Novidades

Out 27
0

Proxecto ESPARDE

By | Novidades | No Comments

CETMAR e representantes das frotas artesanais do norte de Galicia analizan en Burela os efectos das medidas de conservación e planificación mariña no sector

  • Xunto á Universidade de Oviedo e ao IEO-CSIC, o Centro Tecnolóxico do Mar abre un espazo para o diálogo nunha  primeira reunión de traballo do caso piloto de Galicia  desenvolta no marco do proxecto ESPARDE

Representantes do sector pesqueiro e das entidades implicadas no proxecto ESPARDE –Efectos do desprazamento espacial das flotas de pesca artesanal e costeira resultantes da conservación e planificación mariña– reuníronse hoxe na sede da Organización de Produtores Pesqueiros de Lugo, en Burela, coa finalidade de iniciar un diálogo sobre os efectos das medidas de conservación e de planificación mariña nas frotas artesanais do norte de Galicia.

Esta sesión organizada polo Centro Tecnolóxico do Mar, dependente da Consellería do Mar, serviu para establecer as bases dunha colaboración continuada entre investigadores e sector. A este primeiro encontro formal do caso piloto de Galicia asistiron, ademais de varios socios do proxecto, o presidente da Federación Provincial de Confrarías de Lugo, Basilio Otero; o xerente da OPP de Burela, Sergio López, e representantes da pesca de arrastre e de cerco.

Tras a benvida e a contextualización da situación actual da pesca en Galicia por parte de Jose L. Santiago, coordinador da área de Socioeconomía da Pesca do CETMAR, Laura García de la Fuente, coordinadora de ESPARDE e investigadora de Economía Aplicada na Universidade de Oviedo, presentou o proxecto e o seu alcance, con tres casos piloto: en Asturias, Cantabria e Galicia. De seguido,  Marta Ballesteros, científica titular do IEO-CSIC, sentou as bases da colaboración entre investigadores e sector, describindo o caso concreto de Galicia e iniciando unha conversa na que se puxeron de relevo as necesidades dos pescadores e armadores presentes.

O caso piloto galego de ESPARDE cobre a demarcación noratlántica, onde se estudarán os impactos derivados da coexistencia de Ecosistemas Mariños Vulnerables (EMV) e de usos formulados no plan de Ordenación do Espazo Marítimo. Entre outros temas falouse das prioridades e preocupacións das frotas afectadas nesta área. Dado que na zona de estudo de Galiza inclúense varias zonas con potencial para a enerxía eólica mariña (NOR2, NOR3 e NOR4) fíxose fincapé nelas.

Tendo en conta este contexto, CETMAR e os seus socios puxeron o foco no potencial de ESPARDE para xerar evidencias aplicables ás necesidades do sector e responder así á súa realidade operativa e socioeconómica. Incidieron na importancia de que o sector colabore activamente con datos e información de primeira man, que permitirá predicir escenarios a curto e medio prazo e, como consecuencia, mellorar a análise, a avaliación e a xestión dos efectos de posibles desprazamentos e restricións espaciais.

Os representantes do sector, pola súa parte, puxeron sobre a mesa os principais problemas que afrontan na actualidade, como o custo do carburante, as vedas temporais ou permanentes ou o futuro da eólica mariña, entre outros.

Destacaron tamén que os desprazamentos das frotas galegas son moi variables, dado que un barco pode estar en menos de 24 horas nun sitio completamente diferente, polo que de conseguir medir os impactos socioeconómicos dos desprazamentos, poranse sobre as mesas das administracións realidades con datos alén do número de desembarcos (tempos, produtividade, concentración de barcos nunha zona, etc.) e tomaranse decisións informadas con menos impacto no sector.

Ao remate da reunión acordouse celebrar outros encontros para recoller datos, falar dos avances do proxecto ESPARDE -que cualificaron de ambicioso e esperanzador- e propor medidas de xestión adecuadas.

Proxecto ESPARDE

Enmarcado no Programa Pleamar 2025, o proxecto ESPARDE analiza como as medidas de protección e ordenación do medio mariño inflúen nos desprazamentos da pesca artesanal e costeira no Cantábrico, así como na sostibilidade das comunidades pesqueiras. O seu obxectivo é comprender mellor os efectos sociais, económicos e ambientais derivados da reubicación das flotas de pequena escala como consecuencia das restricións espaciais nos caladoiros.

