All Posts By

Marta González

A fundación CETMAR presenta a ruta marítima entre Vigo e Viana do Castelo deseñada no marco do proxecto europeo PROAMARE

Por | Novedades | Ningún comentario

O Centro Tecnolóxico do Mar-Fundación CETMAR presenta o vindeiro 28 de xuño unha ruta marítima entre Vigo e Viana do Castelo deseñada no marco do proxecto europeo PROAMARE, cuxa finalidade é a recuperación do patrimonio marítimo e a súa posta en valor como reclamo turístico.

Durante esta xornada, que dará comezo as dez da mañá na sede da Fundación CETMAR en Bouzas, os asistentes poderán coñecer de primeira man as características desta ruta e participar nunha viaxe piloto a bordo da goleta Nieves, que cubrirá unha parte do traxecto entre Vigo e Baiona.

Antes de embarcar no peirao de Bouzas, os asistentes desprazaranse ao Museo do Mar de Galicia en Alcabre para asistir a unha charla sobre o proxecto PROAMARE e  a unha ruta guiada por estas instalacións.

De volta en Bouzas, a goleta Nieves partirá ás doce da mañá rumbo a Baiona. A chegada a esta vila está prevista arredor das 14,15 horas, cando terá lugar o regreso a Vigo en autobús. Durante a travesía, os asistentes poderán degustar un aperitivo.

Converter o patrimonio marítimo nun reclamo turístico é un obxectivo cada vez mais en auxe por canto se trata dunha acción que favorece a diversificación da actividade económica especialmente das comunidades costeiras e, ao mesmo tempo, garante a valorización e o mantemento óptimo deses bens materiais ou inmateriais a conservar.

Con ese fin veñen traballando as institucións implicadas no proxecto PROAMARE, como é o caso de, ademais da Fundación CETMAR, a Deputación de Pontevedra, a Cámara Municipal de Caminha, a Fundaçao Gil Eannes e o CIM Alto Minho.

Os socios de TEAM-Miño instan a preservar o ecosistema do esteiro do río do impacto humano no peche do proxecto europeo

Por | Novedades | Ningún comentario

“Os niveis de contaminación química no esteiro do río Miño son en xeral baixos en comparanza con zonas veciñais de Galicia ou Portugal, o cal supón un incentivo para preservar este ecosistema do impacto humano”. Foi unha das conclusións dos traballos realizados no marco do proxecto europeo TEAM-Miño, que hoxe se deron a coñecer nun seminario no Centro Tecnolóxico do Mar, socio nesta iniciativa xunto a institucións galegas e lusas.

A apertura da xornada correu a cargo da directora-xerente da Fundación CETMAR, Paloma Rueda Crespo, quen estivo acompañada polo presidente de Augas de Galicia, Francisco Menéndez, e pola vicerreitora da Universidade de Vigo, Asunción Longo.

Tras varios relatorios científicos expuxéronse as conclusións do proxecto, que pretendía desenvolver ferramentas comúns para a implementación coordinada da Directiva Marco do Auga neste esteiro. Este proceso, afirmaron os expertos, vai especialmente atrasado en augas de transición, debido especialmente ás particularidades deste tipo de augas a medio camiño entre río e mar.

Despois de analizar en profundidade o caso da desembocadura do Miño, os socios de TEAM-Miño concluíron que a actual delimitación das catro masas de auga de transición definidas no esteiro internacional impiden a aplicación de niveis de referencia comúns a todas elas, xa que presentan características hidrográficas e ecolóxicas totalmente distintas.

Para resolver este problema, os expertos propoñen aplicar niveis de referencia típicos de esteiros con dominancia mariña á masa de auga mais externa; niveis de referencia de esteiros con dominancia fluvial á masa intermedia, e finalmente, niveis de referencia de eixes principais fluviais as dúas masas máis internas, que poden así ser fundidas nunha única. Finalmente, para a clasificación do estado ecolóxico destas masas de auga recoméndase empregar “información biolóxica rápida, sensible e ecoloxicamente relevante subministrada polas técnicas denominadas biomarcadores ou bioensaios”.

