CETMAR COLABORA EN CHILE NA DEFINICIÓN DA METODOLOXÍA PARA MEDIR O CONSUMO DE PRODUTOS DO MAR
O coordinador da área de Socioeconomía do Cetmar, Jose Luis Santiago, leva a súa experiencia a Chile para coñecer e mellorar o consumo de peixe por habitante.
O Goberno chileno busca aumentar o consumo de peixe a 20kg por habitante e ano en 2027
Jose Luis Santiago, coordinador da área de Socioeconomía do Centro Tecnolóxico do Mar (Cetmar), participou no taller de revisión e validación metodolóxica do consumo per cápita de produtos do mar en Chile, que busca establecer unha metodoloxía para coñecer o cosumo per cápita e ano de productos do mar en Chile. O encontró celebrouse en Viña del Mar os días 1 e 2 de outubro.
A iniciativa, organizada polo Instituto de
Fomento Pesquero (IFOP) a petición da Subsecretaría de Pesca e Acuicultura de
Chile (SSPA), buscou reforzar os procedementos estatísticos que permiten
calcular canto peixe e marisco come a poboación chilena. Este indicador, de
carácter estratéxico para as políticas públicas, forma parte dos compromisos do
Goberno de Chile para incrementar o consumo nacional de produtos do mar ata os
20 kg por habitante e ano en 2027.
No encontro participaron organismos de prestixio
internacional como a Organización das Nacións Unidas para a Alimentación e a
Agricultura (FAO), referente mundial en seguridade alimentaria, o Observatorio
Europeo do Mercado dos Produtos da Pesca e da Acuicultura (Eumofa),
especializado na análise de mercados, e o propio Cetmar, fundación galega
recoñecida pola súa experiencia en investigación aplicada e cooperación
internacional no ámbito mariño.
Durante dúas xornadas analizáronse diferentes
enfoques metodolóxicos, desde o modelo “agregado” ata un enfoque “mixto” que
permite desagregar o consumo por especies clave como salmón, xurelo, mexillón
ou pescada. A revisión tamén abordou aspectos como a actualización dos factores
de conversión, o tratamento de datos incompletos ou a pertinencia de incorporar
existencias dun ano a outro.
No marco destas sesións, Jose Luis Santiago
achegou a experiencia de Cetmar na construción de indicadores socioeconómicos e
na comparación internacional de datos, contribuíndo a un debate que permitirá a
Chile dispoñer de cifras máis sólidas e un modelo de cálculo replicable en
outros países.
GALICIA COMPARTE EN MADRID OS SEUS AVANCES NO DESENVOLVEMENTO LOCAL PARTICIPATIVO DAS COMUNIDADES COSTEIRAS
A directora xeral de
Desenvolvemento Pesqueiro, Ángeles V. Suárez, e a directora xerente do Cetmar,
Rosa Chapela, participaron este martes na sesión técnica da Rede Española de
Grupos de Pesca (Regp), onde todas as comunidades autónomas deron conta da evolución
e desenvolvemento dos proxectos impulsados polos Grupos de Acción Local do
Sector Pesqueiro (Galp) como axentes dinamizadores da economía litoral en
Galicia.
No transcurso da xuntanza, as
representantes da Consellería do Mar, detallaron que este entes, creados polo
departamento que dirixe Marta Villaverde, impulsan 160 proxectos no litoral
galego por valor de 9,7 millóns de euros, cofinanciados polo Fondo Europeo
Marítimo de Pesca e de Acuicultura (Fempa) 2021-2027. A este respecto, destallaron que o 60% destas
iniciativas son destinados a actividades sen fins de lucro e o 40% restante a
actividade económica, que mobilizan en conxunto un investimento privado de 6,1
millóns de euros.
Trátase de accións que permiten
afondar na colaboración público-privada impulsando o desenvolvemento económico
e competitividade de Galicia, cun impacto singular nas comunidades costeiras.
Supoñen a creación de 70 empregos a tempo completo e abordan ámbitos como o
aproveitamento do patrimonio cultural e medioambiental das zonas pesqueiras, a
innovación e promoción da produción e subministro de produtos da pesca e da
acuicultura ou o fomento da economía azul, entre outros. En Galicia existen 8
Galp que aglutinan a máis de 400 organizacións locais, que representan a máis
de 13.000 profesionais do mar.