ESPARDE pon o foco en embarcacións con porto base en Galicia, Asturias e Cantabria, especialmente naquelas que operan en zonas suxeitas a limitacións actuais ou futuras. A iniciativa aborda un dos principais retos da política pesqueira actual: como as medidas de conservación modifican os patróns de pesca e condicionan a actividade das flotas artesanais.

Out 21
0

Cooperación ao servizo da conservación mariña

By | Novidades | No Comments

CETMAR coordina, no marco do proxecto REDUCE, unha formación internacional en Senegal para reducir a captura accidental de megafauna mariña ameazada

  • A fundación dependente da Consellería do Mar está a liderar un taller que reúne en Dakar a unha trintena de especialistas de 12 países africanos para mellorar a vixilancia e a mitigación destas capturas nas pesqueiras da rexión

O Centro Tecnolóxico do Mar-Fundación CETMAR está a organizar e coordinar o desenvolvemento dun taller internacional destinado a fortalecer as capacidades técnicas e científicas dos profesionais de África na prevención e redución da captura accidental de megafauna mariña ameazada e protexida.

A actividade, que ten lugar esta semana na sede do Instituto Cervantes en Dakar, está organizada en colaboración coa Secretaría General de Pesca do Ministerio de Agricultura, Pesca y Alimentación de España e co apoio da Embaixada española, e forma parte do proxecto europeo REDUCE, coordinado pola Universidade de Barcelona, ​​e do que o CETMAR é socio.

Co título Reducing marine megafauna bycatch in Northwestern African fisheries: advancing monitoring, mitigation and sustainability,  o taller reúne a unha trintena de profesionais de 12 países costeiros de África Central e Noroccidental. Entre os participantes inclúense expertos en pesca, especialistas en medio mariño, persoal de administracións pesqueiras, centros de investigación, universidades e organizacións non gobernamentais.

Como coordinador desta actividade, CETMAR contribuíu ao deseño e desenvolvemento do contido da formación e ao fomento da participación dos países da rexión. O seu traballo lévase a cabo en colaboración coas institucións que participan en REDUCE, un proxecto europeo financiado polo programa Horizonte Europa, que reúne a entidades científicas e organizacións especializadas para avanzar na redución das capturas accesorias de especies mariñas protexidas nas pesqueiras do Atlántico centro-oriental.

O programa combina sesións teóricas e prácticas impartidas por especialistas de renome internacional. O contido abarca temas como a gobernanza pesqueira, a monitorización electrónica da actividade pesqueira, a conservación da biodiversidade mariña, a avaliación do impacto da pesca nas especies protexidas e as medidas para previr e mitigar as capturas accesorias.

O obxectivo é mellorar a capacidade dos profesionais participantes para identificar, monitorizar e reducir as capturas accesorias de megafauna mariña, unha das principais ameazas para grupos de especies protexidas como cetáceos, aves mariñas, tartarugas e tiburóns.

Cooperación internacional ao servizo da conservación mariña

A celebración deste taller fortalece a colaboración entre institucións científicas, administracións pesqueiras e organizacións especializadas de Europa e África. Tamén destaca a importancia da cooperación internacional e o intercambio de coñecementos no desenvolvemento de solucións que concilien a actividade pesqueira coa conservación da biodiversidade mariña.

A iniciativa tamén está integrada nas accións do proxecto REDUCE (Redución das capturas accesorias de megafauna ameazada no Atlántico Centro-Oriental), que ten como obxectivo mellorar o coñecemento científico, as capacidades de seguimento e as medidas de mitigación das capturas accesorias de megafauna mariña ameazada nas augas do Atlántico Centro-Oriental.

Xunto a CETMAR, colabora nesta actividade o Instituto de Investigacións Mariñas-CSIC e a Universidade de Santiago de Compostela como socios de REDUCE, ademais da Universidade de Barcelona, BirdLife International, o Centro Interdisciplinar de Investigação Marinha e Ambiental da Universidade do Porto e o Partenariat Régional pour la Conservation de la zone côtière et Marine (PRCM).

Out 07
0

Cooperación con Perú

By | Novidades | No Comments

CETMAR regresa a Sechura para traballar xunto ao Goberno de Perú por unha pesca artesanal e unha acuicultura máis rendible e respectuosa co medio mariño

  • Un convenio de colaboración coa Consellería de Presidencia, Xustiza e Deportes da Xunta de Galicia propicia este novo proxecto, que da continuidade ás actividades de fortalecemento de ambos sectores executadas no marco do anterior proxecto Mar de Piura

O Centro Tecnolóxico do Mar, dependente da Consellería do Mar, e o Ministerio de la Producción de Perú retoman a súa colaboración coa posta en marcha do proxecto “Fomento da Economía Azul Sechurana a través dun crecemento resiliente, competitivo e sostible do sector pesqueiro e acuícola da Baia de Sechura” (Sechura Azul).