Coordinado pola Estación de Ciencias Mariñas de Toralla da Universidade de Vigo, no consorcio de TEAM-MIÑO participan xunto á FundaciónCETMARa Axencia Portuguesa do Ambiente; Augas de Galicia; o Centro de Monitorização e Interpretação Ambiental de Vila do Conde; o Centro Interdisciplinar de Investigação Marinha e Ambiental; a Confederación Hidrográfica Miño-Sil; o Instituto Español de Oceanografía; o Instituto Nacional dos Recursos Biolóxicos de Portugal; a  Mancomunidade de Municipios do Baixo Miño e a Universidade de Aveiro.

Ademais do traballo científico, o proxecto incluíu diferentes actividades de difusión a ambas marxes do esteiro do Miño para dar a coñecer a súa labor tanto ás administracións como ao público en xeral.

O Centro Tecnolóxico do Mar reúne a científicos de diferentes países no seminario final do proxecto europeo TEAM-Miño

Por | Novedades | Ningún comentario

O Centro Tecnolóxico do Mar será escenario o vindeiro venres 21 de xuño do seminario final do proxecto europeo TEAM-Miño, unha xornada na que participarán científicos de diferentes países e na que se darán a coñecer os principais resultados desta iniciativa.

Baixo o título de “Importancia das ferramentas biolóxicas na implementación da Directiva Marco do Auga”, o seminario dará comezo as dez da mañá nun acto coa participación da directora xerente da Fundación CETMAR, Paloma Rueda Crespo; do presidente de Augas de Galicia, Francisco Menéndez Iglesias; e do reitor da Universidade de Vigo, Salustiano Mato.

Ao longo da mañá sucederanse os relatorios sobre as devanditas ferramentas, para pechar a xornada coa presentación e debate sobre as principais conclusións do proxecto respecto a aplicación da Directiva Marco do Auga no esteiro do río Miño.

Coordinado pola Estación de Ciencias Mariñas de Toralla da Universidade de Vigo, no consorcio de TEAM-MIÑO participan xunto á FundaciónCETMARa Administração Regional Hidrográfica do Norte de Portugal; Augas de Galicia; o Centro de Monitorização e Interpretação Ambiental de Vila do Conde; o Centro Interdisciplinar de Investigação Marinha e Ambiental; a Confederación Hidrográfica Miño-Sil; o Instituto Español de Oceanografía; o Instituto Nacional dos Recursos Biolóxicos de Portugal; a  Mancomunidade de Municipios do Baixo Miño e a Universidade de Aveiro.

Desenvolver ferramentas comúns para a aplicación coordinada da Directiva Marco da Auga no estuario do Miño e potenciar a participación cidadá na xestión e conservación deste ecosistema acuático son os obxectivos xerais deste proxecto europeo, que busca a colaboración e implicación das administracións e da sociedade a ambas as beiras do río.

O observatorio RAIA presenta novas aplicacións de información e predición meteorolóxica e oceanográfica na marxe Ibérica

Por | Novedades | Ningún comentario

Dar resposta as necesidades de información meteorolóxica e oceanográfica na eurorexión Galicia-Norte de Portugal é xa posible gracias ao Observatorio RAIA, unha rede de observación e predición “das mais densas de Europa” cuxos responsables presentaron hoxe novos produtos destinados ao turismo e á náutica recreativa, nunha xornada no Centro Tecnolóxico do Mar.

Representantes destes sectores puideron coñecer algúns dos servizos para usuarios finais, como é o caso da aplicación para a predición en praias ou a que permite coñecer as condicións do mar cara a práctica do surf, información dispoñible xunto a outros parámetros en www.marnaraia.com.

