Os socios do proxecto GEPETO «Xestión pesqueira e obxectivos transnacionais» seguen a traballar na busca de novos modelos de xestión pesqueira cara a garantir a explotación dos recursos dun modo sostible dende o punto de vista biolóxico, social, económico e medioambiental. Este é o obxectivo fundamental desta iniciativa financiada pola Unión Europea e na que, ademáis da Fundación CETMAR, que coordina o proxecto, participan outras institucións de España, Francia, Portugal e Irlanda.
Mitigar o impacto de parasitos presentes en produtos da pesca europeos e de importación a través de novas solucións tecnolóxicas e ferramentas de xestión é o obxectivo xeral do proxecto PARASITE, unha iniciativa na que está a participar o Centro Tecnolóxico do Mar e que está financiada polo Sétimo Programa Marco de I+D da Unión Europea.
Durante os vindeiros tres anos, as áreas de Promoción e Transferencia de Tecnoloxía e de Tecnoloxía dos Produtos Pesqueiros da Fundación CETMAR traballarán neste proxecto liderado polo Doutor Santiago Pascual, do Instituto de Investigacións Mariñas do CSIC, e formando parte dun consorcio multidisciplinar integrado por outras once institucións de investigación europeas e tres asiáticas, así como por seis PEMEs europeas.
Os principais resultados de PARASITE materializaranse en avances cara a mellora da seguridade alimentaria, cos conseguintes beneficios para a saúde pública e a confianza do consumidor; no fortalecemento da competitividade dos produtos europeos da pesca “dende o barco ao prato” e na potencial repercusión que isto terá na mellora das políticas europeas de seguridade alimentaria.
A reunión inicial do proxecto tivo lugar os días 7 e 8 de febreiro na sede do Centro Tecnolóxico do Mar en Vigo, onde se deron cita representantes das institucións que forman parte do consorcio PARASITE.
Xunto á Fundación CETMAR e ao CSIC son socios deste proxecto Comercial Hospitalaria Grupo 3, S.L.; Cooperativa de Armadores de Pesca del Puerto de Vigo; Larpro Engineering, S.L.; Agence Nationale de Securite Sanitaire; Central Luzon State University; Havstovan – Faroe Marine Research Institute; Hermes, S.A.; Institut za Oceanografiju i Ribarstvo (INSTITUTE of Oceanography and Fisheries); Institute for Biotechnology and Environment, Nha Trang University, Vietnam; Istituto Superiore di Sanita; Max Rubner-Institut; National Institute of Nutrition and Seafood Research; Nederlof’s Vishandel B.V.; Servicio Madrileño de Salud; Technet, S.A.; Universita di Tuscia-Viterbo; University of Aberdeen; University of Copenhagen e Zhejiang Ocean University of China.
A produción de semente de ostra plana (Ostrea edulis) en criadeiro é o eixo central dun taller que terá lugar na localidade holandesa de Yerseke o vindeiro 31 de xaneiro, organizado polos socios do proxecto europeo Oysterecover, que coordina o Centro Tecnolóxico do Mar-Fundación CETMAR.
Esta iniciativa, financiada polo Sétimo Programa Cadro, conta coa participación de quince organizacións europeas, entre elas outras catro de Galicia, como é o caso do Centro de Investigacións Mariñas-CIMA, da Universidade de Santiago de Compostela, da Confraría de Pescadores de Noia e da empresa depuradora José María Daporta Leiro e Hijos.
O principal obxectivo deste proxecto que lidera a Fundación CETMAR é contribuír á recuperación da produción de ostra plana mediante a utilización de ferramentas biotecnolóxicas que permitan, no futuro, a obtención de estirpes resistentes a bonamiose.
Nos anos 70 e 80 do pasado século, a produción de ostra plana veuse drasticamente reducida en toda Europa como consecuencia da sobreexplotación e de dúas patoloxías asociadas á presenza dos parasitos Martelia refringens e Bonamia ostreae. A pesar de térense probado diferentes estratexias de xestión dos bancos para facer fronte a este problema, só apareceron expectativas optimistas cando os avances na bioloxía e xenética permitiron que varias institucións de investigación europeas, e entre elas o CIMA, iniciaran procesos de selección de estirpes resistentes que deron resultados esperanzadores e que sentaron os precedentes para o desenvolvemento do Oysterecover.