Esta intervención ten como obxectivo principal contribuír á sostibilidade ambiental e produtiva dos medios de vida e das comunidades do sector acuícola e pesqueiro artesanal na Baía de Sechura (Piura, Perú).  Para a consecución deste obxectivo, CETMAR contara co apoio do Goberno peruano a través de diferentes institucións vinculadas ao sector.

Sechura Azul céntrase en facer que a pesca artesanal e a acuicultura en Sechura sexan máis rendibles e respectuosas co medio ambiente, promovendo a igualdade e outorgando ás mulleres un papel protagonista na xestión dos recursos hidrobiolóxicos para mellorar os seus ingresos familiares. A estratexia do proxecto, financiada pola Xunta de Galicia a través de Cooperación Galega, estrutúrase arredor de tres resultados clave.

En primeiro lugar, buscará mellorar a sostibilidade ambiental, a produtividade e a capacidade de xestión das explotacións acuícolas de cuncha de abanico na Baía de Sechura. Para iso, traballarase na optimización da produción de semente do bivalvo, garantindo unha calidade e cantidade suficientes, así como na monitorización de parámetros oceanográficos que melloren o cultivo deste molusco no seu medio natural, creando protocolos de mostraxe e sistemas de alerta precoz das condicións ambientais.

En segundo lugar, o proxecto centrarase nas asociacións de comercialización de produtos pesqueiros artesanais lideradas por mulleres. Neste sentido, organizaranse sesións de formación co apoio de asociacións previamente formadas noutras accións desenvolvidas por CETMAR na zona, como ACUIPESCA, VerTyCe e MARdePiura.

Para acadar este segundo resultado, transferirase coñecemento entre as asociacións, fortaleceranse as capacidades e afondarase na incorporación dunha perspectiva feminista nas normas operativas e de traballo para mellorar a trazabilidade dos seus produtos, xerando así unha maior confianza entre os potenciais compradores.

Finalmente, o terceiro resultado esperado é o fortalecemento institucional para mellorar a gobernanza dos recursos pesqueiros e acuícolas no norte do Perú. As accións previstas neste ámbito están dirixidas ao persoal técnico do Ministerio de la Producción, como as Direccións Xerais de Pesca e Acuicultura, o Fondo Nacional de Desarrollo Pesquero (FONDEPES) e o Instituto del Mar de Perú (IMARPE). Para iso, o proxecto inclúe intercambios técnicos entre Galicia e Perú para fomentar a coordinación interinstitucional e facilitar o desenvolvemento dunha estratexia de traballo que mellore as directrices aplicables á acuicultura e á pesca artesanal.

Primeiros pasos

A intervención proposta para este ano baséase en necesidades previamente identificadas a través de proxectos anteriores implementados por CETMAR na zona e céntrase na mellora da rendibilidade e sustentabilidade das cadeas de valor da pesca artesanal e da acuicultura cunha perspectiva feminista.

Así, está prevista unha sesión inicial de formación para as traballadoras e traballadores das Organizacións Sociais de Pescadores Artesanais (OSPAS), que comezará en outubro. Para este fin, CETMAR enviará dous expertos internacionais que impartirán formación teórica e práctica especializada na mellora da produtividade da cría de cuncha de abanico e participarán no deseño dun plan de seguimento e vixilancia das actividades de acuicultura.

Cuncha de abanico

Esta formación ten como obxectivo fortalecer as capacidades das OSPAS nun escenario climático exacerbado polos impactos previstos de El Niño na costa peruana nos próximos anos. Esta iniciativa terá un impacto positivo na resiliencia destas organizacións ante tales eventos climáticos, o que levará a unha mellor resposta preventiva e un plan de recuperación para a cría de cuncha de abanico, unha vez que se restablezan as condicións normais na baía.