A xornada foi inaugurada pola directora xerente do Centro Tecnolóxico do Mar, que traballa neste proxecto europeo xunto a outros organismos e institucións de Galicia e do Norte de Portugal. No acto de apertura, Paloma Rueda Crespo estivo acompañada polo presidente de Portos de Galicia, Juan José Duran, e polo representante do Patronato Rías Baixas, José Manuel Figueroa.

Todos eles coincidiron en resaltar a importancia que os servizos do Observatorio RAIA teñen para sectores de vital importancia na economía de Galicia, como é o caso do turismo ou da náutica recreativa, así como para outros profesionais vinculados ao mar. É o caso das miles de embarcacións en tránsito que cada ano pasan polas costas galegas, segundo recordou o presidente de Portos. “A información que aporta RAIA é importante para poder colaborar con eses navegantes”, afirmou.

O director de Meteogalicia e coordinador do proxecto RAIA.co, Vicente Pérez, interveu a continuación para afirmar que o Observatorio “é xa unha realidade para dar resposta as necesidades de información meteorolóxica e oceanográfica na marxe Ibérica”, isto a través dunha rede de observación e dun sistema de predición punteiro.

Recordou que toda a información –datos históricos e en tempo real dispoñibles cada dez minutos- pode ser consultada en www.marnaraia.com, onde tamén están os produtos para usuarios finais como o “Percegurú”, deseñado polo Intecmar, que predice as condicións do mar cara a extración do percebe. Ademais destas e das aplicacións presentadas hoxe, o consorcio RAIA segue a traballar en novos produtos como unha aplicación para a predición en rutas ou outra para o sector das enerxías renovables.

Xunto á Fundación CETMAR e Meteogalicia participan no proxecto RAIA.co (Observatorio Mariño da marxe Ibérica e do litoral) o Intecmar, o Instituto de Investigaciones Marinas-CSIC, o Instituto Español de Oceanografía, o Instituto Hidrográfico de Portugal e as universidades de Vigo, Aveiro e Porto. A iniciativa está financiada polo programa de Cooperación Transfronteiriza España-Portugal.

A Secretaría Xeral do Mar anuncia unha nova liña de axudas para promover a eficiencia enerxética na flota pesqueira de Galicia

Por | Novedades | Ningún comentario

A Consellería do Medio Rural e do Mar abrirá a curto prazo unha nova liña de axudas ao investimento para a mellora do rendemento enerxético dos buques de pesca galegos. Así o anunciou hoxe o secretario xeral do Mar, Juan Maneiro, durante o obradoiro que sobre eficiencia enerxética na flota pesqueira de Galicia celebrouse na sede do Centro Tecnolóxico do Mar en Vigo.

Acompañado por Paloma Rueda Crespo, directora-xerente da Fundación CETMAR, e por José Luís González Sérrano, subdirector xeral de Política Estructural do Ministerio de Agricultura, Alimentación y Medio Ambiente, o secretario xeral do Mar, Juan Maneiro,  recordou na apertura da xornada a importancia que o gasto enerxético ten na conta de resultados das empresas e a súa repercusión tanto no prezo final do produto como a nivel medioambiental.

Explicou tamén que o obxectivo da xornada era orientar ao sector cara a un maior e mellor aproveitamento destes mecanismos de apoio financeiro, dado que despois de tres convocatorias de axudas “o éxito obtido no financiamento de proxectos foi inferior ao crédito disposto”.

Técnicos da Consellería do Medio Rural e do Mar abordaron así ao longo de diferentes relatorios os detalles da orde de axudas e da avaliación técnica das mesmas. O obradoiro serviu ademais para identificar as oportunidades tecnolóxicas existentes no mercado para o sector pesqueiro mediante a presentación de experiencias empresariais concretas neste ámbito. Un debate coa participación dos asistentes pechou a xornada.

O CETMAR e os seus socios no Observatorio Raia poñen ao servizo do turismo a información oceanográfica e meteorolóxica

Por | Novedades | Ningún comentario

“A oceanografía operacional ao servicio do turismo e as actividades náuticas” é o título da xornada que, organizada no marco do proxecto europeo RAIA.co, terá lugar na sede do Centro Tecnolóxico do Mar en Vigo o vindeiro 13 de xuño a partires das dez da mañá.

