Marta González

O esteiro do río Miño e a súa calidade medioambiental foron obxecto hoxe dun seminario na sede do Centro Tecnolóxico do Mar en Vigo no marco do proxecto TEAM-Miño, no que a Fundación CETMAR participa xunto a investigadores e administracións con competencia nas bacías hidrográficas de Galicia e do Norte de Portugal.

A directora-xerente do CETMAR, Paloma Rueda Crespo, foi a encargada da apertura desta xornada nunha intervención na que recordou o valor ecolóxico do río Miño e a importancia do seu mantemento en condicións óptimas. Por este motivo agradeceu o traballo de todos os socios que están a desenvolver as accións do proxecto europeo TEAM-Miño, unha iniciativa que, dixo, axudará a preservar este entorno natural que comparten Galicia e o Norte de Portugal. Rueda Crespo agradeceu tamén a presencia do arredor de medio cento de expertos que asistiron ao seminario.

O encargado de dar a coñecer os pormenores do proxecto foi José Luís Gómez, técnico da área de Control e Xestión do Medio e dos Recursos Mariños do CETMAR, quen explicou que o obxectivo fundamental de TEAM-Miño é abordar o grado de implementación da Directiva Marco da Auga neste esteiro e expor unha aproximación preliminar do estado ecolóxico das súas masas de auga, froito dos resultados obtidos a raíz das mostraxes realizadas neste ano polos membros do consorcio.

“Transferencia de ferramentas para a avaliación, ordenación, xestión e educación ambiental en esteiros” é o título do proxecto que, recordou o representante do CETMAR, está financiado pola Unión Europea a través do programa de Cooperación Transfronteiriza España-Portugal e terá actividade ata mediados de 2013, cando se celebrará a conferencia final.

Coordinado pola Estación de Ciencias Mariñas de Toralla da Universidade de Vigo, no consorcio de TEAM-MIÑO participan xunto á Fundación CETMAR a Administração Rexional Hidrográfica do Norte de Portugal; Augas de Galicia; o Centro de Monitorização e Interpretação Ambiental de Vila do Conde; o Centro Interdisciplinar de Investigação Marinha e Ambiental; a Confederación Hidrográfica Miño-Sil; o Instituto Español de Oceanografía; o Instituto Nacional dos Recursos Biolóxicos de Portugal; a  Mancomunidade de Municipios do Baixo Miño e a Universidade de Aveiro.

Desenvolver ferramentas comúns para a aplicación coordinada da Directiva Marco da Auga no esteiro do Miño e potenciar a participación cidadá na xestión e conservación deste ecosistema acuático son os obxectivos xerais deste proxecto europeo, que busca a colaboración e implicación das administracións e da sociedade a ambas as beiras do río.

O esteiro do río Miño e a súa calidade medioambiental serán obxecto dun seminario que terá lugar o vindeiro venres 11 de xaneiro na sede do Centro Tecnolóxico do Mar en Vigo no marco do proxecto TEAM-MIÑO, no que a Fundación CETMAR participa xunto a investigadores e administracións con competencias nas bacías hidrográficas de Galicia e do Norte de Portugal.

A directora-xerente do CETMAR, Paloma Rueda Crespo, será a encargada da apertura deste seminario, que ademais de para presentar o devandito proxecto servirá para abordar o grado de implementación da Directiva Marco da Auga neste esteiro e para expor unha aproximación preliminar do estado ecolóxico das súas masas de auga, froito dos resultados obtidos a raíz das mostraxes realizadas neste ano polos socios de TEAM-MIÑO.

“Transferencia de ferramentas para a avaliación, ordenación, xestión e educación ambiental en esteiros” é o título do proxecto que, financiado pola Unión Europea a través do programa de Cooperación Transfronteiriza España-Portugal, terá actividade ata mediados de 2013, cando se celebrará a conferencia final.

