Marta González

O Centro Tecnolóxico do Mar e os seus socios no proxecto ACRUNET están a traballar na elaboración dunha norma de calidade para o boi de mar europeo que garanta a súa pesca responsable e faga deste un produto competitivo.

Trátase dunha das medidas que, para mellorar este sector en Europa, están a estudiar os membros do consorcio ACRUNET, quince institucións e entidades de Francia, Reino Unido, Irlanda, Portugal e España que mañá martes e o mércores reúnense na sede do CETMAR en Vigo na busca de novos acordos.

Sobre a base da conformación dunha rede dinámica coa participación de tódolos interlocutores do sector,  esta iniciativa financiada polo Programa Transnacional Espacio Atlántico pretende dar solución aos desafíos da distribución e comercialización do boi de mar, apostando pola innovación e incrementando a súa competitividade e rendibilidade a nivel europeo.

Os socios de ACRUNET traballan así na mellora do transporte deste produto mediante un programa de seguimento que permitirá identificar os puntos críticos deste proceso e as súas posibles solucións, así como nunha nova tecnoloxía para controlar o proceso da pesca mediante un etiquetado electrónico que evitará a perda de aparellos e permitirá controlar as capturas.

Coordinado por Bord lascaigh Mhara (BIM) de Irlanda, o proxecto ACRUNET iniciou a súa andaina en xullo de 2012 e dende entón e ata maio de 2015 os seus socios confían en contribuír á mellorar a competitividade deste sector e a aumentar a visibilidade do boi de mar no mercado  europeo.

Xunto ao CETMAR e ao BIM participan nesta iniciativa Killybegs Fishermen´s Organisation LTD; Seafish; FranceAgriMer; Marine Institute; Instituto Portugués do Mar e da Atmosfera; Comité National des Pêches Maritimes et des Elevages Marins; Bord Bia; Shellfish Association of Great Britain; Institut Français de Recherche pour l´Éxploitation de la Mer; Centre for Environmental, Fisheries and Aquaculture Sciencie (Cefas); National Federation of Fishermen´s Organisations  do Reino Unido; Scottish Fishermen´s Federation e Seafood Scotland.

A Universidade da Coruña, o Centro Tecnolóxico do Mar  e a Cooperativa de Armadores de Pesca do Porto de Vigo organizan o vindeiro 25 de outubro un foro sobre “O papel da empresa como actor de cooperación ao desenvolvemento do sector pesqueiro: o caso de Namibia”.

A xornada será inaugurada pola conselleira do Medio Rural e do Mar, Rosa Quíntana, e terá lugar na sede de ARVI no porto pesqueiro vigués. A súa organización enmárcase dentro do proxecto “Análises de coherencia de políticas no marco do sector pesqueiro empresarial e o desenvolvemento socioeconómico sostible. O caso de Namibia”.

Coordinado polo Instituto Universitario de Estudios Europeos da Universidade da Coruña, o devandito proxecto conta coa participación da Fundación CETMAR e da Cooperativa de Armadores de Vigo e está financiado pola Agencia Española de Cooperación Internacional para el Desarrollo (AECID).

O director xeral de Relacións Exteriores e coa Unión Europea, Jesús Gamallo Aller, acompañará á conselleira do Medio Rural e do Mar na apertura do foro, prevista para as 9.30 horas. A continuación terá ligar o primeiro relatorio previsto sobre a empresa como actor na cooperación ao desenvolvemento, no que participarán representantes da AECID, ARVI e Universidade da Coruña.

Está prevista tamén unha mesa redonda sobre novas perspectivas de colaboración público privada con representantes de Cooperación Galega, ARVI, FAO, Coordinadora Galega de ONGs e Universidade de Santiago. As conclusións da xornada correrán a cargo do doutor Enrique López Veiga.

A asistencia ao Foro é libre e os interesados poderán inscribirse a través do correo electrónico (mgonzalez@cetmar.org).

www.cetmar.org/seminarios/Programa Foro.pdf

O Centro Tecnolóxico do Mar reunirá en Bruxelas aos principais axentes implicados na pesca en Europa co obxectivo de presentarlles un prototipo dun innovador sistema de xestión pesqueira deseñado no marco do proxecto Ecofishman, financiado pola Unión Europea.

Representantes das administracións con competencias nesta materia (DG Mare, DG Environment, DG Research), científicos de diferentes institucións europeas, asociacións de profesionais da pesca e outros axentes interesados coñecerán así a terceira versión do prototipo deseñado polos socios de Ecofishman, durante un encontro que terá lugar os vindeiros días 15 e 16 de outubro.

