais. Ademais está previsto o desenvolvemento de materiais de formación para todas as idades e a difusión de oportunidades profesionais neste sector.

A maiores realizaranse accións piloto nas que se adaptarán os materiais formativos ás diferentes necesidades rexionais, constituíndo a semente para futuros grupos similares en toda Europa, integrados no consorcio a gran escala para promover a adquisición de coñecementos en enerxías renovables mariñas dentro do Pacto Europeo de Capacidades.

Para levar a cabo esta tarefa uníronse 15 organizacións de oito países de Europa. É o caso da Fundación Cetmar, a Asociación de Industrias do Metal e Tecnoloxías Asociadas de Galicia (Asime) e o Campus Industrial da Universidade da Coruña (UDC) en España, o Centro de Investigación e Tecnoloxía Hellas (Certh) grego ou Windeurope, a Universidade de Gante, o Sindicato Europeo IndustriAll e a Xunta Mariña Europea de Bélxica. Por parte de Irlanda participa o Consorcio Multimedia Aqualex, polos Países Baixos as empresas Deftiq e Bluespring, por Alemaña a Rede Submariña para o Crecemento Azul, por Francia tanto o Lycée Fulgence Bienvenüe como a Conferencia de Rexións Marítimas Periféricas e por Italia o Clúster de Tecnoloxía Marítima (mareFVG).

Este proxecto conta cunha financiación de 700.000 euros de Erasmus+ a través da Axencia Executiva Europea de Educación e Cultura (Eacea). Enmárcase dentro das accións para impulsar o Pacto Verde Europeo cara a unha transición xusta e fontes de enerxía limpas.

Medidas chave

O proxecto Flores desenvolverá accións piloto a nivel rexional para adaptar os materiais formativos á realidade das diferentes concas marítimas europeas no Atlántico, no Báltico e no Mediterráneo, estendendo ese coñecemento ao resto de Europa a través do consorcio a gran escala, e mellorará a oferta con enfoques innovadores para a formación continua. Ademais facilitará o acceso aos materiais didácticos existentes na actualidade e o desenvolvemento de novas ferramentas específicas e multilingües que promovan o coñecemento do océano, a incorporación continua de nova información e a sensibilización no sector.

Tamén está prevista unha análise estratéxica de capacidades, abarcando non só a situación actual deste ecosistema industrial senón tamén as perspectivas de futuro, especialmente en relación coas tecnoloxías emerxentes, ao tempo que se actualizarán os perfís ocupacionais da cadea de valor da enerxía renovable mariña, contribuíndo á actualización permanente da base de datos de Habilidades, Competencias, Cualificacións e Ocupacións Europeas (ESCO).

Finalmente, o proxecto creará o portal europeo oreskills.eu para promocionar os seus materiais de formación e o observatorio e centro de coñecementos das enerxías renovables mariñas, no que poden participar todas as partes interesadas.

Nov 24
0

Acuicultura

By | Novidades | No Comments

O Centro Tecnolóxico do Mar-Fundación CETMAR súmase ás celebracións do Día da Acuicultura cun taller do proxecto europeo AquaVitae

  • O obradoiro reunirá a alumnos do máster de Acuicultura e de Sostibilidade das universidades galegas, así como do IGAFA, para probar un xogo mediante o que se pretende mellorar a percepción social da actividade acuícola

O Centro Tecnolóxico do Mar-Fundación CETMAR, dependente da Consellería do Mar, súmase as celebracións do Día da Acuicultura coa celebración dun taller organizado no marco do proxecto europeo AquaVitae cuxo obxectivo final é mellorar a percepción social da actividade acuícola.

Con ese fin, durante o obradoiro, que terá lugar na sede de CETMAR en Vigo, probarase un xogo de preguntas e retos desenvolvido polos técnicos da fundación galega dentro das actividades programadas polo proxecto AquaVitae e inspirado en diferentes xogos de mesa.