Out 02
0

Economía azul

By | Novidades | No Comments

A Xunta expón en Barcelona a súa Estratexia de Economía Azul como modelo sostible que conecta o coñecemento co territorio

  • A secretaria xeral técnica da Consellería do Mar, Marta Barreiro, e a directora de CETMAR, Rosa Chapela, participaron na xornada europea O impulso da economía azul en Europa: estratexias e resultados
  • A folla de ruta galega conta con máis de 114 millóns de euros e 40 accións estratéxicas, apoiándose na Oficina Técnica xestionada por CETMAR e en ferramentas como os GALP e o Plan de Cultura Marítima

A secretaria xeral técnica da Consellería do Mar, Marta Barreiro, e a directora-xerente de CETMAR, Rosa Chapela, participaron en Barcelona na mesa redonda Estratexias rexionais de Economía Azul’, dentro da xornada europea O impulso da economía azul en Europa: estratexias e resultados, celebrada no Parque de Investigación Biomédica.

Durante este foro, Barreiro debullou as liñas mestras da Estratexia de Economía Azul de Galicia 2024-2027, un instrumento transversal dotado con máis de 114 millóns de euros e 40 accións estratéxicas que involucra a 20 entidades para avanzar cara a un modelo de crecemento marítimo baseado na sustentabilidade ambiental, na protección da biodiversidade e na innovación tecnolóxica.

Durante a súa intervención, a representante autonómica salientou que Galicia non parte de cero, senón dunha realidade marítima consolidada e diversa que abrangue a pesca, o marisqueo, a acuicultura, a transformación mar-industria, a loxística portuaria, o turismo e o patrimonio costeiro. Marta Barreiro subliñou que “o verdadeiro reto da economía azul non consiste en engadir novas actividades sen máis, senón en conectar mellor o tecido que xa temos, facelo máis sostible e competitivo e preparalo para o futuro».

A secretaria xeral técnica incidiu na gobernanza da estratexia canalizada a través dun Consello Rector multidepartamental e da Oficina Técnica operada polo Centro Tecnolóxico do Mar (CETMAR) para monitorizar indicadores e avaliar resultados continuos. Ademais, remarcou a importancia de que a planificación estratéxica chegue de forma efectiva ás vilas costeiras mediante instrumentos con arraigo local.

Neste eido, puxo como exemplos o Plan de Cultura Marítima de Galicia Horizonte 2030 -desenvolvido coa Universidade da Coruña- e o papel dos Grupos de Acción Local do Sector Pesqueiro (GALP), que levan mobilizados 322 proxectos cun investimento superior aos 45 millóns de euros para xerar emprego, diversificación e dinamización socioeconómica. «A economía azul non se constrúe unicamente mirando cara ao mar, senón desde os propios territorios e comunidades que viven del», concluíu.

Por outra banda, no bloque dedicado aos impactos indirectos e ao valor territorial da economía azul, a directora-xerente de CETMAR, Rosa Chapela, interviu para falar dese impacto nos territorios e rexións de Galicia. Máis alá das repercusións directas no PIB, na pesca e na produción, a máxima responsable do Centro Tecnolóxico do Mar, dependente da Consellería do Mar, destacou a importancia de calcular o que non se reflicte habitualmente nas cifras de produción, como o valor que xera no territorio, a súa resiliencia, a interconexión destas actividades principais con outras e o impacto indirecto ou inducido da economía azul nas rexións galegas.

Dado que non existen indicadores que cuantifiquen estes datos, Rosa Chapela esbozou exemplos de metodoloxías e seguimento que está a implementar a Consellería do Mar a través do impacto territorial e socioeconómico dos proxectos dos Grupos de Acción Local Pesqueiros (GALP), as táboas de entrada-saída da pesca e a industria conserveira en Galicia -que tamén cuantifican os impactos indirectos- e a valoración económica de sectores esenciais nas áreas mariñas de Galicia a través do MARPLAN.

Set 14
0

Cooperación e transferencia de coñecemento

By | Novidades | No Comments

CETMAR e FAO unen forzas para mellorar a seguranza das embarcacións de pesca artesanal en São Tomé e Príncipe

  • O Centro Tecnolóxico do Mar lidera unhas xornadas técnicas para avaliar a estabilidade e seguridade na navegación de dous prototipos de embarcacións construídos en estaleiros locais
  • A acción enmárcase no programa FISH4ACP, que promove o desenvolvemento sostible das cadeas de valor da pesca e da acuicultura en África, Caribe e Pacífico

O Centro Tecnolóxico do Mar-Fundación CETMAR pon en marcha esta semana as últimas probas dun proxecto moi especial: renovar e facer moito máis segura a navegación dos pequenos barcos da pesca artesanal  en São Tomé e Príncipe. Con este paso, CETMAR contribúe a protexer a vida dos mariñeiros locais no seu día a día no mar.