A directora de Cetmar participa en Aquaculture Europe 2025, o maior congreso europeo de acuicultura
A
directora de CETMAR, Rosa Chapela, participa esta semana en Aquaculture Europe
2025, en Valencia. Intervirá na mesa redonda “Attracting new talents in
aquaculture” e modera unha sesión sobre economía.
Rosa Chapela na intervención do mércores 24
A directora do Centro Tecnolóxico do Mar CETMAR,
Rosa Chapela, participa esta semana en Aquaculture Europe 2025, un evento que
se celebra no Palacio de Congresos de Valencia ata o xoves 25 de setembro e que
reúne a profesionais da acuicultura de máis de 70 países.
Baixo o lema “Aquaculture for Everyone”, o
congreso aborda cuestións clave como a sustentabilidade ambiental, a
rexeneración dos sectores primarios e o desenvolvemento do capital humano. Un
dos seus obxectivos é reforzar o papel da acuicultura como elemento estratéxico
na seguridade alimentaria global.
Trátase do maior evento celebrado nunca no Palacio de Congresos de
Valencia e combina sesións científicas, foros sectoriais, obradoiros de
innovación e actividades específicas para estudantes,
Rosa Chapela intervirá o mércores 24 de setembro
na mesa redonda “Attracting new talents in aquaculture”, xunto a representantes
de centros de investigación, asociacións e empresas líderes do sector. O debate
centrarase nos desafíos da industria relacionados coa atracción e retención de
talento, a remuda xeracional e o avance en materia de igualdade de xénero,
analizando como a diversidade e a inclusión poden impulsar a innovación e a
resiliencia do sector.
O xoves 25, Chapela actuará como moderadora na sesión Market &
Value Chain Economics, xunto ao profesor noruegués Ragnar Tveterås. Trátase
dunha das poucas sesións do congreso que aborda especificamente a dimensión
económica e de mercados dos produtos da acuicultura, un ámbito clave para
garantir a viabilidade do sector.
A organización convidou á directora do CETMAR a
coordinar esta sesión con antelación, apoiando na procura de contribucións e
presentacións orais que permitisen dar forma a este espazo de debate. O
programa inclúe intervencións sobre temas tan relevantes como o marco regulador
da acuicultura na UE, as tendencias na cadea de valor da acuicultura e a súa
competitividade e o papel da economía azul como motor de novas oportunidades de
negocio en acuicultura.
Con esta dobre participación no congreso Rosa
Chapela reforza a visibilidade da acuicultura galega nun dos foros
internacionais máis relevantes para o futuro da acuicultura.
Galicia define a súa Estratexia de Observación Mariña para un uso máis eficiente e sostible dos recursos
O Programa de Ciencias Mariñas de Galicia, está a deseñar a Estratexia de Observación e Monitorización do medio mariño de Galicia, un plan que permitirá aproveitar mellor os recursos xa existentes, cubrir necesidades detectadas e anticiparse aos desafíos ambientais, sociais e económicos que afectan ao noso mar.
O obxectivo é contar cun sistema de observación máis eficiente, coordinado e sostible, que sexa útil tanto para a comunidade científica como para sectores produtivos, administracións, entidades de conservación ou mesmo o turismo e a divulgación. A Estratexia recollerá propostas que melloren a eficiencia, a capacidade de resposta, a gobernanza e a comunicación dos sistemas de monitorización do medio mariño, e estará rematada a finais de 2025.
Neste contexto, o Centro Tecnolóxico do Mar CETMAR acolleu o terceiro obradoiro participativo. Nel participaron 33 representantes de entidades e sectores moi diversos, entre eles MeteoGalicia, a Subdirección Xeral de Investigación e Apoio Científico-Técnico da Consellería do Mar, o INEGA, GALP, o Instituto de Investigacións Mariñas (IIM-CSIC), o Instituto Español de Oceanografía (IEO-CSIC), a Universidade da Coruña, a Universidade de Vigo, CIMA, IGAFA, as Autoridades Portuarias da Coruña e Vigo, confrarías de Pontevedra e Cambados, a Federación Galega de Confrarías, CEMMA, BDRI, INTECMAR e CETMAR. A diversidade de perfís implicados garante que a futura Estratexia sexa unha ferramenta útil e realista, que responda ás necesidades de todos os axentes vinculados ao mar en Galicia.