Os encargados de probar o xogo serán alumnos do Máster de Acuicultura e Máster de Sostibilidade que imparten as universidades galegas, así como do Instituto Galego de Formación en Acuicultura, Igafa. Divididos por grupos, e baixo a supervisión do persoal de CETMAR, deberán responder a preguntas, superar retos, debater na procura de solucións e enfrontarse as probas sorpresa propostas.

O xogo desenvólvese sobre un taboleiro cuxo percorrido permitirá obter puntos (aquas) intercambiables por diferentes especies de cultivo acuícola. O gañador será o que primeiro complete o seu prato de especies.

Crear unha dinámica de colaboración, ampliar os coñecementos sobre a acuicultura e, sobre todo, mellorar a percepción que desta actividade ten a sociedade son os obxectivos fundamentais deste xogo, que Cetmar presentará aos socios do proxecto AquaVitae o vindeiro mes de abril.

Con esta actividade, o Centro Tecnolóxico do Mar súmase as celebracións Día da Acuicultura, que se conmemora o 30 de novembro baixo os auspicios da Fundación Biodiversidade, unha iniciativa coa que se busca trasladar á sociedade a importancia da acuicultura e o compromiso desta co desenvolvemento sostible, a I+D+i e a creación de riqueza e benestar no rural e no litoral.

Proxecto Aquavitae

O proxecto AquaVitae, no que se enmarca este taller, é unha acción financiada pola Unión Europea a través do programa Horizonte 2020 que deseña prácticas de acuicultura sostible e investiga especies da cadea trófica baixa na Cunca Atlántica. Conta con 35 socios procedentes de Brasil, Sudáfrica e diferentes países europeos (www.aquavitaeproject.eu), ademais do Centro Tecnolóxico do Mar-Fundación CETMAR.

Nov 23
0

Premio PROA

By | Novidades

Andalucía recoñece a aposta de Galicia pola economía azul e o crecemento das zonas costeiras da cornixa atlántica

  • A comunidade autónoma recibe este galardón pola súa participación, a través do Centro Tecnolóxico do Mar-Fundación Cetmar, no proxecto Atlazul xunto ás rexións portuguesas do Algarve e Alentejo e a propia Andalucía
  • Rosa Quintana destaca que estas sinerxías permitiron fortalecer o Observatorio Costeiro galego e favoreceron a diversificación do emprego no sector pesqueiro con alternativas como novas formas de turismo rendible, responsable e sostible
  • A titular de Mar salienta que a economía azul supón unha oportunidade para Galicia, onde 76 das 83 ramas da actividade económica galega teñen relación co sector marítimo-pesqueiro, polo que a comunidade prepara xa a súa estratexia neste eido

A conselleira do Mar, Rosa Quintana, recolleu hoxe o premio Proa 2022 que o Clúster Marítimo-Mariño de Andalucía concede a Galicia pola súa aposta pola economía azul e o crecemento das zonas costeiras na cornixa atlántica mediante a súa participación no proxecto Atlazul. A comunidade está presente nesta iniciativa a través do Centro Tecnolóxico do Mar-Fundación Cetmar xunto ás rexións portuguesas do Algarve e Alentejo ou a propia Andalucía, que tamén recolleron os seus correspondentes galardóns.

A titular de Mar puxo en valor a aposta decidida de Galicia pola economía azul nos últimos anos e lembrou que a Xunta xa está a traballar na elaboración da súa propia estratexia neste eido co obxectivo de aproveitar as oportunidades e as vantaxes competitivas que as actividades vencelladas co mar poden aportar ao conxunto da economía.

“Buscamos un crecemento intelixente, sostible e integrador para potenciar unha actividade económica vencellada co mar e co espazo marítimo-terrestre”, asegurou a representante do Executivo autonómico durante a entrega dos Premios Proa 2022 do Clúster Marítimo-Mariño de Andalucía.

A participación de Galicia no proxecto Atlazul, financiado polo programa Interreg de Cooperación Transfronteiriza España-Portugal, permitiu á comunidade fortalecer o seu Observatorio Costeiro, mellorando os servizos prestados co fin de atender as demandas destes sectores de forma efectiva.