As conclusións desas reunións serán tidas en conta para determinar a cuarta e definitiva versión do sistema de xestión pesqueira, que será presentado a comezos de 2014 xunto a unha guía para a súa implementación.

Trátase dun innovador sistema que terá en conta factores ecolóxicos, económicos, sociais e de gobernanza, baseado en resultados e deseñado en estreita colaboración cos axentes máis importantes da pesca en Europa, aos que lle outorgará un maior grado de participación.

EcoFishMan -Ecosystem-based Responsive Fisheries Management in Europe- é un proxecto financiado polo 7º Programa Marco que plantexa unha perspectiva innovadora na xestión das pesqueiras. A visión do proxecto é contribuir cun novo enfoque para a Política Pesquera Común (PPC) involucrando a todos as partes interesadas, administracións públicas, industria, consumidores, organizacións non gubernamentais, organismos consultivos, etc.

Xunto ao CETMAR participan nesta iniciativa Matis ohf.; IPIMAR;  MAPIX technologies Ltd.; Marine Scotland Science; Seafish; Eurofish; The Bitland Enterprise; University of Iceland; National Research Council / Institute of Marine Sciences; Nofima Marin; University of Tromsø; Centro de Ciências do Mar e a University of Aberdeen.

O Centro Tecnolóxico do Mar-Fundación CETMAR presentou esta mañá no XVI Foro dos Recursos Mariños e da Acuicultura das Rías Galegas os proxectos europeos OYSTERECOVER, cuxo obxectivo e procurar ferramentas que posibiliten a recuperación da produción da ostra plana en Europa, e PARASITE, que pretende mitigar o impacto en consumidores e industria dos parasitos que afectan aos produtos da pesca.

Rosa Fernández Otero, coordinadora da área de Promoción e Transferencia de Tecnoloxía e responsable destas iniciativas no CETMAR, foi a encargada de dar conta dos detalles de ambos proxectos e dos avances acadados ata o momento.

Tamén ao amparo do ForoAcui celebrouse a Xornada sobre criadeiros e semilleiros, sementeira e cultivo de moluscos bivalvos, unha iniciativa do Centro Tecnolóxico do Mar e da Consellería do Medio Rural e do Mar que acadou así a súa terceira edición.

A xornada, na que participaron expertos de diferentes países do mundo e representantes da administración e de empresas relacionadas con este ámbito, serviu para facer unha posta en común sobre a situación deste sector, os problemas actuais e as melloras conseguidas para optimizar o seu desenvolvemento.

Os socios do proxecto OYSTERECOVER, que coordina o Centro Tecnolóxico do Mar-Fundación CETMAR xunto ao Centro de Investigacións Mariñas –CIMA-, presentaron hoxe os resultados de tres anos de traballo na busca de ferramentas que permitan a recuperación da produción de ostra plana en Europa.

Nun taller que tivo lugar na sede do CETMAR, os expertos presentaron os avances para implementar no futuro a selección xenética baseada en estirpes resistentes a bonamiose como unha das estratexias mais favorable na loita contra ese parasito -principal responsable da mortaldade da ostra- posibilitando así a recuperación desta actividade produtiva en Galicia e en Europa.

Na apertura da xornada, á que asistiu o secretario xeral de Mar, Juan Maneiro,  a directora-xerente do CETMAR, Paloma Rueda Crespo, afirmou que os resultados obtidos no marco do proxecto OYSTERECOVER permiten ser optimistas, ao alcanzarse os obxectivos propostos polos seus socios en canto a métodos de detección da bonamiose ou protocolos para a selección xenética, entre outros aspectos abordados.

Das principais ferramentas obtidas no proxecto e da súa aplicación en futuros programas de selección xenética falaron Antonio Villalba, investigador do CIMA, e Belén Gómez, do grupo AQUIGEN da Universidade de Santiago de Compostela.

Por parte do Centro Tecnolóxico do Mar interveu ademais Rosa Fernández, coordinadora da área de Promoción e Transferencia de Tecnoloxía, quen asegurou que este proxecto ven a demostrar que a implicación neste tipo de iniciativas europeas de sectores con pequenas empresas é posible “e con resultados exitosos”.