A actividade céntrase na avaliación da estabilidade e seguridade na navegación dos dous prototipos de embarcacións de pesca artesanal de arredor de 6 metros que foron construídas en materiais diferenciados: un en contrachapado mariño e outro en fibra de vidro.

Construídas nos estaleiros locais con apoio formativo de dous expertos en carpintería naval e composites  de CETMAR, estas embarcacións serán sometidas a unha axenda de tres días de ensaios rigorosos no mar para comparar a súa estabilidade e o seu rendemento técnico e operativo.

Durante estas xornadas, o equipo técnico de Cetmar, conformado por un técnico e un enxeñeiro naval e oceánico, xunto con pescadores e representantes do socio local, a ONG MARAPA, realizarán as probas regulamentarias de acordo á lexislación internacional de estabilidade e navegabilidade. O obxectivo é garantir a máxima seguridade dos pescadores artesanais ante condicións de carga extrema ou manobras críticas coas artes de pesca.

O procedemento técnico supervisado polo enxeñeiro naval e oceánico desprazado a terreo polo CETMAR,  divídese en dúas etapas fundamentais. Por unha banda, a proba de estabilidade e inclinación en seco, mediante a que se pretende determinar con exactitude o centro de gravidade da embarcación. Para iso, realizarase a simulación da embarcación totalmente cargada, distribuíndo pesos calibrados sobre a cuberta.

A segunda das probas é a mar ou navegación activa, cando a embarcación sae a navegar en mar aberto executando distintas manobras para avaliar a súa estabilidade dinámica e o comportamento do casco cargado.

Os resultados destas avaliacións servirán para validar os prototipos e introducir, se fose necesario, melloras no seu deseño, contribuíndo así á modernización progresiva da frota artesanal do país e ao reforzo da seguridade das persoas que desenvolven a súa actividade no mar.

Ademais da mellora das embarcacións, esta iniciativa contribúe á transferencia de coñecemento técnico aos estaleiros locais e ao fortalecemento das capacidades nacionais para a construción e mantemento de embarcacións máis seguras, eficientes e adaptadas ás necesidades do sector.

O programa FISH4ACP, no que se enmarca esta actuación, está financiado pola Unión Europea e polo Ministerio Federal de Cooperación Económica e Desenvolvemento de Alemaña (BMZ) e é executado pola FAO en colaboración con socios nacionais e internacionais.

Set 14
0

Aprender facendo

By | Novidades | No Comments

A Aixola inicia un novo ciclo de cursos con seis formacións vinculadas ao ámbito marítimo-pesqueiro

  • O centro de formación impartirá nos vindeiros meses e de forma gratuíta máis de 1.300 horas lectivas e ofertará 72 prazas en diferentes modalidades formativas

O Centro de Formación A Aixola, dependente da Consellería do Mar e xestionado polo Centro Tecnolóxico do Mar-Fundación CETMAR, pon en marcha un novo ciclo de cursos que se desenvolverán ata o vindeiro mes de decembro.

Trátase de seis actividades formativas cun eminente carácter práctico, seguindo o principio de «aprender facendo», e para as que non se requiren cualificacións mínimas. A formación, financiada pola Consellería do Mar e polos fondos FEMPA (Fondo Europeo Marítimo, de Pesca e Acuicultura), é totalmente gratuíta.

Os cursos están dirixidos a persoas desempregadas ou vinculadas ao sector pesqueiro que desexen reorientar o seu perfil profesional ou garantir o relevo xeracional nun oficio altamente especializado e en risco de desaparición, pero con demanda nas confrarías e nas empresas do sector marítimo-pesqueiro.

A oferta para este trimestre inclúe un curso de operacións auxiliares de acondicionamento interior de embarcacións (tapicería e madeira) de 350 horas, no que se empregarán técnicas tradicionais e innovadoras, e outro de operacións auxiliares de arboradura (mastros e velas) de 200 horas, destinado ao coñecemento e a práctica en montar e desmontar diversos compoñentes da arboradura náutica, o seu mantemento así como operacións básicas de reparación de velas.

A nova programación de A Aixola contempla ademais a introdución a unha das técnicas máis novidosas para a creación de pezas en poliéster no curso de operacións básicas de infusión e baleiro en composites, de 300 horas, orientado ao sector náutico e á acuicultura, e outro sobre procesos básicos de plásticos técnicos aplicados ao sector mariño (200 horas).