A implicación do Cetmar, engadiu Rosa Quintana, tamén favoreceu a implantación de estratexias de diversificación de emprego para o sector pesqueiro, enfocadas ao desenvolvemento de alternativas que poidan axudar á xeración de novas formas de turismo rendible, responsable e sostible.O proxecto

En Atlazul participan 11 entidades españolas e sete portuguesas co obxectivo de optimizar as sinerxías entre os distintos sectores da economía azul e a creación de novas oportunidades para o investimento empresarial e a mellora da competitividade das empresas involucradas nos eidos da pesca, a acuicultura, o turismo costeiro e a biotecnoloxía. Así mesmo, fai posible a transmisión de coñecementos no campo da captación e tratamento da información mariña e a identificación do potencial crecemento azul en cada unha das catro rexións participantes.

A este respecto, Rosa Quintana destacou que a economía azul supón unha oportunidade para Galicia, ao tratarse da primeira potencia pesqueira europea e que representa cerca do 50% do emprego no sector en España así como a décima exportadora mundial de produtos do mar, por diante de países como Xapón ou Islandia. Ademais o sector do mar ten unha grande influencia no resto de actividades da economía xa que 76 das 83 ramas da actividade económica galega teñen relación co sector marítimo-pesqueiro.

Por iso, a titular de Mar enxalzou a importancia de proxectos comunitarios como Atlazul e avogou por seguir sumando esforzos para capitalizar accións coas que afondar na competitividade laboral, no crecemento social e no desenvolvemento sostible do tecido económico.

Nov 20
0

Formación na Aixola

By | Novidades

O centro A Aixola amplía a súa oferta FORMATIVA para o sector pesqueiro con tres cursos novos e suma un total de oito en 2023

  • A programación, de carácter gratuíto, supón máis de 1.900 horas de formación e inclúe novas accións de restauración de embarcacións en madeira, de inglés técnico marítimo e de prevención de riscos na pesca

O Centro de Formación A Aixola, que xestiona a Consellería do Mar a través do Centro Tecnológico del Mar-Fundación CETMAR, amplía o seu programa formativo en 2023 con tres novos cursos, o que supón un total de oito. Estas accións, que se imparten na súa sede do porto de Marín, terán lugar entre os meses de febreiro e xuño e supoñen máis de 1.900 horas de formación de carácter gratuíto.

Destas formacións poderán beneficiarse tanto operarios do sector pesqueiro como pescadores e profesionais do marisqueo, cónxuxes destes ou persoas con titulación ou certificado para traballar no sector pesqueiro. A inscrición para optar ás prazas ofertadas está xa aberta e pode facerse a través da páxina web.

Como cada ano, e antes de definir a programación, o Centro de Formación A Aixola analiza as propostas do seu alumnado e as demandas do sector para deseñar unha oferta formativa adaptada ás necesidades actuais.

O programa formativo da Aixola inclúe como novidades un curso de restauración de embarcacións en madeira, con 400 horas lectivas, entre febreiro e maio do vindeiro ano, e un curso de inglés técnico marítimo, que terá lugar en abril cunha duración de 90 horas. Tamén amplía o seu repertorio para ofrecer dúas sesións en prevención de riscos no sector pesqueiro, de 50 horas lectivas cada unha.

Ademais, seguirá programando formacións ofertadas anteriormente, coma o curso de confección e mantemento de artes e aparellos de pesca, que permite a obtención do correspondente Certificado de Profesionalidade, o curso de velería e acastillaxe, o de Modelado Manual en Poliéster ou o de Instalacións Eléctricas para pequenas embarcacións de motor. Esta formación compleméntase con cursos de busca de emprego e autoemprego para favorecer a inserción laboral de todo o alumnado.

A especialidade do centro dependente da Consellería do Mar, cunha actividade cofinanciada polo Fondo Europeo Marítimo e de Pesca (FEMP), é o ensino baseado no traballo, combinando a preservación do coñecemento tradicional coa innovación. A metodoloxía, centrada no aprendiz e nas súas necesidades, é eminentemente práctica e permite unha formación sólida que deriva en altas taxas de inserción laboral do alumnado.

