Eventos


Xornada anual do proxecto Apromex

By | Eventos | No Comments

A xornada anual do proxecto Apromex, que desenvolve a nosa Unidade de Tecnoloxías Mariñas, celebrarase o vindeiro 19 de novembro en Vilanova de Arousa, co obxectivo de compartir os últimos avances e ferramentas prácticas desenvolvidas para dar resposta aos retos do sector do mexillón.

Durante o evento, que organiza a Dirección Xeral de Pesca, Acuicultura e Innovación Tecnolóxica da Consellería do Mar, abordaremos o estado e a análise da poboación actual de semente de mexillón, e daremos conta dos novos sistemas de captación no medio natural, así como das ferramentas dixitais para a visualización e análise de datos útiles para o sector bateeiro.

O obxectivo é crear un espazo de encontro práctico para celebrar o traballo feito, compartir resultados e intercambiar experiencias directas cos profesionais do sector.

Data: Xoves, 19 de novembro

Hora: 16:00 h

Lugar: Auditorio Valle-Inclán (Casa da Cultura de Vilanova de Arousa)

Programa

Inscrición

Mais información: apromex.gal e cetmar.org

Conferencia final Free LitterAT

By | Eventos | No Comments

O Centro Tecnolóxico do Mar acollerá a conferencia final do proxecto Free LitterAT cuxo consorcio, liderado por CETMAR, presentará os principais resultados e logros do proxecto nunha xornada que permitirá compartir as experiencias e os coñecementos adquiridos durante estes tres años de cooperación transfronteiriza, co fin de contribuir a lograr comunidades costieras libres de lixo.

Ao longo da xornada presentaranse os principais avances do proxecto en materia de xestión de residuos e reciclaxe, incluíndo boas prácticas e solucións para a xestión dos residuos pescados de forma pasiva, as artes de pesca ao final da súa vida útil e os plásticos dun só uso.

Tamén darse conta de novos enfoques para a monitorización do lixo mariño e dos microplásticos, dos avances na identificación das fontes e a modelización do lixo, así como distintas estratexias para a súa redución. Entre elas, abordarase a xestión das artes de pesca abandonadas, perdidas ou descartadas, as actividades de limpeza en zonas de acumulación e áreas remotas, e a eliminación de microfibras.

Data: 26 de novembro de 2026.

Lugar: CETMAR, Sala Cíes (3º andar, edificio anexo).

Horario: 09:30 a 17:00 h

Formato: híbrido.

Programa

Inscrición: ata o 20 de novembro para a modalidad presencial.

Mais información: https://freelitterat.eu/ e www.cetmar.org

Evento final proxecto CAPTA

By | Eventos | No Comments

O Centro Tecnolóxico do Mar acollerá o evento final do proxecto CAPTA “Neutralidade climática: papel do Carbono Azul na costa de Portugal e Galicia”, que coordina CETMAR. Durante a xornada, o consorcio CAPTA presentará os principais resultados do proxecto e compartirá avances sobre a observación das augas costeiras, os ecosistemas de carbono azul e os efectos do cambio climático no litoral do noroeste peninsular.

Data: 3 de decembro de 2026

Lugar: CETMAR, sala Cíes (3º andar).

Inscrición: ata o 27 de novembro.

Programa

Máis información: Web CAPTA e Web CETMAR

O peixe no menú

By | Eventos | No Comments

CETMAR acolle a xornada “Peixe sen Espiñas”, un debate sobre as barreiras ao consumo de produtos do mar nos fogares organizado por UCGAL

  • A cita terá lugar o 13 de novembro na sede do Centro Tecnolóxico do Mar en Vigo organizada pola Unión de Consumidores de Galicia, que reunirá a expertos para analizar os motivos que afastan o peixe da alimentación cotiá

A sede do Centro Tecnolóxico do Mar (CETMAR) en Vigo acollerá o vindeiro 13 de novembro a xornada «Peixe sen espiñas. Barreiras ao consumo de produtos do mar», un encontro organizado pola Unión de Consumidores de Galicia (UCGAL) en colaboración con Mercadona, Gadis e a Consellería do Mar, que reunirá voces de ámbitos habitualmente afastados entre si para analizar por que as persoas consumidoras atopan cada vez máis obstáculos á hora de incorporar o peixe á súa alimentación.