As formacións sobre actividades auxiliares en diagnose e posta a punto de fora borda menores de 30 CV (220 horas) e a introdución á carpintería náutica con control numérico (CNC) (70 horas) completan a oferta para os próximos tres meses.

As prazas son limitadas e a inscrición xa é posible a través da páxina web do centro  (aixola.cetmar.org) ou contactando vía correo electrónico (aixola@cetmar.org) ou telefónica (886 206915).

Na actualidade,  A Aixola é o único centro acreditado que imparte esta formación.

Ago 28
0

Intercambio sobre a recolección de algas

By | Novidades | No Comments

CETMAR organiza un novo intercambio de experiencias entre persoal técnico de República Dominicana, Costa Rica e Galicia centrado na recollida do sargazo

  • O obxectivo da actividade, enmarcada no proxecto PreMiSa, é a transferencia de coñecementos sobre os sistemas de recolección de algas utilizados en Galicia e as posibilidades de adaptación a ambos países

O Centro Tecnolóxico do Mar ven de organizar un novo intercambio de experiencias entre persoal técnico de República Dominicana, Costa Rica e Galicia (España), que terá lugar do 31 de agosto ao 4 de setembro, e que nesta ocasión estará centrado nos sistemas de recolección de algas en Galicia.

Este intercambio é o segundo que desenvolve CETMAR no marco do proxecto PreMiSa “Mecanismos de Prevención e Mitigación das arribazóns de Sargazo en Costa Rica e República Dominicana mediante o fortalecemento da gobernanza e a investigación”. O primeiro tivo lugar no mes de maio e permitiu a outros cinco expertos intercambiar experiencias sobre o análise, tratamento e valorización do sargazo.

PreMiSa está financiado polo  Programa Rexional de Medio Ambiente e Cambio Climático da Cooperación Española en América Latina e o Caribe (ARAUCLIMA) e coordinado polo Centro de Investigación en Ciencias del Mar y Limnología de la Universidad de Costa Rica (CIMAR). CETMAR actúa como consultoría especializada para a realización de actividades en Galicia e en materia de innovación tecnolóxica.

O obxectivo da actividade de intercambio que se vai celebrar é a transferencia de coñecementos entre persoal técnico de República Dominicana, Costa Rica e España, coa finalidade de desenvolver equipamentos innovadores para a recollida do sargazo en terra e no mar, especificamente deseñados para este fin, cun alto rendemento, costes asumibles e baixo impacto ambiental.

Neste sentido, Galicia conta cunha ampla experiencia no deseño e posta en marcha de mecanismos innovadores para a recollida de algas de arribazón. Para esta transferencia de coñecementos, CETMAR conta coa participación da Lonxa de Campelo, que xa puxo en práctica varias iniciativas para dar solución á problemática da arribazón de algas nas áreas das confrarías coas que traballa.

En base aos resultados obtidos a raíz deste intercambio, as institucións socias do proxecto PreMiSa traballarán no deseño e construción dunha mellora tecnolóxica, fomentando a incorporación de tecnoloxías innovadoras de recolección do sargazo, sostibles e amigables co medio ambiente, e que permitan unha valorización posterior óptima e adaptada ás condicións de República Dominicana, que é onde se propón a súa  aplicación.

Unha visita ao Centro Tecnolóxico do Mar-Fundación CETMAR na mañá do próximo luns 31 de agosto suporá o inicio do programa previsto, que se prolongará ata o venres 4 de setembro e que, ademais do intercambio de coñecementos na lonxa de Campelo, incluirá visitas a outras confrarías e a empresas relacionadas coa temática do intercambio, como Ecocelta e Demaux Manufacture.

Xul 30
0

Proxecto Consagmar

By | Novidades | No Comments

CETMAR organiza un intercambio de experiencias en materia de control e fiscalización dos productos pesqueiros en Galicia para 5 técnicos do SANIPES de Perú

  • Enmarcase no proxecto Consagmar “Contribución á soberanía alimentaria peruana a través da mellora dos mecanismos de control e vixilancia dos recursos e produtos hidrobiolóxicos e o fortalecemento de capacidades técnicas e de gobernanza das mulleres e homes fiscalizadores de SANIPES e das Administracións locais de Sechura”, financiado por Cooperación Galega e liderado por ANFACO-CYTMA

O Centro Tecnolóxico do Mar, dependente da Consellería do Mar, organiza un intercambio de experiencias entre Galicia (España) e Perú que terá lugar en terras galegas, do 29 de xuño ao 3 de xullo, e que estará centrado nos mecanismos de control e fiscalización dos produtos pesqueiros así como na normativa sanitaria e de trazabilidade dos mesmos.

