Monthly Archives

Xaneiro 2025

Xan 28
0

Reunión de EUROFISH

By | Eventos, Novidades | No Comments

A directora-xerente do CETMAR participará como relatora invitada na reunión anual dos países socios de EUROFISH en Copenhague

A directora-xerente do Centro Tecnolóxico do Mar-Fundación CETMAR, Rosa Chapela Pérez, participará como relatora invitada na reunión anual dos países membros de EUROFISH, que terá lugar o vindeiro xoves 30 de xaneiro na sede da asociación internacional en Copenhague.

Neste encontro participarán arredor de medio cento de representantes dos ministerios con competencias en pesca e acuicultura dos 13 países membros e socios de EUROFISH, que abordarán, entre outros asuntos, o programa de traballo e o presuposto da entidade para este 2025, ademais de facer balance das actividades desenvolvidas o ano anterior.

Como ven sendo tradición na reunión anual de EUROFISH, a axenda deste encontro de traballo complétase con dous relatorios, un a cargo dun membro da propia organización internacional, e outro a cargo dun experto externo, que nesta edición corre a cargo da directora-xerente de CETMAR, quen acudirá en representación de Galicia.

Rosa Chapela falará así sobre o impacto socioeconómico da pesca e da acuicultura en Europa e máis concretamente en Galicia, centrándose na importancia de realizar estudios de impacto socioeconómico en ambos sectores para unha mellor toma de decisións informada por parte dos xestores públicos.

Así mesmo, falará dos poucos exemplos de estudios de impacto social e económico que poden ter as comunidades costeiras ante un recorte nas cuotas de pesca, entre eles os realizados pola administración galega con datos aportados por expertos de economía pesqueira da Universidade de Santiago de Compostela.

A directora de CETMAR incidirá así na necesidade de considerar datos económicos e sociais conxuntamente cos datos biolóxicos e ecolóxicos na toma de decisións, o que contribuirá a unha xestión más sostible da pesca e á mellora do benestar das comunidades pesqueiras, e citará  outros exemplos sobre os estudios de impacto económico nos que está a traballar a administración galega, relacionados coa economía azul de Galicia, á ordenación espacial mariña para marisqueo, pesca e acuicultura ou o impacto dos proxectos dos grupos de acción local de pesca nas comunidades litorais, entre outros.

O relatorio está previsto para este xoves día 31 de xaneiro ás 14:30 horas, trala intervención de Søren Espersen Schrøder, membro de Eurofish, quen presentará unha nova ferramenta para axudar á toma de decisións nas empresas de produtos do mar.

EUROFISH é unha organización internacional que traballa para contribuír ao desenvolvemento sostible do sector pesqueiro e acuícola; promover o comercio de produtos pesqueiros de alta calidade e valor engadido e facilitar a transferencia de información e coñecemento.

Para cumprir os seus obxectivos, a organización publica información relacionada co sector na revista Eurofish e na súa páxina web, e organiza xornadas, obradoiros, seminarios e encontros entre empresas. Ademais, desenvolve proxectos nos ámbitos da pesca, a acuicultura, os mercados e o comercio.

Actualmente os países membros de EUROFISH son Albania, Croacia, Dinamarca, Estonia, Hungría, Italia, Letonia, Lituania, Noruega, Polonia, Romanía, Turquía e España.

Xan 14
0

Observación do medio mariño

By | Novidades | No Comments

O Observatorio Costeiro da Xunta de Galicia mellora a súa rede de estacións océano-meteorolóxicas cunha nova plataforma de observación na Ponte de Rande

  • A nova infraestrutura permitirá incorporar sensores e solucións tecnolóxicas desenvolvidos no marco do Programa de Ciencias Mariñas de Galicia polo IEO-CSIC, IIM-CSIC e a Universidade de Vigo
  • A estación estará plenamente operativa antes do verán, sumándose ás outras cinco existentes en A Garda, Cíes, Muros, Ribeira e Cortegada

O Centro Tecnolóxico do Mar-Fundación CETMAR ven de instalar unha nova plataforma de observación do medio mariño nun dos Duques de Alba da Ponte de Rande, na Ría de Vigo, coa colaboración do Instituto Tecnolóxico para o Control do Medio Mariño-Intecmar e do Programa de Ciencias Mariñas de Galicia.