Financiado pola Unión Europea, no OYSTERECOVER tomaron parte como socios a Confraría de Noia e a empresa José María Daporta Leiro e Hijos S.L., ademais de Agrocampus Ouest; Atlantic Shellfish Ltd,; Centre for Environment, Fisheries & Aquaculture Science, CEFAS; Clew Bay Marine Forum Ltd.; Clew Bay Oyster Co-operative Society Limited; Den Erhvervsdrivende Fond Dansk Skaldyrcenter; Nederlandse Oestervereniging; Comité Régionale de la Conchyliculture Bretagne-Nord; Universidade de Santiago de Compostela; University College Cork, National University of Ireland, e Wageningen IMARES.

O Centro Tecnolóxico do Mar-Fundación CETMAR e o Goberno de Chile están a deseñar unha estratexia de colaboración  en materia de formación en xestión pesqueira. Unha delegación da Subsecretaría de Pesca e Acuicultura chilena encabezada polo seu máximo responsable, Pablo Galilea Carrillo, visitou a sede da institución en Vigo para coñecer o traballo que os seus técnicos veñen desempeñando neste e neutros ámbitos.

Tras unha reunión coa directora-xerente, Paloma Rueda Crespo,  e responsables das diferentes áreas de traballo para coñecer o funcionamento do CETMAR, ambas partes quedaron citadas a un novo encontro no que deseñar unha estratexia de colaboración cara á capacitación dos técnicos e das comunidades costeiras daquel país en materia de xestión pesqueira, facendo fincapé na habilitación dos servicios de extensión.

A primeira reunión terá lugar a vindeira semana e o primeiro obxectivo é organizar unha misión de capacitación de técnicos chilenos en Galicia no mes de marzo, misión que tería continuidade en Chile co posterior desprazamento dos formadores galegos a ese país.

O Centro Tecnolóxico do Mar e os seus socios no proxecto OYSTERECOVER darán conta dos valiosos resultados desta iniciativa cara a recuperación da produción da ostra plana europea no transcurso dun taller que terá lugar o vindeiro 10 de outubro na sede da Fundación CETMAR en Vigo.

A xornada ten como obxectivo facer partícipes aos produtores de ostra e a outros interesados do valor e a importancia dos resultados obtidos polo consorcio OYSTERECOVER despois de tres anos de traballo, resultados que permiten que a recuperación dos bancos de ostra plana sexa unha realidade mais próxima.

No transcurso do taller, que será inaugurado polo secretario xeral do Mar, Juan Maneiro, e pola directora-xerente do CETMAR, Paloma Rueda Crespo, os coordinadores do proxecto e outros expertos falarán das ferramentas obtidas no marco desta iniciativa para a selección xenética das ostras, así como sobre a xestión sostible dos bancos naturais e as posibilidades de recuperación desta actividade.

Ademais do Centro Tecnolóxico do Mar, que lidera o proxecto xunto ao Centro de Investigacións Mariñas (CIMA) –coordinador científico- participan no OYSTERECOVER  como socios Agrocampus Ouest Atlantic Shellfish Ltd, ASL; Centre for Environment, Fisheries & Aquaculture Science, CEFAS; Clew Bay Marine Forum Ltd. CBMF; Clew Bay Oyster Co-operative Society Limited, CBOC; Confraría de Pescadores San Bartolomé de Noia; Den Erhvervsdrivende Fond Dansk Skaldyrcenter, DSC; José María Daporta Leiro e Hijos S.L.; Nederlandse Oestervereniging, NEDOYS; Comité Régionale de la Conchyliculture Bretagne-Nord; Universidade de Santiago de Compostela, USC; University College Cork, National University of Ireland, UCC, e Wageningen IMARES.

A reunión final do proxecto terá lugar os días 8 e 9 de outubro, tamén no CETMAR, pero só para os membros do consorcio. A xornada do día 10 é pública, polo que os interesados poderán inscribirse a través da páxina web do proxecto www.oysterecover.eu (apartado de Noticias).

O Centro Tecnolóxico do Mar-Fundación CETMAR avanzou hoxe os resultados do proxecto SENSOQIM,  no que ven traballando dende 2010 da man das universidades de Vigo e Santiago cara a mellorar  o estudio de determinadas especies pesqueiras conxeladas.

Con este fin foi presentado ao sector un adianto da Guía SENSOQIM, unha guía sensorial para materias primas conxeladas cuxos limiares de calidade non están contempladas actualmente no marco lexislativo. Este documento, que servirá de referencia aos distintos axentes implicados na cadea de valor destes produtos, estará dispoñible a finais de marzo.