Coordinado pola Estación de Ciencias Mariñas de Toralla da Universidade de Vigo, no consorcio de TEAM-MIÑO participan xunto á Fundación CETMAR a Administração Regional Hidrográfica do Norte de Portugal; Augas de Galicia; o Centro de Monitorização e Interpretação Ambiental de Vila do Conde; o Centro Interdisciplinar de Investigação Marinha e Ambiental; a Confederación Hidrográfica Miño-Sil; o Instituto Español de Oceanografía; o Instituto Nacional dos Recursos Biolóxicos de Portugal; a  Mancomunidade de Municipios do Baixo Miño e a Universidade de Aveiro.

Desenvolver ferramentas comúns para a aplicación coordinada da Directiva Marco da Auga no estuario do Miño e potenciar a participación cidadá na xestión e conservación deste ecosistema acuático son os obxectivos xerais deste proxecto europeo, que busca a colaboración e implicación das administracións e da sociedade a ambas as beiras do río.

Por en marcha novos plans de xestión das pesqueiras a longo prazo coa participación de todos os axentes implicados nesta actividade é o obxectivo do proxecto europeo GEPETO “Xestión de Pesqueiras e Obxectivos Transnacionais”. Esta iniciativa, financiada pola Comisión Europea a través do programa Interreg Espacio Atlántico e o Fondo Europeo de Desenvolvemento Rexional, está liderada polo Centro Tecnolóxico do Mar-Fundación CETMAR e conta coa participación de centros de investigación e representantes do sector pesqueiro de España, Francia, Portugal e Irlanda.

Os primeiros pasos para deseñar o novo modelo de xestión pesqueira déronse recentemente en Madrid cunha reunión de representantes de todas as entidades e institucións que conforman o consorcio do proxecto. Ademais do CETMAR e o CCR-Sur participan nesta iniciativa IFREMER de Francia, AZTI-Tecnalia, IPMA de Portugal, o Instituto Español de Oceanografía, a Universidade das Azores, Marine Institute de Irlanda e o Consejo Consultivo Regional para las Aguas Noroccidentales (CCR-N).

O ámbito de actuación de GEPETO corresponde á fachada Atlántica Sur de Europa, onde se pretende desenvolver un modelo participativo que integre a todas as partes implicadas na actividade pesqueira. A intención é lograr novos métodos de xestión innovadores que fagan da pesca unha actividade competitiva dende o punto de vista socioeconómico e que, ao tempo, preserve os recursos naturais do medio mariño a longo prazo.

Como paso previo á definición dos novos plans de xestión elaborarase un mapa que establecerá as diferentes actividades pesqueiras existentes na zona obxecto deste estudo, así como a súa importancia en relación coas capturas e a súa repercusión socioeconómica. Tomando como base a información desta ferramenta describiranse distintas unidades de xestión, co gallo de parcelar as actividades e zonas que son susceptibles de ter unha xestión común adaptada ás súas necesidades.

A perda de competitividade do sector europeo da pesca, a crise económica e un marco regulamentario a corto prazo son tres factores que están a contribuír ao menoscabo da actividade da pesca en Europa. Co ánimo de contribuír a garantir o seu futuro, o proxecto GEPETO busca a colaboración entre científicos, profesionais, grupos ecoloxistas e todos os axentes do sector.

Tras acadar un novo acordo na Comisión Europea, respecto aos TACs e cotas para 2013, os socios de GEPETO plantexan unha alternativa a máis longo prazo na xestión pesqueira, procurando un marco máis estable para as propostas do sector pesqueiro e maior visibilidade ás partes interesadas. O proxecto finalizará na primavera do 2014.

O Centro Tecnolóxico do Mar propiciou un novo encontro entre investigadores, sector marítimo-pesqueiro e administración nunha nova xornada do Foro que sobre Seguridade Alimentaria en Produtos da Pesca estase a celebrar en Vigo dende o martes, organizado pola Fundación CETMAR e o Instituto de Investigaciones Marinas-CSIC.