Tanto a Fundación CETMAR como os seus socios nesta iniciativa, que está coordinada por Meteogalicia, pretenden dar a coñecer os produtos e servizos que para a observación e predición do océano pode por a disposición destes sectores o Observatorio RAIA, tanto en Galicia como no Norte de Portugal.

O consorcio RAIA.co pretende ademais detectar os principais intereses e necesidades existentes nos ámbitos do turismo e dos deportes náuticos no que se refire á información oceanográfica e meteorolóxica e, paralelamente, definir e identificar unha proposta de produtos e servizos que poidan satisfacer as demandas derivadas das actividades de ocio e disciplinas deportivas que se desenvolven na costa de Galicia.

Trala apertura da xornada por parte da directora-xerente do CETMAR, a mañá proseguirá con diferentes presentacións sobre o Observatorio RAIA e sobre os produtos e servizos de interese para os devanditos sectores, como pode ser o caso das aplicacións webs e móbiles para a predición de praias ou a información on-line das condicións do mar para a práctica do surf.

A asistencia ao seminario será gratuita mediante a inscrición en http://www.cetmar.org/seminarios/RaiaCo/

O proxecto RAIA.co (Observatorio Mariño da marxe Ibérica e do litoral) ten como principal obxectivo consolidar a oceanografía operacional na marxe ibérica e litoral da eurorexión Norte de Portugal-Galicia, elo mediante a posta en marcha dunha rede de observación e predición oceánica que produza información valiosa para os usuarios das costas.

Xunto á Fundación CETMAR e Meteogalicia participan neste proxecto, financiado polo programa de Cooperación Transfronteiriza España-Portugal, o Intecmar, o Instituto de Investigaciones Marinas-CSIC, o Instituto Español de Oceanografía, o Instituto Hidrográfico de Portugal e as universidades de Aveiro e Porto.

CETMAR e os seus os socios no proxecto OYSTERECOVER expoñen os avances e retos cara a recuperar a produción de ostra plana

Por | Novedades | Ningún comentario

O Centro Tecnolóxico do Mar e os seus socios no proxecto europeo Oysterecover veñen de facer público un informe sobre os avances na produción de semente de ostra plana (Ostrea edulis) en criadeiro que axudarán á recuperación deste recurso en Europa. O documento reflicte o estado actual da técnica, expón os avances acadados por diferentes proxectos recentemente desenvolvidos e traza as liñas de traballo identificadas como prioritarias para un futuro inmediato.

O informe fai referencia así aos recentes avances nos eidos do acondicionamento de reprodutores e no cultivo larvario, incluíndo nutrición larvaria e técnicas e protocolos de cultivo, ao tempo que se identifica a metamorfose e o asentamento coma un dos procesos máis problemáticos. Así, proporciónanse os rangos óptimos dos parámetros físicos máis relevantes (temperatura e fotoperiodo) e outras variables, como a cantidade e calidade do alimento subministrado aos reprodutores e as propias larvas, que proporcionan taxas de supervivencia, fixación e crecemento desexados. Tamén se expoñen os resultados dos experimentos levados a cabo con certos compostos químicos sobre a indución da fixación nas larvas de ostra plana.

Todos estes avances que, segundo se conclúe, deberán ser validados en distintas zonas xeográficas, poderían contribuír decisivamente a estabilización da produción de semente de ostra plana en criadeiro, necesaria para calquera iniciativa de recuperación do recurso. O devandito informe, que pode ser consultado no apartado de resultados da web do proxecto (http://oysterecover.eu/), é resultado dun obradoiro organizado en Holanda polo consorcio responsable do proxecto Oysterecover.