Galicia é unha das grandes potencias pesqueiras de Europa, cunha actividade económica, social e cultural profundamente vinculada ao mar. Con todo, a relación da cidadanía co peixe está a cambiar. A falta de tempo para cociñar, a percepción de que é un alimento caro, as dificultades para preparalo ou o rexeitamento entre os máis pequenos son algunhas das barreiras que condicionan a súa presenza nos fogares. Pero ata que punto responden a dificultades reais e canto teñen que ver cos hábitos, as percepcións ou a falta de información?

Para abordar estas cuestións, esta iniciativa propón cambiar o enfoque tradicional do debate. En lugar de centrarse exclusivamente nas propiedades nutricionais do peixe ou na necesidade de promover o seu consumo, a xornada buscará identificar que está a impedir realmente que chegue con maior frecuencia ás mesas dos fogares e que respostas poden ofrecer os distintos actores implicados.

O encontro reunirá a representantes da administración, do sector pesqueiro, da industria alimentaria, da distribución, da comunidade educativa, das familias e da divulgación científica e gastronómica. Unha confluencia de perspectivas especialmente relevante en Galicia, onde o peixe forma parte da identidade alimentaria e cultural, pero onde tamén se  manifestan os cambios nos hábitos de compra, na organización familiar e nas preferencias das novas xeracións.

Do prezo ás espiñas: catro barreiras para entender o consumo de peixe

A xornada comezará cunha análise da evolución do consumo de peixe nos fogares a cargo de María Isabel del Río Viqueira, secretaria xeral do Instituto Galego de Estatística (IGE), que permitirá contextualizar o debate a partir dos datos e identificar as principais tendencias.

A partir desta radiografía, o programa estruturarase arredor de catro grandes barreiras que condicionan as decisións de compra e consumo. A primeira delas será a falta de tempo e as dificultades para preparar o peixe. Nun contexto marcado polos cambios nos horarios, pola procura de alimentos fáciles de cociñar e pola perda progresiva de determinadas habilidades culinarias, o encontro analizará ata que punto a limpeza, as espiñas, os olores ou o descoñecemento das receitas condicionan a elección deste alimento. Neste diálogo participarán Carmen Albo, divulgadora gastronómica coñecida nas redes sociais como Guisándome la vida; Leticia Pérez, estudante; Roberto Alonso, secretario xeral de Anfaco – Cytma e Julio Simarro, conselleiro delegado de Congalsa.

O segundo bloque abordará unha das cuestións máis sensibles para as persoas consumidoras: o prezo percibido do peixe. O debate tratará de esclarecer a distancia que pode existir entre o custo real e a percepción de que se trata dun produto caro, analizando cuestións como o prezo por ración fronte ao prezo por quilo, a diversidade de especies dispoñibles ou as alternativas máis económicas.

Nesta mesa participarán Basilio Otero, presidente da Federación Nacional de Confrarías de Pescadores; Gonzalo Rodríguez, profesor de Economía Aplicada da Universidade de Santiago de Compostela (USC), e Jordi Soriano, director de Cadea Alimentaria para a Comunitat Valenciana, a Rexión de Murcia e Madrid de Mercadona. Tres perspectivas diferentes —a produción, a análise económica e a distribución— para abordar unha das principais preocupacións dos consumidores á hora de mercar peixe.

A terceira barreira situará o foco na infancia e na transmisión dos hábitos alimentarios. Por que moitos nenos e nenas rexeitan o peixe? Que papel desempeñan os comedores escolares? Como inflúen as familias na adquisición destes hábitos? Estas preguntas centrarán un diálogo no que participarán Rocío García, secretaria de Slow Food Compostela, e Rogelio Carballo, presidente da Confederación Galega de Asociacións de Nais e Pais de Alumnos (CONFAPA).