O proxecto europeo TransformAr celebra o seu evento final en Bruxelas coa participación galega de CETMAR e da Consellería do Mar
O proxecto europeo TransformAr chega á súa conclusión tras catro anos de traballo orientado ao desenvolvemento de solucións de resiliencia fronte ao cambio climático en rexións e cidades europeas. Entre os seus principais resultados destaca a coordinación, por parte do CETMAR, dun demostrador en Galicia centrado na adaptación do sector produtor de bivalvos aos efectos do cambio climático.
O evento final do proxecto celebrouse o pasado 11 de setembro en Bruxelas, no espazo Jardin Hospice, e reuniu representantes da Comisión Europea, gobernos rexionais, centros de investigación e axentes de distintos sectores.
Durante o encontro Manuel García Tasende, xefe de Servizo de Innovación Tecnolóxica da Acuicultura da Consellería do Mar da Xunta de Galicia, participou presentando o interese da Dirección Xeral nos resultados acadados polo demostrador galego. Na súa intervención, destacou tamén as propostas de accións de resiliencia identificadas para impulsar a adaptación do sector mexilloeiro, algunhas das cales continúan a desenvolverse a través de proxectos como:
CAPACTAMEX, que promove o diálogo entre o sector mexilloeiro, a Administración e a comunidade investigadora.
O evento puxo de relevo a necesidade de reforzar a resiliencia das rexións europeas fronte ao cambio climático, máis alá do concepto clásico de “adaptación”. Neste sentido, subliñouse o papel das organizacións de interface, como CETMAR, que facilitan o diálogo entre administracións rexionais, investigadores, industria e sociedade civil para deseñar e implementar propostas innovadoras e sostibles.
TransformAr supuxo un paso adiante na procura de solucións innovadoras e transferibles que poidan aplicarse en diferentes territorios europeos para afrontar os retos que presenta o cambio climático.
Galicia recibe
a una delegación institucional de Honduras para intercambiar experiencias no
sector marisqueiro
A visita
forma parte da asistencia técnica que CETMAR presta no país americano para
reforzar competencias no sector marisqueiro.
Santiago de Compostela, 8 de setembro de 2025 – O Centro Tecnolóxico do Mar (CETMAR) recibe entre o 8 e o 12 de setembro unha delegación institucional de Honduras, no marco da asistencia técnica que o centro presta a Enxeñeiros Sen Fronteiras Galicia para o fortalecemento das capacidades das institucións con competencias no sector marisqueiro no Golfo de Fonseca. Honduras é considerado un país estratéxico para a Cooperación Galega pola súa ligazón histórica e pola tradicional presenza e labor desenvolto polos axentes galegos de cooperación neste Estado.
A delegación hondureña está composta por seis persoas con experiencia en programas de desenvolvemento e xestión de recursos acuáticos. Representantes da Universidade Nacional Autónoma de Honduras (UNAH-Choluteca), o Comité para a Defensa e Desenvolvemento da Flora e Fauna do Golfo de Fonseca (CODDEFFAGOLF) e a Dirección Xeral de Pesca de Honduras (DIGEPESCA)
Durante a súa estadía
en Galicia os participantes manterán reunións e visitas técnicas con expertos e
entidades do sector pesqueiro e marisqueiro.
Serán recibidos na Consellería
do Mar da Xunta de Galicia, onde coñecerán a experiencia galega na
ordenación e control da pesca e o marisqueo, e na Subdirección Xeral
de Cooperación Exterior. A través desta visita técnica de
intercambio preténdese trasladar a experiencia acumulada en Galicia para a
regulación, organización e profesionalización do sector marisqueiro e, ademais,
intercambiar experiencias e información sobre cuestións actuais que están a
afectar ao marisqueo no Golfo de Fonseca, como é o caso de eventos de alta
mortalidade de moluscos, do mesmo xeito que acontece aquí en Galicia.