Porén, dende o inicio do proxecto, a irregular dispoñibilidade de semente, derivada das dificultades atopadas na súa produción en criadeiro, foi identificada como un dos principais atrancos para o desenvolvemento de estratexias de recuperación, xa que a produción de Ostrea edulis depende, en grande medida, da captación de semente do medio natural.
Dado que este problema podería chegar a limitar o impacto dos avances acadados en Oysterecover, os socios do proxecto organizan un obradoiro específico que contará coa participación de reputados científicos expertos na materia así como de outros produtores alleos ó proxecto. Este taller pretende así converterse nun foro de discusión aberto e con forte participación do sector, o que permitirá trazar liñas de traballo prioritarias para o futuro inmediato e identificar posibilidades de colaboración.
O esteiro do río Miño e a súa calidade medioambiental foron obxecto hoxe dun seminario na sede do Centro Tecnolóxico do Mar en Vigo no marco do proxecto TEAM-Miño, no que a Fundación CETMAR participa xunto a investigadores e administracións con competencia nas bacías hidrográficas de Galicia e do Norte de Portugal.
A directora-xerente do CETMAR, Paloma Rueda Crespo, foi a encargada da apertura desta xornada nunha intervención na que recordou o valor ecolóxico do río Miño e a importancia do seu mantemento en condicións óptimas. Por este motivo agradeceu o traballo de todos os socios que están a desenvolver as accións do proxecto europeo TEAM-Miño, unha iniciativa que, dixo, axudará a preservar este entorno natural que comparten Galicia e o Norte de Portugal. Rueda Crespo agradeceu tamén a presencia do arredor de medio cento de expertos que asistiron ao seminario.
O encargado de dar a coñecer os pormenores do proxecto foi José Luís Gómez, técnico da área de Control e Xestión do Medio e dos Recursos Mariños do CETMAR, quen explicou que o obxectivo fundamental de TEAM-Miño é abordar o grado de implementación da Directiva Marco da Auga neste esteiro e expor unha aproximación preliminar do estado ecolóxico das súas masas de auga, froito dos resultados obtidos a raíz das mostraxes realizadas neste ano polos membros do consorcio.
“Transferencia de ferramentas para a avaliación, ordenación, xestión e educación ambiental en esteiros” é o título do proxecto que, recordou o representante do CETMAR, está financiado pola Unión Europea a través do programa de Cooperación Transfronteiriza España-Portugal e terá actividade ata mediados de 2013, cando se celebrará a conferencia final.
Coordinado pola Estación de Ciencias Mariñas de Toralla da Universidade de Vigo, no consorcio de TEAM-MIÑO participan xunto á Fundación CETMAR a Administração Rexional Hidrográfica do Norte de Portugal; Augas de Galicia; o Centro de Monitorização e Interpretação Ambiental de Vila do Conde; o Centro Interdisciplinar de Investigação Marinha e Ambiental; a Confederación Hidrográfica Miño-Sil; o Instituto Español de Oceanografía; o Instituto Nacional dos Recursos Biolóxicos de Portugal; a Mancomunidade de Municipios do Baixo Miño e a Universidade de Aveiro.
Desenvolver ferramentas comúns para a aplicación coordinada da Directiva Marco da Auga no esteiro do Miño e potenciar a participación cidadá na xestión e conservación deste ecosistema acuático son os obxectivos xerais deste proxecto europeo, que busca a colaboración e implicación das administracións e da sociedade a ambas as beiras do río.
O esteiro do río Miño e a súa calidade medioambiental serán obxecto dun seminario que terá lugar o vindeiro venres 11 de xaneiro na sede do Centro Tecnolóxico do Mar en Vigo no marco do proxecto TEAM-MIÑO, no que a Fundación CETMAR participa xunto a investigadores e administracións con competencias nas bacías hidrográficas de Galicia e do Norte de Portugal.
A directora-xerente do CETMAR, Paloma Rueda Crespo, será a encargada da apertura deste seminario, que ademais de para presentar o devandito proxecto servirá para abordar o grado de implementación da Directiva Marco da Auga neste esteiro e para expor unha aproximación preliminar do estado ecolóxico das súas masas de auga, froito dos resultados obtidos a raíz das mostraxes realizadas neste ano polos socios de TEAM-MIÑO.