Finalmente, a xornada abordará a desconfianza, os mitos e a desinformación arredor do peixe, unha cuestión cada vez máis presente nas decisións de consumo. A frescura, a seguridade alimentaria, a orixe, a trazabilidade, a etiquetaxe ou os bulos que circulan polas redes sociais serán algúns dos asuntos que analizarán Paula Carrera, directora de Kómoda News, e Rafael Urrialde, vicepresidente da Real Academia Europea de Doutores.

O encontro, de entrada libre, está dirixido a profesionais do sector pesqueiro e alimentario, representantes das administracións, organizacións de consumidores, comunidade educativa e persoas interesadas na alimentación e no consumo responsable.

«Peixe sen espiñas. Barreiras ao consumo de produtos do mar» celebrarase o 13 de novembro de 2026, a partir das 11.00 horas, no Centro Tecnolóxico do Mar (CETMAR), en Vigo.

Programa

Inscrición

Foro Internacional sobre a Captura Incidental de Megafauna Mariña Ameazada

By | Eventos, Novidades | No Comments

CETMAR colabora no maior foro internacional sobre a captura incidental de megafauna mariña ameazada, que terá lugar en outubro de 2027 na Cidade da Cultura de Santiago

  • O Centro Tecnolóxico do Mar, da Consellería do Mar, participa na organización deste encontro, que pretende avanzar en solucións para as capturas accesorias (bycatch) de megafauna mariña ameazada, en risco ou protexida na pesca.
  • Esta reunión é unha iniciativa dun conxunto de oito proxectos europeos que actualmente traballan arredor desta temática, como é o caso de REDUCE e LIFE CIBBRINA, nos que participa a área de Promoción e Transferencia de Tecnoloxía do CETMAR.

O Foro Internacional sobre a Captura Incidental de Megafauna Mariña, que terá lugar en Santiago de Compostela do 12 ao 15 de outubro do 2027, será a maior conferencia internacional xamais celebrada para avanzar en solucións para o bycatch. O encontro reunirá a unha diversidade de partes interesadas, capacitándoas para compartir coñecementos e experiencia.

O obxectivo é traballar xuntas por un futuro no que as pesqueiras coexistan plenamente coa megafauna mariña ameazada, que inclúe tiburóns, raias, tartarugas mariñas, aves mariñas e mamíferos mariños, e que enfronta unha importante presión pola captura incidental tanto na pesca a gran escala como a pequena escala.

O encontro está dirixido a calquera persoa que teña experiencia e coñecementos sobre as capturas accesorias da megafauna mariña, desde pescadores e investigadores, responsables políticos, innovadores, a cadea de valor dos produtos do mar e ONGs, entre outros.

Entre outras temáticas, durante o foro abordaranse cuestións como a monitorización, recollida de datos e tecnoloxías emerxentes ou a estandarización de métodos, programas de observadores. Tamén serán tratadas as ferramentas dixitais de monitorización electrónica e a automatización a través da intelixencia artificial, sensores e ADN ambiental, etc. Será obxecto de especial atención o desenvolvemento conxunto de solucións co sector pesqueiro e a transcendencia da temática nas comunidades locais costeiras. Debaterase tamén sobre políticas, gobernanza e marcos internacionais e sobre estudios de caso rexionais e intersectoriais relacionados con esta cuestión, así como sobre a comunicación científica, formación e participación pública para mellorar a concienciación.

A través da área de Promoción e Transferencia de Tecnoloxía do Centro Tecnolóxico do Mar participa na organización deste foro a través dos proxectos REDUCE e CIBBRINA e da man doutras accións europeas actualmente en curso que traballan arredor da captura accidental de especies de megafauna mariña ameazada, en risco ou protexida. Ademais de outras entidades, cabe facer mención á participación de dúas das institucións do padroado da Fundación, o CSIC a través do Instituto de Investigacións Mariñas, o IEO e a Universidade de Santiago de Compostela.