Nov 09
0

Economía azul

By | Eventos, Novidades | No Comments

CETMAR e os seus socios en Atlazul presentan os avances do proxecto na definición dunha estratexia para a sostibilidade da economía azul

  • O Centro Tecnolóxico do Mar participa no “II Encontro Internacional Coñecemento e Economía Azul, InnovAzul 2022”, que se celebra en Cádiz do 29 de novembro ao 2 de decembro, e onde presentaranse os resultados desta acción na busca dunha Alianza Litoral Atlántica

O Centro Tecnolóxico do Mar-Fundación CETMAR e os seus socios no proxecto Atlazul participarán no “II Encontro Internacional Coñecemento e Economía Azul, InnovAzul 2022”, que se celebra a finais de mes en Cádiz, onde presentarán os avances desta acción europea na definición de novas estratexias e alianzas para a sostibilidade da economía azul.

Será no transcurso dun evento paralelo a InnovAzul 2022, que se desenvolverá no Palacio de Congresos de Cádiz o martes 29 de novembro, e que reunirá a representantes das 18 entidades socias do proxecto -once españolas e sete portuguesas- pertencentes a catro rexións atlánticas -Alentexo, Algarve, Andalucía e Galicia-.

“Proxecto Atlazul. Exemplo de gobernanza para o impulso da Alianza Litoral Atlántica” é o título deste encuentro, que pretende aunar esforzos, capitalizar, e valorar as accións sobre competitividade, crecemento e desenvolvemento sostible emprendidas no marco de Atlazul, unha iniciativa liderada pola Secretaría General de Acción Exterior da Consejería de la Presidencia, Administración Pública e Interior da Junta de Andalucía.

O consorcio Atlazul confía en que a xornada permita establecer as estratexias necesarias para dar continuidade ás acciones emprendidas mais aló da finalización do proxecto. Así, durante o encontro establecerase a folla de ruta para a constitución dunha alianza marítimo terrestre entre os territorios participantes e a creación das estratexias rexionas e os seus indicadores de desenvolvemento, e daranse os primeiros pasos cara á elaboración do Libro Blanco da Gobernanza Azul.

O programa da xornada inclúe diferentes sesións para presentar as accións e resultados de Atlazul sobre “Innovación en acuicultura, pesca, turismo costeiro, portos e biotecnoloxía”, sobre as “Estratexias de gobernanza: Alianza Litoral Atlántica e Libro Blanco para a gobernanza azul” e sobre “Transferencia de coñecemento da innovación, a especialización intelixente e a promoción de capacidades de I+D+I”, esta última coa participación da Fundación CETMAR.

A xornada do proxecto Atlazul enmárcase en InnovAzul 2022, un espazo de encontro para empresas, institucións de investigación, administracións públicas e universidades relacionadas cos sectores tradicionais e emerxentes estratéxicos da economía azul que pretende aportar solucións innovadoras que incrementen a competitividade das rexións.

O encontro internacional dedicará varias das súas sesións a portos e loxística portuaria, construción naval e off-shore, recursos mariños, sostenibilidade, turismo azul, enerxías renovables mariñas e territorio azul. De forma paralela, e na súa sesión de tarde, será posible asistir a reunións B2B para realizar traballo en rede, atopar novos socios, establecer alianzas estratéxicas e sinerxias, así como dar a coñecer iniciativas, solucións e proxectos innovadores.

Coincidindo con InnovAzul terá lugar a “9th Atlantic Stakelholder Platform Conference. ASPC 2022” que, baixo o título ‘Enfoque Atlántico: facilitador dunha economía verde azul sostible’, congregará a máis de mil persoas da rexión Atlántica de Europa, ademáis doutros eventos internacionais.

Toda a información sobre a programación de Innovazul está dispoñible na súa páxina web (https://innovazul.es).

Toda a información sobre o proxecto Atlazul -que está financiado polo Programa Operativo de Cooperación Transfronteiriza Interreg V-A España Portugal, POCTEP, (2014-2020)- está dispoñible na súa páxina web (https://atlazul.eu/).