“Transferencia de ferramentas para a avaliación, ordenación, xestión e educación ambiental en esteiros” é o título do proxecto que, financiado pola Unión Europea a través do programa de Cooperación Transfronteiriza España-Portugal, terá actividade ata mediados de 2013, cando se celebrará a conferencia final.
Coordinado pola Estación de Ciencias Mariñas de Toralla da Universidade de Vigo, no consorcio de TEAM-MIÑO participan xunto á Fundación CETMAR a Administração Regional Hidrográfica do Norte de Portugal; Augas de Galicia; o Centro de Monitorização e Interpretação Ambiental de Vila do Conde; o Centro Interdisciplinar de Investigação Marinha e Ambiental; a Confederación Hidrográfica Miño-Sil; o Instituto Español de Oceanografía; o Instituto Nacional dos Recursos Biolóxicos de Portugal; a Mancomunidade de Municipios do Baixo Miño e a Universidade de Aveiro.
Desenvolver ferramentas comúns para a aplicación coordinada da Directiva Marco da Auga no estuario do Miño e potenciar a participación cidadá na xestión e conservación deste ecosistema acuático son os obxectivos xerais deste proxecto europeo, que busca a colaboración e implicación das administracións e da sociedade a ambas as beiras do río.
Por en marcha novos plans de xestión das pesqueiras a longo prazo coa participación de todos os axentes implicados nesta actividade é o obxectivo do proxecto europeo GEPETO “Xestión de Pesqueiras e Obxectivos Transnacionais”. Esta iniciativa, financiada pola Comisión Europea a través do programa Interreg Espacio Atlántico e o Fondo Europeo de Desenvolvemento Rexional, está liderada polo Centro Tecnolóxico do Mar-Fundación CETMAR e conta coa participación de centros de investigación e representantes do sector pesqueiro de España, Francia, Portugal e Irlanda.
Os primeiros pasos para deseñar o novo modelo de xestión pesqueira déronse recentemente en Madrid cunha reunión de representantes de todas as entidades e institucións que conforman o consorcio do proxecto. Ademais do CETMAR e o CCR-Sur participan nesta iniciativa IFREMER de Francia, AZTI-Tecnalia, IPMA de Portugal, o Instituto Español de Oceanografía, a Universidade das Azores, Marine Institute de Irlanda e o Consejo Consultivo Regional para las Aguas Noroccidentales (CCR-N).
O ámbito de actuación de GEPETO corresponde á fachada Atlántica Sur de Europa, onde se pretende desenvolver un modelo participativo que integre a todas as partes implicadas na actividade pesqueira. A intención é lograr novos métodos de xestión innovadores que fagan da pesca unha actividade competitiva dende o punto de vista socioeconómico e que, ao tempo, preserve os recursos naturais do medio mariño a longo prazo.
Como paso previo á definición dos novos plans de xestión elaborarase un mapa que establecerá as diferentes actividades pesqueiras existentes na zona obxecto deste estudo, así como a súa importancia en relación coas capturas e a súa repercusión socioeconómica. Tomando como base a información desta ferramenta describiranse distintas unidades de xestión, co gallo de parcelar as actividades e zonas que son susceptibles de ter unha xestión común adaptada ás súas necesidades.
A perda de competitividade do sector europeo da pesca, a crise económica e un marco regulamentario a corto prazo son tres factores que están a contribuír ao menoscabo da actividade da pesca en Europa. Co ánimo de contribuír a garantir o seu futuro, o proxecto GEPETO busca a colaboración entre científicos, profesionais, grupos ecoloxistas e todos os axentes do sector.
Tras acadar un novo acordo na Comisión Europea, respecto aos TACs e cotas para 2013, os socios de GEPETO plantexan unha alternativa a máis longo prazo na xestión pesqueira, procurando un marco máis estable para as propostas do sector pesqueiro e maior visibilidade ás partes interesadas. O proxecto finalizará na primavera do 2014.