Na apertura deste evento, dedicado ás “Tecnoloxías para garantir a Bioseguridade dos produtos da pesca”, a directora-xerente do CETMAR, Paloma Rueda Crespo, asegurou que iniciativas deste tipo permiten á Fundación cumprir cos obxectivos para os que foi creada. “A interrelación entre centros de investigación e as empresas privadas axuda a difundir e divulgar os resultados destes organismos e a colaborar co sector privado”, unha colaboración que, engadiu, tamén é “enriquecedora” para a Administración, o que redunda, apuntou, “nunha xestión mais proveitosa” para todos.

A técnica da área de Tecnoloxía dos Produtos Pesqueiros e responsable do Foro por parte do CETMAR, Elvira Abollo, foi a encargada de abrir os relatorios recordando que a organización deste evento foi posible gracias á colaboración de outras entidades públicas e privadas, como é o caso do Porto de Vigo, en cuxa sede péchase o Foro mañá pola tarde.

Respecto as dúas mesas de traballo celebradas o martes e o mércores, unha con asistencia de representantes do sector e dos centros de investigación, e outra de investigadores que traballan sobre os problemas derivados das parasitoses nos produtos da pesca, Elvira Abollo asegurou que resultaron “moi proveitosas” para tódalas partes.

O Foro finaliza mañá cunha nova xornada, esta vez pola tarde, no edificio de sesións do peirao de trasatlánticos do Porto de Vigo. “Novos retos en seguridade alimentaria dos produtos da pesca” é o título deste “Infoday”, que ten previsto o seu inicio a partires das catro.

O Centro Tecnolóxico do Mar acolleu hoxe a presentación dunha nova rede de centros de formación marítima. Foi durante a conferencia final do proxecto europeo Marleanet, no que a Fundación CETMAR ven de traballar xunto a institucións de Portugal, Francia e Irlanda co obxectivo de integrar a tódolos subsectores deste ámbito académico.

Na apertura da xornada, que correu por conta da directora-xerente do CETMAR, Paloma Rueda Crespo, esta destacou o feito de que “tódolos centros de formación de Galicia e de España” foran quen de ”atoparse, intercambiar experiencias e fomentar a creación dunha rede, propiciando sinerxías” que, asegurou, “terán aproveitamento no futuro”. Por este motivo agradeceu a participación tanto dos socios de Marleanet como das institucións de formación que colaboraron no cumprimento dos fins desta iniciativa.

Pola súa banda, Lucía Fraga, coordinadora da área de Formación do Centro Tecnolóxico do Mar, introduzo aos asistentes á conferencia nos detalles do proxecto que, recordou, contou coa participación de centros de formación civís, da Armada e marítimo-pesqueiros. Financiado a través do programa Interreg da Unión Europea, Marleanet contou coa participación de seis socios e manterá a súa actividade ata finais de 2012.

Do desenvolvemento da base de datos Marleanet falou Anxela Carballo, técnica do proxecto no CETMAR. Explicou que está estruturada en catro rexistros: documentos relacionados con este ámbito académico; entrevistas coas reflexións e opinións de expertos, docentes e axentes do sector; persoas –formadores, expertos, investigadores- e, finalmente, organizacións, como os propios centros de formación, agrupacións, asociacións ou organismos do sector marítimo-pesqueiro.

Entre as vantaxes desta base de datos destacou a maior visibilidade dos centros en internet e o feito de que propicia contactos entre institucións de España, Portugal, Irlanda e Francia. Tamén permite, dixo, compartir recursos e coñecementos e sirve de punto de encontro entre docentes, expertos e profesionais. Resaltou tamén o feito de que, por primeira vez, propíciase a interacción entre os sectores implicados na navegación, como é o caso da Armada, da mariña mercante e do sector da pesca.

Un debate aberto sobre a orientación da rede nun futuro e as necesidades dos centros de formación que sexa desexable abordar pechou o encontro, disponible no canal CAU CETMAR de YouTube. Os relatorios estarán en breve en www.marleanet.com.

Xunto ao CETMAR participan nesta iniciativa o Centre Européen de Formation Continue Maritime de Concarneau, que coordina a iniciativa; a  Université de Bretagne Occidentale; a Mutua dos Pescadores e a Escola Náutica Infante Don Henrique de Portugal e o Cork Institute of Technology/ National Maritime College of Ireland.