Máis información sobre o foro na súa páxina web (IFBMM)

25 anos de CETMAR

By | Eventos, Novidades | No Comments

O padroado de CETMAR e a Feira Científica LonxaLAB abren este venres os actos do 25 aniversario desta fundación dependente da Consellería do Mar

  • O presidente da Xunta, Alfonso Rueda, presidirá a reunión dos patronos, na que tamén participará a conselleira do Mar, Marta Villaverde, e na que a directora do centro, Rosa Chapela, dará conta do informe de xestión e das contas anuais
  • Despois do Padroado, inaugurarase a feira científica LonxaLAB, con actividades e xogos formativos e divulgativos a través dos que o equipo de CETMAR presentará ao público en xeral as súas liñas de traballo

O Centro Tecnolóxico do Mar-Fundación CETMAR, dependente da Consellería do Mar, abrirá o vindeiro venres 12 de xuño os actos conmemorativos do seu 25 aniversario, que se cumpre precisamente nesa xornada. O centro festexa así un cuarto de século na cidade de Vigo e faino sacando á rúa algúns dos seus traballos e convidado á cidadanía a achegarse, dun xeito práctico e ameno, a unha pequena mostra dos proxectos desenvolvidos polo centro nos últimos anos.

A programación prevista arrincará coa celebración da reunión ordinaria do Padroado da Fundación que, presidida polo titular da Xunta de Galicia, Alfonso Rueda, terá lugar na sede de CETMAR en Bouzas a partir das 10:00 horas, e na que a directora-xerente, Rosa Chapela, informará sobre a actividade do centro neste último exercicio.

O encontro reunirá a todos os representantes das institucións membros deste órgano reitor, como é o caso das consellerías do Mar; Economía e Industria; Medio Ambiente e Cambio Climático;  Cultura e Educación, Ciencia, Universidades e Formación Profesional. Tamén estarán representadas as tres universidades galegas, o Consejo Superior de Investigaciones Científicas-CSIC, Anfaco-Cytma e Conxemar.

Unha vez finalizada a reunión do Padroado terá lugar a inauguración da LonxaLAB, unha xornada aberta ao público que se celebrará na explanada de CETMAR. Entre as 11:00 e as 20:00 horas, este escenario converterase nunha feira científica na que as sete áreas de traballo do centro amosarán, dun xeito participativo, os proxectos e resultados desta entidade. 

As actividades, pensadas para todas as idades, consistirán en talleres sobre o ruído mariño, pesca sostible ou lixo mariño e en xogos relacionados coa captura incidental de especies en perigo, a contaminación ou a planificación do espazo marítimo, entre outros. Haberá zona infantil con contacontos animando ao consumo de peixe e exposición dunha maqueta de batea, un faro, unha gamela ou a cabina dun barco, ademais dalgunhas das embarcacións que o sábado participarán na VII Regata Solar, enmarcada tamén neste 25 aniversario.

Esta competición, organizada pola asociación A Industriosa, co apoio de CETMAR e de Marine Instruments, terá lugar o sábado 13 de xuño na praia de Bouzas. Trátase dunha iniciativa educativa na que estudantes de secundaria deseñan, constrúen e compiten con prototipos propulsados por enerxía solar. A actividade busca espertar vocacións científicas e tecnolóxicas entre a mocidade.

O programa culmina o martes 23 de xuño coa xornada Diálogos do Mar, que reunirá na sala Cíes de CETMAR a profesionais e persoas expertas vinculadas ao centro para reflexionar sobre tres grandes ámbitos de traballo: a dimensión humana do mar, a loita contra a contaminación mariña e a cooperación internacional. Nas charlas participarán tanto persoal do centro como algúns dos colaboradores na traxectoria do centro. 