Representantes de sete países da Unión Europea, tanto da industria coma de organizacións ambientalistas e da administración, asistiron a este encontro, que se converteu así nun foro activo de discusión no que ademais se puxo de manifesto a relevancia que está a acadar actualmente o recurso a nivel internacional, non só dende un punto de vista comercial senón tamén ecolóxico.

Dende que se iniciaron os traballos de Oysterecover, a irregular dispoñibilidade de semente identificouse coma un dos principais atrancos para desenvolver estratexias de recuperación da produción. Poñer enriba da mesa os avances acadados nese senso era  o fin do obradoiro.

Destacados científicos do IFREMER francés e do Instituto de Acuicultura da Universidade de Santiago mostraron así os prometedores resultados obtidos no proxecto Settle, centrado no acondicionamento e asentamento como procesos clave para a produción de semente de ostra plana e vieira en criadeiro ao logo de todo o ano.

Liderado pola Fundación CETMAR e financiado polo Sétimo Programa Marco, en Oysterecover participan 15 organizacións de 6 países europeos. O obxectivo é contribuír á recuperación da produción deste recurso mediante a utilización de ferramentas biotecnolóxicas que permitan no futuro a obtención de estirpes resistentes a bonamiose.

Os investigadores presentan ao sector novas tecnoloxías para optimizar a xestión dos decartes nunha conferencia na Fundación CETMAR

Por | Novedades | Ningún comentario

Os responsables do proxecto FAROS presentaron esta mañá os resultados tecnolóxicos desta iniciativa europea nunha conferencia que tivo lugar na sede do Centro Tecnolóxico do Mar en Vigo e á que asistiu preto dun centenar de persoas, entre elas representantes do sector, da administración e doutras institucións de investigación.

A directora-xerente da Fundación CETMAR, Paloma Rueda Crespo, salientou na apertura da xornada os froitos dos tres anos de traballos levados a cabo no marco do proxecto FAROS cara a mellorar e optimizar a xestión dos descartes. Estes resultados, recordou, permitirán non só reducir os descartes identificando aquelas zonas de pesca onde a súa incidencia sexa menor, senón tamén contribuír a garantir o seu aproveitamento e valorización en terra.

Paloma Rueda Crespo estivo acompañada na inauguración da conferencia por Carmen González Sotelo, directora do Instituto de Investigaciones Marinas-CSIC, institución que coordina o proxecto; por Valentín Trujillo, director do Instituto Español de Oceanografía en Vigo, socio tamén en FAROS; e por Pascal Savouret, director da Agencia Comunitaria de Control de la Pesca.

A xornada serviu así para expor os resultados do proxecto por parte das entidades participantes no mesmo, entre elas as dúas empresas que colaboraron nesta iniciativa, Marexi e ASM SOFT S.L., e que fixeron posible os sistemas de visión artificial aplicada a buques pesqueiros e para a captura e xestión de información de lances de pesca.  A conferencia permitiu tamén coñecer a opinión de representantes do sector, da administración e das institucións de investigación sobre a problemática dos descartes.

Financiado pola Unión Europea a través do Programa Life, o proxecto FAROS (www.farosproject.eu) iniciouse en 2010 co fin de procurar un aproveitamento dos descartes mais sostible e eficiente coa implicación de todos os axentes do sector pesqueiro. Ademais da Fundación CETMAR participan nesta iniciativa os xa citados IIM-CSIC e o IEO; a Autoridade Portuaria de Vigo; o Instituto Portugués do Mar e da Atmosfera-IPMA e o Centro de Supercomputación de Galicia (CESGA). Colaboraron tamén no proxecto as empresas Marexi e ASM SOFT S.L.

As tecnoloxías aplicadas á xestión dos descartes centran a conferencia final do proxecto europeo FAROS organizada polo Centro Tecnolóxico do Mar

Por | Novedades | Ningún comentario

O Centro Tecnolóxico do Mar organiza a conferencia final do proxecto europeo FAROS, unha xornada sobre os descartes e as tecnoloxías que axudan a súa redución que se celebrará o vindeiro xoves 21 de marzo na sede da Fundación CETMAR en Vigo. Ademais de para afondar nesta iniciativa e nos seus resultados cara á xestión dos descartes, este evento servirá para coñecer como afrontan os axentes relacionados co sector pesqueiro esta problemática.