Durante a visita, os cinco técnicos da Autoridad Nacional de Sanidad e Inocuidad en Pesca y Acuicultura de Perú (SANIPES) terán a posibilidade de coñecer a estrutura, competencias e medios operativos do Servizo de Gardacostas de Galicia da man do Subdirector xeral deste servizo, Juan Carlos Codesido.

Os técnicos terán tamén a posibilidade de ampliar o coñecemento da normativa sanitaria aplicable aos produtos pesqueiros, así como os requisitos para a autorización e rexistro dos establecementos alimentarios, contando para iso co xefe de servizo de Seguridade Alimentaria da Consellería de Sanidade, Jose Ángel Viñuela.

Esta formación complementarase con varias visitas prácticas a empresas, lonxas e mercados de abastos do sector coa finalidade de facelos partícipes de todas as actividades de control e trazabilidade da cadea alimentaria do sector pesqueiro e acuícola de Galicia.

Ademais, os técnicos teñen prevista unha visita ao porto pesqueiro da Autoridade Portuaria de Vigo, onde terán a posibilidade de coñecer, sobre o terreo, o funcionamento do Punto de Control Fronteirizo, encargado de inspeccionar e controlar as mercancías procedentes de terceiros países para garantir o cumprimento da normativa sanitaria, fitosanitaria e de seguridade alimentaria da Unión Europea.

No último día da axenda programada o grupo visitará as instalacións e laboratorios de ANFACO-CYTMA en Vigo, institución que lidera o proxecto Consagmar, e no que CETMAR actúa como consultor especializado para a realización de esta actividade en Galicia.

Persoal do Centro Tecnolóxico do Mar, responsable da organización da axenda para os cinco días nos que terá lugar o intercambio, acompañará aos técnicos durante a súa estancia, que comezará cunha visita á sede da fundación galega en Vigo, onde serán recibidos pola directora-xerente, Rosa Chapela.

Xul 02
0

Comparecencia no Parlamento

By | Novidades | No Comments

A Xunta salienta os 25 anos de CETMAR como referente internacional que transforma a ciencia en gobernanza do mar

  • A fundación afronta este aniversario cunha intensa actividade centrada en 52 proxectos vixentes e máis de 4,5 millóns de euros de investimento para actuar como fío condutor entre a comunidade científica, as administracións e o sector mar-industria
  • O labor do centro tradúcese en impactos tanxibles como o deseño técnico do Plan de Marisqueo galego, a copresidencia de grupos expertos en Bruxelas ou a mellora da seguridade alimentaria en máis de quince países en vías de desenvolvemento

A directora do Centro Tecnolóxico do Mar-Fundación CETMAR, Rosa Chapela, compareceu hoxe na Comisión 8ª, Pesca e Marisqueo, para dar conta do vixésimo quinto aniversario desta fundación dependente da Consellería do Mar. Chapela salientou que este cuarto de século de vida avala un modelo baseado en tecer pontes para conectar de forma eficaz a comunidade científica, as administracións e o sector mar-industria.

O labor do centro céntrase en xerar coñecemento útil, impulsar a innovación e facilitar o acceso a financiamento para que a investigación mariña se converta nun ben común que mellore as decisións públicas sobre o océano. No ámbito autonómico, CETMAR achega datos e evidencias de calidade para ferramentas esenciais coma a Estratexia de Economía Azul, o Plan de Marisqueo 2026-2031 ou proxectos aplicados coma SoL-Ouxa II, Bateas e Apromex, cuxos resultados de cultivo se transfiren ao sector bateeiro a través do plan Capacitamex.

A nivel internacional, a fundación situou a Galicia nunha posición de vangarda nas políticas marítimas da Unión Europea ao copresidir o Grupo de Expertos en Datos para a Ordenación do Espazo Mariño da Comisión Europea e formar parte do prestixioso European Marine Board. Así mesmo, o centro traballa de xeito pioneiro para incorporar a dimensión socioeconómica e humana na pesca europea mediante a achega de datos de emprego e valor engadido a plataformas de referencia coma EMODnet, o Blue Economy Observatory ou o proxecto ReMap.