O programa complétase con visitas a lonxas, cofradías e empresas comercializadoras de peixe e marisco. O obxectivo é coñecer de primeira man a actividade diaria no sector, así como experiencias na promoción do turismo mariñeiro e coñecer os sistemas de trazabilidade e etiquetado dos produtos. CETMAR acompañará á delegación en todas as actividades e facilitará o intercambio coas entidades galegas participantes.
Visita á plaza de abastos de Bueu
Ademais das visitas, a axenda inclúe varias sesións de traballo. A primeira é un intercambio de experiencias sobre a mortalidade de moluscos en Galicia y Honduras, un encontro para a valoración dunha posible colaboración entre universidades galegas e hondureñas, orientada a reforzar a formación e a investigación vinculadas ao sector marisqueiro.
Visita á depuradora Islas Cíes
Tamén está prevista
unha reunión de traballo cunha investigadora
do Centro Oceanográfico da Coruña na que se valorarán as posibilidades de
avaliación de pesquerías pobres en datos e se proporán modelos e técnicas.
Esta visita enmárcase no
proxecto “Mellora da sustentabilidade da actividade marisqueira de grupos de
mulleres no sur de Honduras, Fase 2”, financiado por Cooperación Galega e
liderado por Enxeñeiros sen Fronteiras. O obxectivo do proxecto é mellorar
a autoxestión dos grupos para a obtención de ingresos a través da actividade
marisqueira, así como fortalecer a gobernanza do sector, de cara a unha mellor
sustentabilidade nun sentido amplo.
No marco deste
proxecto, o CETMAR colabora tecnicamente para establecer procesos de
xeración e xestión do coñecemento para a recuperación e sustentabilidade do
recurso marisqueiro no Golfo de Fonseca, así como o fortalecemento das
capacidades dos titulares de obrigas (TTOO) con competencias no sector
marisqueiro.
Segundo Nacións
Unidas, no ano 2025 Honduras ten un Índice de Desenvolvemento Humano de 0,645,
o que o sitúa na posición 139 entre 193 países a nivel mundial e como un dos
países de menor IDH de América Latina. É por iso que Honduras continúa a ser
un dos países prioritarios de actuación no marco do V Plan Director da
Cooperación Galega 2023-2026.
Presentación
da Rede Galega de Escolas Azuis, impulsada polo proxecto NEREIDA
CETMAR apoia a Rede Galega de Escolas Azuis, una iniciativa para formar ás novas xeracións na protección dos ecosistemas acuáticos e no uso do ciencia coñecemento ferramenta para a sustentabilidade e a adaptación ao cambio climático.
O edificio Redeiras da Universidade de Vigo acolleu este xoves, 4 de setembro, o acto de presentación da Rede Galega de Escolas Azuis, unha iniciativa que se está a impulsar a través do proxecto NEREIDA e que conta coa colaboración do CETMAR, tanto no proxecto como na organización do evento.
A Rede Galega de Escolas Azuis está destinada a centros educativos que incorporan a cultura oceánica e acuícola ás súas actividades mediante proxectos vencellados ao mar, ríos e lagos que involucren á comunidade educativa.
A través desta Rede, os centros educativos participantes reciben apoio para desenvolver proxectos azuis, acceder a materiais especializados, participar en programas de formación docente e recibir información de oportunidades de financiamento. O obxectivo é implicar ao alumnado e á comunidade local, fomentando unha aprendizaxe práctica e crítica sobre os ecosistemas acuáticos. Tamén busca sensibilizar sobre o papel fundamental do océano na regulación climática e na biodiversidade.
A xornada de presentación celebrouse ao longo do día de hoxe no Edificio Redeiras da Universidade de Vigo, situado no Berbés. O programa incluiu a presentación institucional da rede, exemplos de boas prácticas en centros xa acreditados, un obradoiro participativo de creación de proxectos e espazos para o diálogo e a posta en común de conclusións. Participaron seis centros educativos da rede e dezasete centros interesados na iniciativa, xuntando unas 40 persoas.