O Centro Tecnolóxico do Mar propiciou un novo encontro entre investigadores, sector marítimo-pesqueiro e administración nunha nova xornada do Foro que sobre Seguridade Alimentaria en Produtos da Pesca estase a celebrar en Vigo dende o martes, organizado pola Fundación CETMAR e o Instituto de Investigaciones Marinas-CSIC.
Na apertura deste evento, dedicado ás “Tecnoloxías para garantir a Bioseguridade dos produtos da pesca”, a directora-xerente do CETMAR, Paloma Rueda Crespo, asegurou que iniciativas deste tipo permiten á Fundación cumprir cos obxectivos para os que foi creada. “A interrelación entre centros de investigación e as empresas privadas axuda a difundir e divulgar os resultados destes organismos e a colaborar co sector privado”, unha colaboración que, engadiu, tamén é “enriquecedora” para a Administración, o que redunda, apuntou, “nunha xestión mais proveitosa” para todos.
A técnica da área de Tecnoloxía dos Produtos Pesqueiros e responsable do Foro por parte do CETMAR, Elvira Abollo, foi a encargada de abrir os relatorios recordando que a organización deste evento foi posible gracias á colaboración de outras entidades públicas e privadas, como é o caso do Porto de Vigo, en cuxa sede péchase o Foro mañá pola tarde.
Respecto as dúas mesas de traballo celebradas o martes e o mércores, unha con asistencia de representantes do sector e dos centros de investigación, e outra de investigadores que traballan sobre os problemas derivados das parasitoses nos produtos da pesca, Elvira Abollo asegurou que resultaron “moi proveitosas” para tódalas partes.
O Foro finaliza mañá cunha nova xornada, esta vez pola tarde, no edificio de sesións do peirao de trasatlánticos do Porto de Vigo. “Novos retos en seguridade alimentaria dos produtos da pesca” é o título deste “Infoday”, que ten previsto o seu inicio a partires das catro.
O Centro Tecnolóxico do Mar acolleu hoxe a presentación dunha nova rede de centros de formación marítima. Foi durante a conferencia final do proxecto europeo Marleanet, no que a Fundación CETMAR ven de traballar xunto a institucións de Portugal, Francia e Irlanda co obxectivo de integrar a tódolos subsectores deste ámbito académico.
Na apertura da xornada, que correu por conta da directora-xerente do CETMAR, Paloma Rueda Crespo, esta destacou o feito de que “tódolos centros de formación de Galicia e de España” foran quen de ”atoparse, intercambiar experiencias e fomentar a creación dunha rede, propiciando sinerxías” que, asegurou, “terán aproveitamento no futuro”. Por este motivo agradeceu a participación tanto dos socios de Marleanet como das institucións de formación que colaboraron no cumprimento dos fins desta iniciativa.
Pola súa banda, Lucía Fraga, coordinadora da área de Formación do Centro Tecnolóxico do Mar, introduzo aos asistentes á conferencia nos detalles do proxecto que, recordou, contou coa participación de centros de formación civís, da Armada e marítimo-pesqueiros. Financiado a través do programa Interreg da Unión Europea, Marleanet contou coa participación de seis socios e manterá a súa actividade ata finais de 2012.
Do desenvolvemento da base de datos Marleanet falou Anxela Carballo, técnica do proxecto no CETMAR. Explicou que está estruturada en catro rexistros: documentos relacionados con este ámbito académico; entrevistas coas reflexións e opinións de expertos, docentes e axentes do sector; persoas –formadores, expertos, investigadores- e, finalmente, organizacións, como os propios centros de formación, agrupacións, asociacións ou organismos do sector marítimo-pesqueiro.
Entre as vantaxes desta base de datos destacou a maior visibilidade dos centros en internet e o feito de que propicia contactos entre institucións de España, Portugal, Irlanda e Francia. Tamén permite, dixo, compartir recursos e coñecementos e sirve de punto de encontro entre docentes, expertos e profesionais. Resaltou tamén o feito de que, por primeira vez, propíciase a interacción entre os sectores implicados na navegación, como é o caso da Armada, da mariña mercante e do sector da pesca.
Un debate aberto sobre a orientación da rede nun futuro e as necesidades dos centros de formación que sexa desexable abordar pechou o encontro, disponible no canal CAU CETMAR de YouTube. Os relatorios estarán en breve en www.marleanet.com.