“Evolución e tendencias das poboacións de merlúcidos de interese industrial. Saúde do recurso” é o título do seminario que se celebrará na sede do Centro Tecnolóxico do Mar en Vigo mañá mércores día 28 e o venres 30 de novembro, organizado pola propia Fundación CETMAR e o Instituto Español de Oceanografía en colaboración coa Plataforma Tecnolóxica TECNPOPEIXE.

O obxectivo destas xornadas, nas que intervirán recoñecidos expertos de ámbito internacional, é abordar o futuro a corto prazo destas pesqueiras e as posibles estratexias cara a súa óptima xestión a fin de garantir o súa continuidade e, consecuentemente, o futuro da flota conxeladora e de altura, das empresas elaboradoras e dos frigoríficos que dependen delas.

A directora-xerente do CETMAR, Paloma Rueda Crespo, será a encargada de presentar este seminario, cuxa apertura correrá a cargo do subdirector xeral da Consellería do Medio Rural e do Mar, José Molares. Será mañá mércores  nunha primeira xornada dedicada ás especies do Atlántico Suroccidental, como é o caso das pescadas arxentina, austral e de cola. No segundo día do seminario, o venres 30, o director do IEO, Eduardo Balguerías, abrirá unha mañá dedicada as especies das costas occidentais de África e á pescada europea.

Os relatorios correrán a cargo dos doutores Patricio Árana, da Pontificia Universidade Católica de Valparaíso; Ana Gordoa do CSIC; e José Luís del Río,CarmenG. Piñeiro, Santiago Cerviño e José Castro do IEO.

O Centro Tecnolóxico do Mar-Fundación CETMAR ven de organizar un Foro de I+D+I sobre seguridade alimentaria en colaboración co Instituto de Investigaciones Marinas-CSIC. Baixo o título de “Bioseguridade en produtos da pesca: novos retos do laboratorio á mesa”, terá lugar en diversos escenarios da cidade de Vigo do 27 ao 30 de novembro.

O obxectivo desta iniciativa, na que tamén colabora o Porto de Vigo, é trasladar ao sector os resultados de investigación encamiñados á consecución de procesos e produtos recoñecibles polos seus altos estándares de calidade, contribuíndo así a mellorar a competitividade e a capacitación profesional e a incrementar as oportunidades de negocio.

A primeira xornada do foro consistirá nunha mesa de traballo sectorial de acceso restrinxido. Prevista para o día 27, leva por título “O compromiso da bioseguridade: estímulos tecnolóxicos e de mercado” e reunirá a representantes do sector industrial –extractivo, transformador- e comercializador, así como de empresas de base tecnolóxica, de centros tecnolóxicos e de organismos públicos de investigación. A apertura deste acto correrá a cargo do subdirector xeral da Pesca e dos Mercados da Pesca da Consellería do Medio Rural e do Mar, Antonio Rodríguez Fernández.

O día 28 terá lugar unha segunda mesa de traballo, esta vez con investigadores e tecnólogos procedentes de diferentes universidades e organismos públicos de investigación do país. Ao igual que no caso da xornada para o sector, esta será de acceso restrinxido.

O día 29 celebrarase o seminario “Tecnoloxías para garantir a bioseguridade dos productos da pesca”, no que participarán prestixiosos científicos nacionais e internacionais e expertos do ámbito empresarial.Paloma Rueda Crespo, directora-xerente do Centro Tecnolóxico do Mar, será a encargada de inaugurar a xornada.

Finalmente, as instalacións do Porto de Vigo acollerán o día 30 un Infoday sobre “Novos retos en seguridade alimentaria en produtos da pesca”. Nesta xornada tomarán parte responsables do SERGAS e expertos a nivel nacional e internacional do ámbito da lexislación,  comunicación e competitividade en seguridade alimentaria.