Con esta programación especial, CETMAR quere celebrar 25 anos de traballo ao servizo do océano e reafirmar o seu compromiso coa sociedade. Creado por iniciativa da Xunta de Galicia e do entón Ministerio de Ciencia e Innovación, o Centro Tecnolóxico do Mar cumpre así un cuarto de século impulsando proxectos de investigación, innovación e cooperación internacional para contribuír á protección do medio mariño e ao desenvolvemento dun sector marítimo-pesqueiro máis competitivo e sostible.

Intercambio entre Galicia e Perú

By | Eventos, Novidades | No Comments

CETMAR organiza un ciclo de xornadas online sobre turismo mariñeiro sostible e diversificación pesqueira no marco do proxecto MARdePiura

  • As sesións buscan promover o intercambio de coñecementos entre Galicia e Perú en torno ao turismo mariñeiro e as estratexias de diversificación económica vinculadas á pesca artesanal

A área de Cooperación Internacional do Centro Tecnolóxico do Mar ven de organizar un ciclo de xornadas en liña sobre turismo mariñeiro sostible e diversificación pesqueira que se desenvolve no marco do proxecto MARdePiura, no que CETMAR traballa da man do Ministerio de la Producción de Perú.

Trátase de seminarios concibidos como espazos de formación e participación centrados no turismo mariñeiro -ou turismo pesqueiro experiencial- para promover o diálogo e o intercambio de coñecementos entre profesionais, administracións e iniciativas galegas e peruanas.

Perú conta con importantes potencialidades para o desenvolvemento de iniciativas de turismo pesqueiro e mariñeiro, así como dúas fórmulas de diversificación sectorial destinadas a fortalecer a sostibilidade  ecolóxica, social e económica das comunidades costeiras. Neste contexto, o proxecto MARdePiura promove o intercambio de experiencias entre Galicia e Perú co obxectivo de compartir coñecementos, ideas prácticas e leccións aprendidas.

Despois de abordar o marco xurídico e regulatorio do turismo mariñeiro en Galicia, así como o papel das entidades encargadas da súa xestión, financiamento e apoio á revitalización das comunidades costeiras, a segunda das sesións temáticas serviu para coñecer casos de éxito desenvolvidos en Galicia e Perú, co obxectivo de visibilizar experiencias de diversificación económica máis alá da actividade extractiva tradicional.

A terceira xornada temática, que terá lugar o vindeiro 9 de xuño (16:00 h hora de España; 9:00 h hora de Perú), consistirá nun foro de diálogo sobre recomendacións e estratexias para avanzar cara a un modelo de turismo sostible complementario á pesca artesanal. Será unha sesión de carácter participativo destinada a identificar barreiras administrativas, financeiras, formativas e legais para o desenvolvemento deste tipo de actividades no contexto peruano, así como a definición de posibles estratexias de acción e fortalecemento institucional.

Sobre MARdePiura

O proxecto MARdePiura (Mulleres, Acuicultura e Reforzo Institucional para o Desenvolvemento Sostible da Economía Azul na Rexión de Piura) está liderado pola Fundación CETMAR e financiado pola Xunta de Galicia, a través de Cooperación Galega, co apoio do Ministerio de la Producción de Perú (PRODUCE), a través da Dirección General de Pesca Artesanal (DGPA) e FONDEPES.

O proxecto, que se iniciou en 2025 e culminará este ano, da continuidade ao traballo realizado nos últimos anos na Baía de Sechura, no noroeste do Perú, a través de iniciativas como Acuipesca, VerTyCe ou Aquavalora.

MARdePiura ten como obxectivo contribuír á adaptación ao cambio climático na pesca artesanal e a acuicultura a través dunha estratexia centrada na diversificación económica, o fortalecemento institucional e a sustentabilidade da economía azul.