Xunto ao CETMAR participan nesta iniciativa o Centre Européen de Formation Continue Maritime de Concarneau, que coordina a iniciativa; a Université de Bretagne Occidentale; a Mutua dos Pescadores e a Escola Náutica Infante Don Henrique de Portugal e o Cork Institute of Technology/ National Maritime College of Ireland.
“Evolución e tendencias das poboacións de merlúcidos de interese industrial. Saúde do recurso” é o título do seminario que se celebrará na sede do Centro Tecnolóxico do Mar en Vigo mañá mércores día 28 e o venres 30 de novembro, organizado pola propia Fundación CETMAR e o Instituto Español de Oceanografía en colaboración coa Plataforma Tecnolóxica TECNPOPEIXE.
O obxectivo destas xornadas, nas que intervirán recoñecidos expertos de ámbito internacional, é abordar o futuro a corto prazo destas pesqueiras e as posibles estratexias cara a súa óptima xestión a fin de garantir o súa continuidade e, consecuentemente, o futuro da flota conxeladora e de altura, das empresas elaboradoras e dos frigoríficos que dependen delas.
A directora-xerente do CETMAR, Paloma Rueda Crespo, será a encargada de presentar este seminario, cuxa apertura correrá a cargo do subdirector xeral da Consellería do Medio Rural e do Mar, José Molares. Será mañá mércores nunha primeira xornada dedicada ás especies do Atlántico Suroccidental, como é o caso das pescadas arxentina, austral e de cola. No segundo día do seminario, o venres 30, o director do IEO, Eduardo Balguerías, abrirá unha mañá dedicada as especies das costas occidentais de África e á pescada europea.
Os relatorios correrán a cargo dos doutores Patricio Árana, da Pontificia Universidade Católica de Valparaíso; Ana Gordoa do CSIC; e José Luís del Río,CarmenG. Piñeiro, Santiago Cerviño e José Castro do IEO.
O Centro Tecnolóxico do Mar-Fundación CETMAR ven de organizar un Foro de I+D+I sobre seguridade alimentaria en colaboración co Instituto de Investigaciones Marinas-CSIC. Baixo o título de “Bioseguridade en produtos da pesca: novos retos do laboratorio á mesa”, terá lugar en diversos escenarios da cidade de Vigo do 27 ao 30 de novembro.
O obxectivo desta iniciativa, na que tamén colabora o Porto de Vigo, é trasladar ao sector os resultados de investigación encamiñados á consecución de procesos e produtos recoñecibles polos seus altos estándares de calidade, contribuíndo así a mellorar a competitividade e a capacitación profesional e a incrementar as oportunidades de negocio.
A primeira xornada do foro consistirá nunha mesa de traballo sectorial de acceso restrinxido. Prevista para o día 27, leva por título “O compromiso da bioseguridade: estímulos tecnolóxicos e de mercado” e reunirá a representantes do sector industrial –extractivo, transformador- e comercializador, así como de empresas de base tecnolóxica, de centros tecnolóxicos e de organismos públicos de investigación. A apertura deste acto correrá a cargo do subdirector xeral da Pesca e dos Mercados da Pesca da Consellería do Medio Rural e do Mar, Antonio Rodríguez Fernández.
O día 28 terá lugar unha segunda mesa de traballo, esta vez con investigadores e tecnólogos procedentes de diferentes universidades e organismos públicos de investigación do país. Ao igual que no caso da xornada para o sector, esta será de acceso restrinxido.
O día 29 celebrarase o seminario “Tecnoloxías para garantir a bioseguridade dos productos da pesca”, no que participarán prestixiosos científicos nacionais e internacionais e expertos do ámbito empresarial.Paloma Rueda Crespo, directora-xerente do Centro Tecnolóxico do Mar, será a encargada de inaugurar a xornada.
Finalmente, as instalacións do Porto de Vigo acollerán o día 30 un Infoday sobre “Novos retos en seguridade alimentaria en produtos da pesca”. Nesta xornada tomarán parte responsables do SERGAS e expertos a nivel nacional e internacional do ámbito da lexislación, comunicación e competitividade en seguridade alimentaria.