Con esta infraestrutura melloraranse as capacidades de monitorización de parámetros bioxeoquímicos da rede galega de estacións océano-meteorolóxicas do Observatorio Costeiro da Xunta de Galicia, ata agora centrada na monitorización de parámetros clásicos como o vento, a temperatura do mar ou a salinidade, e constituída por seis plataformas automáticas, como son as boias de A Garda, Cíes, Muros e Ribeira, a estación de Rande e a plataforma de Cortegada

A nova instalación servirá de base para a integración dos novos avances de observación do medio mariño acadados no marco do Programa de Ciencias Mariñas de Galicia, que ten neste ámbito un dos seus piares fundamentais, e que grazas ao esforzo conxunto das entidades do programa está desenvolvendo tecnoloxías e metodoloxías que permiten obter mais e mellores datos sobre o medio mariño e dunha forma mais eficiente.

Instalada nun dos Duques de Alba da Ponte de Rande, a estación servirá de base para o seguimento de variables bioxeoquímicas. Para elo integraranse nela distintos sensores e tecnoloxías cuxo prototipo xa está operativo na Marina Dávila en Bouzas, no Porto de Vigo, e que permitirán a medición en continuo de variables oceanográficas esenciais como temperatura, salinidade, oxíxeno disoluto na auga, pH, fluorescencia ou a concentración de Radón, en moitas delas recollendo datos en toda a columna de auga.

Coa colaboración do Observatorio Costeiro da Xunta de Galicia, e en particular do Instituto Tecnolóxico para o Control do Medio Mariño-Intecmar, CETMAR habilita así unha nova infraestrutura para a instalación dos equipos de medición de maneira desatendida e en continuo desenvolvidos por distintos organismos de investigación galegos, proporcionando un acceso aberto, e responsabilizándose tamén do seu mantemento, como ven facendo co resto das estacións.

A labor do Centro Tecnolóxico do Mar, dependente da Consellería do Mar, enmárcase no convenio de colaboración subscrito en 2021 entre o devandito departamento autonómico e a Consellería de Medio Ambiente e Cambio Climático, e que artella o traballo conxunto que desde 2008 realizan MeteoGalicia, Intecmar e CETMAR, facendo posible a actividade do Observatorio Costeiro da Xunta de Galicia e a súa contribución á eficiencia na xestión de eventos extremos, á resiliencia ante o cambio climático e á xestión sostible dos recursos mariños.

O Observatorio Costeiro da Xunta de Galicia non só subministra datos, senón tamén predicións de calidade e de utilidade para a investigación e a xestión sostible do medio mariño, ademais de proporcionar información necesaria para a xestións das emerxencias, grazas ao traballo diario de MeteoGalicia e Intecmar. No ámbito do salvamento marítimo é soporte indispensable para Gardacostas de Galicia e Salvamento Marítimo, e peza clave na execución do Plan Territorial de Continxencias por Contaminación Mariña Accidental de Galicia (Plan Camgal).

A información que resulta do seguimento do mar levado a cabo polas infraestruturas do Observatorio facilita así o desenvolvemento sostible dos sectores produtivos, ofrecendo información de baixada de salinidade e aumento de temperatura, apoiando distintos estudos das zonas de produción e xerando produtos de valor engadido para a poboación en xeral (información praias, portos, etc.) ou para sectores específicos da economía azul.

Sobre o Programa de Ciencias Mariñas de Galicia

O Programa de Ciencias Mariñas de Galicia é unha iniciativa científica integral e multidisciplinar que aborda os desafíos do cambio global e comprométese coa conservación e xestión sostible dos ecosistemas mariños de Galicia. Forma parte dos Plans Complementarios de Ciencia do Ministerio de Ciencia, Innovación y Universidades incluídos no Plan de Recuperación Transformación e Resiliencia (PRTR-C17.I1), está financiado a través da Xunta de Galicia con fondos Next Generation EU e Fondo Europeo marítimo, da Pesca e da Acuicultura da Unión Europea.