Whistle presenta resultados

By | Eventos, Novidades | No Comments

CETMAR acolle a xornada final de Whistle, que presenta os seus resultados para mellorar e fomentar a vixilancia e previsión oceánica nas augas ibéricas occidentais

  • O Centro Tecnolóxico do Mar, que participa nesta acción de cooperación entre Galicia e Portugal, acollerá o evento na súa sede en Bouzas (Vigo) o xoves 18 de xuño de 10:00 a 13.30 h
  • O proxecto permitiu mellorar e integrar os modelos operativos de predición oceanográfica  locais con datos do Copernicus Marine Service nunha plataforma que facilita  a avaliación  das condición ambientais

O Centro Tecnolóxico do Mar-Fundación CETMAR acollerá o vindeiro xoves a xornada final do servizo Whistle, una colaboración transfronteiriza entre Portugal e Galicia (España) que conta có apoio do Copernicus Marine Service National Collaboration Programme (2022-2028).

O proxecto mellora a simulación das condicións oceánicas na Plataforma Ibérica Occidental con especial atención á Western Iberia Buoyant Plume (WIBP), unha corrente de auga con baixa salinidade presente cerca da costa e que afecta á circulación rexional, á estratificación da auga, á distribución de nutrientes e aos procesos bioxeoquímicos mariños.

WHISTLE mellorou os modelos operativos harmonizando forzamentos meteorolóxicos e condicións de contorna, ademais de desenvolver dous casos de estudo, un para mellorar a resposta ante a contaminación mariña en Galicia e outro para garantir a calidade da auga no Parque Natural do Litoral Norte de Portugal.

Dos resultados de todo este traballo darase conta nesta xornada final, que dará comezo ás 10:00 h na sede de CETMAR en Bouzas (Vigo), e na que intervirán representantes de todos os organismos involucrados no proxecto:  Nologin Oceanic Weather Systems S.L.U. – NOW Systems; Instituto de Engenharia Mecânica e Gestão Industrial (INEGI) e +ATLANTIC, Associaçao para um Laboratório Colaborativo do Atlânticos, ademáis da Unidade de Tecnoloxía Mariña de CETMAR en representación do Observatorio Costeiro da Xunta de Galicia .

A inscrición para participar na xornada segue aberta no seguinte enlace, onde tamén é posible consultar o programa: https://cetmar.org/seminarios/jornada-final-WHISTLE/

Semana Marítima Mundial

By | Eventos, Novidades | No Comments

A directora do CETMAR falará sobre economía azul na World Maritime Week, que reúne en Bilbao aos líderes mundiais da industria marítima

  • Rosa Chapela presentará dous relatorios, un nunha sesión transversal e outro no Eurofishing, un dos catro congresos que se celebrarán do 19 ao 21 de marzo no marco da Semana Marítima Mundial
  • Este foro marítimo, que se desenvolverá no Bilbao Exhibition Centre, reúne cada dous anos aos principais actores e expertos co fin de tecer alianzas internacionais, compartir información e facer fronte aos desafíos do sector

A directora-xerente do Centro Tecnolóxico do Mar-Fundación CETMAR, Rosa Chapela Pérez, presentará dous relatorios na World Maritime Week, que se desenvolverá en Bilbao do 19 ao 21 de marzo,  e que será punto de encontro dos principais actores da industria marítima mundial.

Este foro marítimo reúne cada dous anos a profesionais do sector co obxectivo de establecer alianzas internacionais, compartir información e abordar novos retos do sector. Para elo están programados catro congresos internacionais, ademais dun área de exposicións e dun espazo para o traballo en rede.

O programa de conferencias estará liderado por profesionais da industria marítima, que compartirán a súa experiencia e coñecemento e abordarán a perspectiva do sector marítimo nos próximos anos para os subsectores da construción naval (Sinaval), a industria pesqueira (Eurofishing), a industria portuaria (Futureport) e as enerxías renovables mariñas (Marine Energy Week).

A primeira das intervencións da directora do CETMAR terá lugar o día 19 ás 09:40 horas  da mañá, cando participará na primeira das sesións transversais previstas nesta Semana Marítima Mundial, e que estará centrada na economía azul para o desenvolvemento sostible.