A nivel técnico, a fundación converteuse nun soporte fundamental para a Política Pesqueira Común ao coordinar o secretariado dos Grupos Rexionais de Coordinación europeos, garantindo a calidade e harmonización dos datos que serven para determinar as cotas de pesca en organismos internacionais. Esta observación mariña desenvólvese en Galicia a través do Observatorio Costeiro (OCXG) —clave para amparar as leis galegas de ordenación do litoral e do cambio climático—, mentres que no plano internacional o Cetmar consolídase como o brazo executor da Cooperación Galega.

O centro transferiu o modelo de éxito galego a máis de quince países de África e América Latina e estende a súa actividade neste exercicio a Oriente Medio, México e Costa Rica, avalado por unha recente auditoría externa independente que destaca a súa credibilidade institucional e o seu impacto real na seguridade alimentaria.

Finalmente, a directora destacou que a maior capacidade científica e operativa lograda por Galicia para afrontar a contaminación mariña —cun traballo continuado que ampara o Plan Marlimpo ou o control de contaminantes emerxentes— é grazas ao seu capital humano. CETMAR conta cun equipo multidisciplinar de 55 profesionais de recoñecido prestixio que vén de aprobar o seu primeiro Plan de Igualdade con 33 medidas concretas de conciliación e equidade laboral.

Xuñ 25
0

Foro Internacional sobre a Captura Incidental de Megafauna Mariña Ameazada

By | Eventos, Novidades | No Comments

CETMAR colabora no maior foro internacional sobre a captura incidental de megafauna mariña ameazada, que terá lugar en outubro de 2027 na Cidade da Cultura de Santiago

  • O Centro Tecnolóxico do Mar, da Consellería do Mar, participa na organización deste encontro, que pretende avanzar en solucións para as capturas accesorias (bycatch) de megafauna mariña ameazada, en risco ou protexida na pesca.
  • Esta reunión é unha iniciativa dun conxunto de oito proxectos europeos que actualmente traballan arredor desta temática, como é o caso de REDUCE e LIFE CIBBRINA, nos que participa a área de Promoción e Transferencia de Tecnoloxía do CETMAR.

O Foro Internacional sobre a Captura Incidental de Megafauna Mariña, que terá lugar en Santiago de Compostela do 12 ao 15 de outubro do 2027, será a maior conferencia internacional xamais celebrada para avanzar en solucións para o bycatch. O encontro reunirá a unha diversidade de partes interesadas, capacitándoas para compartir coñecementos e experiencia.

O obxectivo é traballar xuntas por un futuro no que as pesqueiras coexistan plenamente coa megafauna mariña ameazada, que inclúe tiburóns, raias, tartarugas mariñas, aves mariñas e mamíferos mariños, e que enfronta unha importante presión pola captura incidental tanto na pesca a gran escala como a pequena escala.

O encontro está dirixido a calquera persoa que teña experiencia e coñecementos sobre as capturas accesorias da megafauna mariña, desde pescadores e investigadores, responsables políticos, innovadores, a cadea de valor dos produtos do mar e ONGs, entre outros.

Entre outras temáticas, durante o foro abordaranse cuestións como a monitorización, recollida de datos e tecnoloxías emerxentes ou a estandarización de métodos, programas de observadores. Tamén serán tratadas as ferramentas dixitais de monitorización electrónica e a automatización a través da intelixencia artificial, sensores e ADN ambiental, etc. Será obxecto de especial atención o desenvolvemento conxunto de solucións co sector pesqueiro e a transcendencia da temática nas comunidades locais costeiras. Debaterase tamén sobre políticas, gobernanza e marcos internacionais e sobre estudios de caso rexionais e intersectoriais relacionados con esta cuestión, así como sobre a comunicación científica, formación e participación pública para mellorar a concienciación.

A través da área de Promoción e Transferencia de Tecnoloxía do Centro Tecnolóxico do Mar participa na organización deste foro a través dos proxectos REDUCE e CIBBRINA e da man doutras accións europeas actualmente en curso que traballan arredor da captura accidental de especies de megafauna mariña ameazada, en risco ou protexida. Ademais de outras entidades, cabe facer mención á participación de dúas das institucións do padroado da Fundación, o CSIC a través do Instituto de Investigacións Mariñas, o IEO e a Universidade de Santiago de Compostela.

Máis información sobre o foro na súa páxina web (IFBMM)