Esta iniciativa intégrase na Network of European Blue Schools (NEBS), impulsada pola Comisión Europea no marco da coalición EU4Ocean e coordinada pola European Marine Science Educators Association (EMSEA). Contribúe así ao cumprimento dos Obxectivos de Desenvolvemento Sostible 4 e 14 (educación de calidade e conservación da vida submarina) e aos obxectivos da Década das Ciencias Oceánicas para o Desenvolvemento Sostible 2021–2030, proclamada pola ONU e liderada pola UNESCO.
O proxecto NEREIDA conta con financiamiento da FECYT, e etá a ser coordinado polo CIM da Universidade de Vigo. Ademáis do CETMAR, colaboran o Instituto de Investigacións Mariñas IIM-CSIC, a Autoridade Portuaria de Vigo, FUNDAMAR, 13 Grados e Northwind.
A Xunta reforza a investigación sobre cultivo de mexillón co proxecto BATEAS
A Consellería do Mar, a través do Centro Tecnolóxico do Mar-Fundación Cetmar, desenvolve esta iniciativa que busca analizar os cambios na produción de mexillón e ofrecer ferramentas útiles ao sector
A iniciativa BATEAS forma parte das actuacións impulsadas pola Consellería do Mar para mellorar a base de coñecemento sobre a evolución do cultivo de mexillón nas rías galegas. O proxecto ten como obxectivo principal comprender mellor as condicións ambientais que inflúen na produtividade das bateas, achegando respostas aos desafíos detectados polo sector nos últimos anos; así como establecer unha canle de comunicación entre bateeiros e administración.
O proxecto está liderado pola Consellería do Mar e cofinanciado pola Unión
Europea a través do Fondo Europeo Marítimo, de Pesca, e de Acuicultura (Fempa).
Compleméntase con outras iniciativas en marcha, como o proxecto APROMEX,
liderado polo Centro de Investigacións Mariñas de Galicia (CIMA), centrado na
avaliación da dispoñibilidade de mexilla, e Capacitamex, orientado á
transferencia de coñecemento mediante obradoiros cos produtores, nos que tamén
participa activamente o Cetmar.
Entre os logros alcanzados pola iniciativa BATEAS destaca a implantación dun sistema de recollida sistemática de información ambiental a través dunha batea na Ría de Arousa equipada con sensores, que funciona como “batea sentinela”. O desenvolvemento tecnolóxico e técnico realízase desde o Centro Tecnolóxico do Mar-Fundación Cetmar en colaboración cos propietarios da batea, que participan no deseño da solución. Nela instaláronse equipos de monitorización que permiten realizar un seguimento en tempo real de parámetros como a temperatura e a salinidade da auga a distintas profundidades, así como datos meteorolóxicos e a variación de peso das cordas de mexillón. Esta información compleméntase con outros datos que se recuperan periodicamente durante as visitas de mantemento, como datos de turbidez ou fluorescencia.
A monitorización continua desta infraestrutura permite realizar un seguimento detallado da evolución das condicións ambientais en paralelo ao crecemento do mexillón nas cordas.
Outro dos piares do traballo é a creación dunha canle de comunicación bidireccional que facilite o intercambio de información entre o sector mexilloeiro e a administración. A través da rede de contactos xerada polos obradoiros Capacitamex, Cetmar mantén un diálogo constante co sector, recollendo información de primeira man sobre o estado dos cultivos e transmitindo á administración as necesidades e prioridades dos produtores. Deste xeito, a Consellería do Mar promove unha xestión máis áxil, eficiente e baseada en datos obxectivos, contribuíndo á sustentabilidade do sector mexilloeiro e á consolidación de Galicia como referente na produción de mexillón.
Cetmar impulsa en Perú o proxecto MARdePiura para fortalecer a economía azul e afrontar o cambio climático
Financiada pola Xunta de Galicia a través de Cooperación Galega, Mar de Piura aposta pola innovación acuícola, a sustentabilidade da pesca artesanal e o liderado das mulleres na economía azul.