O Centro Tecnolóxico do Mar-Fundación CETMAR acollerá o vindeiro mércores 21 de novembro a xornada de lanzamento do proxecto ECODRAGA, unha nova iniciativa na que a institución galega colabora coas empresas Canlemar, Nodosa e Centro de Investigaciones Submarinas, así como coas universidades de Vigo e A Coruña. O seu obxectivo é o deseño dunha draga ecolóxica para a limpeza por succión dos fondos mariños e un sistema de vertedura do material no medio mariño con menor impacto por dispersión do material dragado.

O proxecto está financiado polo Centro para o Desenvolvemento Tecnolóxico Industrial a través do programa Innterconecta Galicia e a xornada de presentación será inaugurada polo Director da Axencia Galega de Innovación. A clausura correrá a cargo do Presidente de Portos de Galicia.

CETMAR fará unha presentación xeral do proxecto e  a continuación representantes das empresas do consorcio ofrecerán unha visión xeral, comercial e empresarial e de mercado da ECODRAGA. A presentación técnica correrá a cargo dos grupos de investigación implicados na iniciativa.

O programa da xornada, que se desenvolverá de 10:00 a 13:00 horas, inclúe relatorios sobre o plan de verteduras de Galicia, sobre a lexislación de dragado e sobre a importancia desta técnica en España a cargo de representantes de Puertos del Estado, CEDEX e Portos de Galicia.

Unha mesa redonda cos relatores, empresas e investigadores seguida de coloquio porá fin ao evento, no que é posible inscribirse a través da web do Centro Tecnolóxico do Mar (www.cetmar.org/seminarios/Ecodraga/).

O Centro Tecnolóxico do Mar-Fundación CETMAR deu hoxe un paso mais na súa aposta pola valorización dos subprodutos derivados da actividade pesqueira coa celebración dun novo seminario sobre a utilización destes e doutros organismos mariños cara ao desenvolvemento de produtos nutracéuticos e alimentos funcionais, de constatados beneficios para a saúde das persoas.

Organizado no marco do proxecto MARMED “Desenvolvemento de produtos biomédicos innovadores a partires da valorización de recursos mariños”, o seminario foi inaugurado pola directora-xerente do CETMAR, Paloma Rueda Crespo, quen destacou a “grande demanda e aceptación social” dos produtos nutracéuticos e alimentos funcionais e os seus beneficios para a saúde das persoas. Por este motivo, engadiu, o seu desenvolvemento é “unha moi boa vía” cara á valorización dos subprodutos pesqueiros.

Pola súa banda,Julio Maroto, coordinador da área de Tecnoloxía dos Produtos Pesqueiros e responsable do proxecto MARMED na institución, recordou que o seminario que se celebraba hoxe era o último dunha serie de ata catorce xornadas desenvolvidas nos últimos seis anos sobre diferentes temáticas vinculadas sempre a valorización dos subprodutos xerados pola actividade pesqueira e organismos mariños, unha liña de traballo estratéxica para o Centro Tecnolóxico do Mar.

Explicou tamén que os devanditos seminarios son froito das investigacións que neste ámbito desenvolvéronse nos últimos anos en outros catro proxectos europeos cuxo obxectivo global eran os aspectos relacionados coa valorización, como foi o caso de VALBIOTEC, BIOTECMAR, PROTEUS e IBEROMARE. Finalmente, moitas das capacidades dos consorcios que fixeron posible eses proxectos, nos que participou oCETMAR, converxeron en MARMED, no que traballan dez socios de España, Portugal, Reino Unido, Francia e Irlanda.

Liderado pola Universidade portuguesa do Minho, todos os socios deste proxecto son grupos de investigación a excepción da institución galega, que actúa como centro de transferencia. O seu obxectivo básico, segundo explicou Maroto, é a valorización a través do desenvolvemento de aplicacións no ámbito da saúde, “especialmente as biomédicas”. Entre as actividades desenvolvidas polo consorcio MARMED atópanse a identificación no Arco Atlántico de empresas capacitadas para valorizar os subprodutos ou organismos mariños; o estudio dos principios básicos existentes neles e, finalmente, a conexión entre empresas e grupos de investigación para o desenvolvemento de aplicacións.