Julio Maroto, coordinador da área de Tecnoloxía dos Produtos Pesqueiros do CETMAR, foi o encargado de presentar o proxecto durante un seminario no que se falou da calidade dos produtos pesqueiros conxelados e refrixerados e sobre a súa avaliación.

Os responsables de SENSOQIM entenden que os resultados do seu traballo poderán servir de axuda, no que a cuestións de calidade se refire, cara a fortalecer os intercambios comerciais, cubrindo así as carencias do marco normativo vixente, que non contempla moitas especies de importancia comercial capturadas por buques conxeladores.

Financiado pola Xunta de Galicia a través do Programa Sectorial de Investigación Aplicada, no proxecto SENSOQIM colaboran, ademais do Centro Tecnolóxico do Mar, o departamento de Enxeñería Química da Universidade de Vigo e as facultades de Veterinaria (Campus de Lugo) e Farmacia da Universidade de Santiago.

O Goberno de Namibia deu o seu visto bo a execución técnica e financeira dos proxectos que o Centro Tecnolóxico do Mar-Fundación CETMAR está desenvolvendo no país africano.

Trátase do proxecto NATMIRc para o fortalecemento das capacidades do Centro Nacional de Información e Investigación Mariña de Namibia, que se prolongará ata o 2014, e do proxecto CIAC “Caprivi Inland Aquaculture Centre” (2011-2015), que ten como obxectivo contribuír á mellora da seguridade alimentaria a través do reforzo da acuicultura.

A directora do CETMAR e técnicos da área de Cooperación Internacional asisten estes días en Windhoek ás reunións dos comités de seguimento destas iniciativas, que a institución galega executa por encargo do Ministerio de Pesca e Recursos Mariños namibio, e con financiamento da Agencia Española de Cooperación Internacional al Desarrollo (AECID).

No caso do NATMIRc recoñeceuse o impacto das actividades de asistencia técnica e capacitación dos técnicos e expresouse o desexo conxunto de fortalecer a cooperación existente.

No que se refire ao proxecto CIAC, informouse do inicio da construción no Noroeste de Namibia dun novo centro de produción de alevíns que abastecerá  á poboación cara o seu consumo e comercialización. Así mesmo, resaltouse o éxito do curso piloto de formación técnica en acuicultura posto en marcha pola Universidade e o Goberno namibios co apoio de técnicos de formación da Xunta de Galicia e da Fundación CETMAR. Esta actividade, que finaliza en outubro tras a formación de 12 técnicos do Ministerio de Pesca e de granxas de acuicultura privadas a pequena escala, terá continuidade en 2014.

A directora e as técnicas do Centro Tecnolóxico do Mar permanecerán ata finais de mes en Namibia. A axenda prevista inclúe, entre outras, visitas a Katima Mulilo, capital de Caprivi, onde está prevista a construción do centro de alevíns, e tamén ao instituto KIFI, onde se desenvolve o curso de capacitación dos técnicos namibios.

A sala de conferencias do Centro Tecnolóxico do Mar-Fundación CETMAR acollerá o vindeiro 24 de setembro un seminario sobre a calidade dos produtos pesqueiros conxelados que concluirá coa presentación de resultados do proxecto SENSOQIM “Establecemento de umbrais de calidade para especies obxectivo pesqueiro non contempladas no marco lexislativo”.

A xornada estará dividida en dúas partes. A primeira, que dará comezo ás 09,45 horas, contempla dous relatorios sobre os cambios postmorten e o seu efecto na calidade de produtos pesqueiros refrixerados e conxelados e sobre a avaliación de calidade en produtos da pesca conxelados, e mais concretamente sobre o sistema QIM.

Na segunda parte do seminario, prevista ás 11,45 horas, terán lugar tres intervencións relacionadas cos resultados do proxecto SENSOQIM. En primeiro lugar falará Julio Maroto, coordinador da área de Tecnoloxía dos Produtos Pesqueiros do CETMAR e responsable desta iniciativa, quen dará conta das razóns e do alcance de SENSOQIM, entre outros aspectos.

Expertos das universidades de Vigo e Santiago falarán a continuación do desenvolvemento e aplicación dun método sensorial específico (QIM) e parámetros químicos relacionados para especies pesqueiras conxeladas. O seminario rematará cunha nova intervención de Julio Maroto, que presentará a Guía SENSOQIM.

http://www.cetmar.org/seminarios/Sensoqim/Programa.pdf