Rosa Chapela, que participa ademais como representante do grupo de traballo da Conferencia de Rexións Periféricas Marítimas (CRPM), compartirá mesa de debate co director de Tecnoloxía Mariña de AZTI, Julien Mader; co presidente da Comisión Internacional para a Conservación do Atún Atlántico (ICCAT), Ernesto Penas, e con Óscar Gómez, xerente de Aclunaga.

Xa no marco do congreso Eurofishing, a directora-xerente do CETMAR volverá a intervir ese mesmo día, ás 11:30 horas, nun relatorio titulado “Proteína Azul: unha cuestión de Seguridade e Soberanía Alimentaria (perspectiva internacional)”, e no que volverá a debater xunto ao presidente da ICCAT, Ernesto Penas.

Reunión de EUROFISH

By | Eventos, Novidades | No Comments

A directora-xerente do CETMAR participará como relatora invitada na reunión anual dos países socios de EUROFISH en Copenhague

A directora-xerente do Centro Tecnolóxico do Mar-Fundación CETMAR, Rosa Chapela Pérez, participará como relatora invitada na reunión anual dos países membros de EUROFISH, que terá lugar o vindeiro xoves 30 de xaneiro na sede da asociación internacional en Copenhague.

Neste encontro participarán arredor de medio cento de representantes dos ministerios con competencias en pesca e acuicultura dos 13 países membros e socios de EUROFISH, que abordarán, entre outros asuntos, o programa de traballo e o presuposto da entidade para este 2025, ademais de facer balance das actividades desenvolvidas o ano anterior.

Como ven sendo tradición na reunión anual de EUROFISH, a axenda deste encontro de traballo complétase con dous relatorios, un a cargo dun membro da propia organización internacional, e outro a cargo dun experto externo, que nesta edición corre a cargo da directora-xerente de CETMAR, quen acudirá en representación de Galicia.

Rosa Chapela falará así sobre o impacto socioeconómico da pesca e da acuicultura en Europa e máis concretamente en Galicia, centrándose na importancia de realizar estudios de impacto socioeconómico en ambos sectores para unha mellor toma de decisións informada por parte dos xestores públicos.

Así mesmo, falará dos poucos exemplos de estudios de impacto social e económico que poden ter as comunidades costeiras ante un recorte nas cuotas de pesca, entre eles os realizados pola administración galega con datos aportados por expertos de economía pesqueira da Universidade de Santiago de Compostela.

A directora de CETMAR incidirá así na necesidade de considerar datos económicos e sociais conxuntamente cos datos biolóxicos e ecolóxicos na toma de decisións, o que contribuirá a unha xestión más sostible da pesca e á mellora do benestar das comunidades pesqueiras, e citará  outros exemplos sobre os estudios de impacto económico nos que está a traballar a administración galega, relacionados coa economía azul de Galicia, á ordenación espacial mariña para marisqueo, pesca e acuicultura ou o impacto dos proxectos dos grupos de acción local de pesca nas comunidades litorais, entre outros.

O relatorio está previsto para este xoves día 31 de xaneiro ás 14:30 horas, trala intervención de Søren Espersen Schrøder, membro de Eurofish, quen presentará unha nova ferramenta para axudar á toma de decisións nas empresas de produtos do mar.

EUROFISH é unha organización internacional que traballa para contribuír ao desenvolvemento sostible do sector pesqueiro e acuícola; promover o comercio de produtos pesqueiros de alta calidade e valor engadido e facilitar a transferencia de información e coñecemento.

Para cumprir os seus obxectivos, a organización publica información relacionada co sector na revista Eurofish e na súa páxina web, e organiza xornadas, obradoiros, seminarios e encontros entre empresas. Ademais, desenvolve proxectos nos ámbitos da pesca, a acuicultura, os mercados e o comercio.

Actualmente os países membros de EUROFISH son Albania, Croacia, Dinamarca, Estonia, Hungría, Italia, Letonia, Lituania, Noruega, Polonia, Romanía, Turquía e España.