O Centro
Tecnolóxico do Mar-Fundación CETMAR, dependente da Consellería do Mar da
Xunta de Galicia, vén de firmar un novo convenio de colaboración ca
Consellería de Presidencia, Xustiza e Deportes para a implementacion do proxecto
MARdePiura (Mulleres, Acuicultura e Reforzo Institucional para o
Desenvolvemento Sostible da economía azul na Rexión de Piura), co obxectivo de
contribuír á adaptación ao cambio climático da pesca artesanal e da acuicultura
mediante unha estratexia centrada na diversificación e a sustentabilidade.
Financiado pola Xunta de Galicia a través de Cooperación Galega e co apoio do Ministerio da Produción (PRODUCE) peruano —a través da Dirección Xeral de Pesca Artesanal (DGPA) e de FONDEPES—, o proxecto dará continuidade ao traballo desenvolvido nos últimos anos na Baía de Sechura, no noroeste de Perú, con iniciativas como Acuipesca, VerTyCe ou Aquavalora.
Nesta nova etapa, CETMAR traballará estreitamente coas Organizacións Sociais de Pescadores Artesanais (OSPAs) dedicadas ao cultivo da cuncha de abanico (Argopecten Purpuratus). O obxectivo é mellorar a sustentabilidade da cadea produtiva mediante a incorporación de sistemas de aprovisionamento de semente de laboratorio e o reforzo
dos protocolos de boas prácticas. Esta liña de acción permitirá incrementar a
eficiencia e garantir unha maior resiliencia da actividade fronte aos efectos
do cambio climático, asegurando a conservación do recurso.
En paralelo, o proxecto continuará co acompañamento aos emprendementos liderados por mulleres en Sechura, dedicados á comercialización de produtos pesqueiros artesanais. A través da impartición de accións formativas e da elaboración de informes de prospección de mercados, será posible mellorar os estándares de calidade dos produtos ofrecidos e, ao mesmo tempo, favorecer o seu posicionamento en novos mercados.Desta maneira, preténdese mellorar os ingresos destas mulleres e reforzar o seu papel na economía azul local.
Finalmente, o proxecto tamén porá o acento no reforzo das capacidades técnicas das institucións públicas vinculadas tanto á acuicultura como ao turismo mariñeiro-pesqueiro. A través de accións formativas e mesas de coordinación interinstitucional, promoveranse medidas que favorezan a sustentabilidade do sistema produtivo acuícola e a creación de iniciativas de turismo vivencial sostible na rexión de Piura. Este compoñente aspira a diversificar a economía local e a xerar alternativas de desenvolvemento complementarias á pesca artesanal.
Con un orzamento de 106.848,77 euros, o proxecto busca incrementar a sustentabilidade da cadea de valor pesqueira e acuícola, xerar novas oportunidades de negocio e fortalecer a gobernanza institucional para afrontar os retos do cambio climático.
Cooperación Galicia–Perú
O proxecto
MARdePiura reforza os estreitos vencellos establecidos entre Galicia e Perú,
que contan cunha traxectoria de colaboración de máis de 20 anos. Desde o
Plan Director 2006-2009, Perú foi considerado país estratéxico para a
Cooperación Galega, unha relación que se mantén no vixente V Plan Director
2023–2026.
En 2004, a Xunta
de Galicia e o Ministerio da Produción de Perú asinaron un Memorando
de Entendemento sobre Cooperación Pesqueira e Acuícola, renovado en 2014 e
que continúa a ser o marco de colaboración que posibilita proxectos como
MARdePiura.
Máis de 100 produtores participan nos primeiros obradoiros de Capacitamex sobre o ciclo de vida do mexillón en Galicia
Esta acción da Consellería do Mar, coordinada polo Centro Tecnolóxico do Mar, levou a cabo cinco obradoiros en diversas localidades onde abordouse os factores ambientais que inflúen na reprodución deste bivalvo
Técnicos investigadores do Centro de Investigacións Mariñas (CIMA), de Vilanova de Arousa, presentaron os resultados do seguimento da abundancia de mexilla no intermareal da comunidade
Tamén amosaron os dous visores dispoñibles na web de Apromex, un que identifica os puntos de mostraxe e outro que facilita a información da abundancia de larvas elaborado polo Intecmar
O sector mexillón de Galicia e a comunidade científica reúnense nos obradoiros de Capacitamex para compartir coñecementos. Esta iniciativa da Consellería do Mar, cofinanciada polo Fondo Europeo Marítimo de Pesca e Acuicultura (Fempa), está a poñer en valor a importancia do coñecemento sobre o ciclo do mexillón e os factores ambientais que inflúen na súa reprodución. A actividade está a ser coordinada polo Centro Tecnolóxico do Mar (CETMAR), que informa ás Asociacións de Produtores de Mexillón de Galicia das liñas desta iniciativa invitándoas a colaborar na organización dos obradoiros.