A directora xerente do CETMAR, Paloma Rueda Crespo, será a encargada de abrir a conferencia ás 09.45 horas nun acto no que estará acompañada polo director da Agencia Europea de Control de la Pesca, Pascal Savouret, e do Instituto Español de Oceanografía de Vigo, Valentín Trujillo. A continuación intervirán representantes de diferentes institucións e organizacións relacionadas e presentaranse os resultados do proxecto.

Financiado pola Unión Europea a través do Programa Life, e coordinado polo Instituto de Investigaciones Marinas-CSIC, o proxecto FAROS comezou a desenvolverse en xaneiro de 2010 co obxectivo de procurar un aproveitamento dos descartes mais sostible e eficiente coa implicación de todos os actores do sector pesqueiro.

Ademais da Fundación CETMAR, que ten nesta temática unha das súas principais liñas de traballo, participan nesta iniciativa o Instituto Español de Oceanografía, o Instituto de Investigaçao das Pescas e do Mar-IPIMAR de Portugal, o Centro de Supercomputación de Galicia (CESGA) e o xa mencionado IIM-CSIC.

O observatorio RAIA pon os seus produtos ao servizo das enerxías renovables mariñas e oceánicas nun seminario en Oporto

Por | Novedades | Ningún comentario

“A oceanografía operacional ao servicio das enerxías renovables mariñas e oceánicas” é o título do seminario que, organizado no marco do proxecto RAIA.co, terá lugar hoxe na cidade portuguesa de Oporto. O Centro Tecnolóxico do Mar–Fundación CETMAR participa nesta iniciativa da man doutras institucións de Galicia e do Norte de Portugal que veñen colaborando dende 2009 na creación e posta en marcha do Observatorio RAIA (www.marnaraia.com).

Nesta ocasión, o consorcio RAIA.co pretende presentar o observatorio e a oferta de produtos e servizos de información oceanográfica e meteorolóxica a representantes do sector das enerxías renovables mariñas tanto de Galicia como do Norte de Portugal, ámbito deste proxecto europeo financiado polo programa de Cooperación Transfronteiriza España-Portugal.

O seminario servirá ademais para detectar o interese e as necesidades do devandito sector no que ten que ver coa observación e a predición do océano e, finalmente, definir e identificar unha proposta de produtos e servizos que poidan satisfacer a demanda das enerxías renovables mariñas e oceánicas.

O proxecto RAIA.co iniciábase en xaneiro do 2011 como continuación dos traballos levados a cabo ata entón en RAIA. O seu principal obxectivo é consolidar a oceanografía operacional na marxe ibérica e litoral da eurorrexión Galicia-Norte de Portugal, elo a través da posta en marcha dunha rede de observación e predición oceánica transfronteiriza e a creación de oportunidades científicas e tecnolóxicas que estimulen a economía de diferentes actividades ligadas ao mar.

A información derivada da devandita rede será útil e valiosa non só para os usuarios da costa en xeral, senón tamén para todas aquelas iniciativas que teñen como obxectivo a explotación das enerxías mariñas, que poderán beneficiarse dos servizos e produtos que o Observatorio RAIA ofrecerá adaptados as súas necesidades.

Ademais do Centro Tecnolóxico do Mar-Fundación CETMAR participan nesta iniciativa a Consellería de Medio Ambiente, Territorio e Infraestruturas (Meteogalicia), que coordina o proxecto, e o Instituto Tecnolóxico para o Control do Medio Mariño de Galicia-INTECMAR, o Instituto Español de Oceanografía, o Instituto de Investigaciones Marinas-CSIC, o Instituto Hidrográfico de Portugal e as universidades de Oporto e Aveiro.