Realizáronse ata agora 5 obradoiros en diversas localidades, participando Amegrove, Socomgal e as once delegacións de Opmega, cunha boa acollida e participación de socios e socias de todas as rías baixas. Estes obradoiros foron concibidos como momentos de encontro entre expertos investigadores e o sector produtor de mexillón, participando máis de 100 produtores, que amosaron o seu interese por coñecer os resultados dos estudos relacionados coas primeiras fase do ciclo do mexillón, dende abundancia de larvas á dispoñibilidade de cría de mexillón (mexilla).
Deste xeito, técnicos investigadores do Centro de Investigacións Mariñas (CIMA), de Vilanova de Arousa, presentaron os resultados do seguimento da abundancia de mexilla no intermareal de Galicia. Trátase de series de datos de varios anos, obtidas mediante mostraxes que se están a facer periodicamente, e que se retomarán previamente á campaña de recollida de mexilla que comeza en decembro. Debateuse sobre a importancia de obter series de datos longas, para poder avanzar no coñecemento do comportamento deste recurso, e chegar a estimar a súa abundancia no litoral.
Pola súa banda, investigadoras do CINBIO da U-Vigo explicaron o sistema de análise de densidade larvaria de bivalvos nas rías galegas: dende a recollida de mostras semanais, así como o novidoso sistema de marcaxe con anticorpos para identificar e contar as larvas de mexillón nesas mostras.
Visores web
Para acceder a esta información, técnicos da Unidade Tecnolóxica do Mar (Utmar-Cetmar) amosaron dous novos visores web. O primeiro identifica os puntos de mostraxe, e informa da abundancia da cobertura de mexilla en rocha, caracterizando o seu tipo e dando acceso a imaxes das mostraxes. O segundo visor facilita o acceso á información de abundancia de larvas que se viña publicando no Intecmar en formato de informes semanais. Ambos os dous visores están dispoñibles na sección de recursos da páxina web apromex.gal.
Nos obradoiros tamén se expuxo, por parte de investigadores do Instituto de Investigacións Mariñas (IIM-CSIC) de Vigo, a relación entre afloramento, produtividade das rías e a dispoñibilidade de mexilla. Amosando como, grazas aos datos de recollida de mexilla cedidos por diversas asociacións, foi posible realizar estudos científicos que os relacionan coas variables medioambientais, e que poderán facilitar o deseño de ferramentas predictivas. Por último, e afondando na importancia de dispoñer de datos robustos e fiables, presentouse a aplicación móbil para a declaración de obtención de cría de mexillón (MOVTIC), tanto para recollida no medio natural, como en cordas colectoras.
Próximos obradoiros
Estas xornadas concluíron cun momento de debate informal, onde os investigadores e técnicos puideron recoller observacións e comentarios directamente dos asistentes. As conversas están a enriquecer as liñas de investigación, pero tamén permiten plantexar melloras nas ferramentas amosadas, co fin de facilitar o seu uso por parte do sector, e garantir unha maior calidade da información recollida. Igualmente permitiron establecer novos contactos entre os participantes para iniciar futuras colaboracións.
Os próximos obradoiros comezarán a programarse en setembro, co fin de continuar facilitando o acceso ás ferramentas de xestión da mexilla durante a próxima campaña de recollida deste recurso.
Utilizamos cookies para asegurar que damos la mejor experiencia al usuario en nuestra web. Si sigues utilizando este sitio asumiremos que estás de acuerdo.ValePolítica de privacidad
