All Posts By

Marta González

Mai 07
0

No marco de APROMEX

By | Novidades | No Comments

A Xunta mellora a xestión do mexillón dende a análise en rocha á produción en criadeiros

  • CETMAR pon a disposición do sector unha plataforma web que ofrece información do ciclo larvario deste molusco bivalvo
  • O conselleiro do Mar participa na presentación desta iniciativa, incluída na estratexia da Consellería de garantir a sustentabilidade e o desenvolvemento do recurso
  • A miticultura é unha das principais actividades acuícolas galegas, que vai máis aló da propia actividade de cultivo en bateas, sendo determinante no desenvolvemento socioeconómico de Galicia

O conselleiro do Mar, Alfonso Villares, participou este mércores na presentación do visor web da densidade larvaria do mexillón, que desenvolveu o Centro Tecnolóxico do Mar-Fundación CETMAR no marco do proxecto APROMEX. Trátase dunha plataforma web, co-financiada polo Fondo Europeo Marítimo, de Pesca e da Acuicultura (FEMPA), que permite a visualización de datos de análises larvarios de moluscos, destacando as larvas de mexillón, que se actualizan semanalmente, a través de paneis interactivos.

Deste xeito, a través desta iniciativa dáse un acceso máis áxil aos datos recollidos desde o ano 2023, data na que se puxo en marcha un estudo de identificación e marcaxe selectivo de larvas desta especie mediante anticorpos monoclonais, realizado polo Centro de Investigación CINBIO da Universidade de Vigo, o Centro Investigacións Mariñas (CIMA) e o Instituto Tecnolóxico do Control Mariño de Galicia (Intecmar).

No acto, no que Villares estivo acompañado da directora xeral de Pesca, Acuicultura e  Innovación  Tecnolóxica, Patricia García, e da directora xerente de CETMAR, Rosa Chapela, informouse de que esta ferramenta mellora a accesibilidade e consulta a estes datos; facilita a súa interpretación, ofrecendo información de interese como a posición das estacións de mostraxe; e permite coñecer a súa evolución temporal para os anos 2023, 2024 e 2025. Tamén inclúe un diagrama do ciclo larvario do molusco bivalvo, así como comentarios sobre a evolución observada recentemente en cada estación, entre outras observacións.

Estes aspectos e o funcionamento deste instrumento están a presentarse ao sector no marco das xornadas do proxecto Capacitamex, a través do CETMAR, xunto con outros avances e traballos de investigación de interese para o sector, pois de APROMEX tamén se extraen outros datos que abarcan dende a avaliación da fixación de cría nas rochas á posta en marcha de novos sistemas de avaliación de captación no medio natural e a produción complementaria, a través de criadeiros.

Co fin de avanzar neste proxecto e de impulsar diversas iniciativas destinadas a garantir a sustentabilidade e o desenvolvemento deste recurso, a Consellería do Mar prevé investir ata 2026 máis de 1,2 millóns de euros. Porén, esta acción dá continuidade a outros traballos anteriores.

A miticultura en Galicia

A miticultura, unha das principais actividades acuícolas galegas, desempeña un papel crucial na economía e a sociedade galega. O seu desenvolvemento vai máis aló da propia actividade de cultivo en bateas (3.573 en Galicia), xa que o ciclo de engorde do mexillón depende da captación de semente salvaxe (mexilla), obtida principalmente das rochas do litoral e de cordas colectoras. Son actividades, segundo apuntou o responsable autonómico, esenciais para garantir o desenvolvemento do sector.

A alta variabilidade natural deste recurso e a súa importancia socioeconómica para Galicia avalan a demanda de levar a cabo un estudo en profundidade da súa dinámica, das posibilidades de aproveitamento, do impacto ecolóxico, e da procura de alternativas para abastecer ao sector co obxectivo de facelo máis resiliente.

Para garantir a súa sustentabilidade e desenvolvemento continuo é esencial abordar os desafíos que enfronta. Neste contexto, a Consellería do Mar, a través do CIMA, e co apoio técnico do CETMAR, lanzou o proxecto APROMEX, co-financiado con fondos europeos. Estes retos abórdanse a través de tres áreas: análise das poboacións de mexilla no intermareal rochoso e a súa explotación, avaliación de novos sistemas de captación de semente e desenvolvemento de sistemas de produción de semente en condicións controladas de criadeiro.

Mai 05
0

UNOC-3

By | Novidades | No Comments

Galicia avoga por situar a pesca e a acuicultura como piares centrais do Pacto Europeo dos Océanos

  • Nun evento no Comité Europeo das Rexións en Bruxelas, a directora do Centro Tecnolóxico do Mar-Fundación CETMAR, Rosa Chapela Pérez, defende que estes sectores son aliados esenciais para garantir o equilibrio e a sostibilidade dos mares

Galicia ratificou hoxe o seu apoio pleno ao Pacto Europeo dos Océanos como plataforma fundamental para unificar a súa gobernanza e aliñar a protección do medio ambiente co seu uso sostible, e avogou pola integración plena da pesca e da acuicultura como piares centrais dese acordo.

Durante un evento no Comité Europeo das Rexións celebrado en Bruxelas este mediodía, a directora-xerente do Centro Tecnolóxico do Mar-Fundación CETMAR, Rosa Chapela Pérez, defendeu que os sectores pesqueiro e acuícola sostibles “non representan unha ameaza para a saúde dos nosos océanos”. Polo contrario, afirmou, “son aliados esenciais para manter o seu equilibrio”.

A responsable do Cetmar interveu en representación da Consellería do Mar nunha xornada de alto nivel organizada pola Oficina Europea para a Conservación e o Desenvolvemento en colaboración co Comité Económico e Social Europeo. O seu obxectivo era explorar como o vindeiro Pacto Europeo polos Océanos contribuirá á sostibilidade global destes, isto na antesala da terceira Conferencia das Nacións Unidas sobre os Océanos (UNOC-3), que terá lugar en Niza no mes de xuño.

Neste marco, Rosa Chapela insistiu na importancia de que o devandito pacto recoñeza e apoie á pesca artesanal e a pequena escala, ao marisqueo e a acuicultura sostibles como factores “clave” que contribúen á resiliencia costeira, á seguridade alimentaria e ao patrimonio cultural, recoñecendo ademais o seu papel no cumprimento do Obxectivo de Desenvolvemento Sostible 14 (ODS), a resiliencia climática e a soberanía alimentaria.

Na súa intervención, a directora do CETMAR fixo un repaso ás aportacións de Galicia ao Pacto Europeo para os Océanos, que resumiu en catro piares básicos: “unha gobernanza sólida e unha planificación espacial marítima integrada; na gobernanza do océano centrada nas persoas; sistemas alimentarios azuis sostibles e inclusivos e inversión en ciencia, innovación e desenvolvemento de capacidades”.

Recordou que Galicia colabora estreitamente co Goberno español cara unha planificación espacial marítima que garanta un equilibrio xusto entre todos os usos do océano, unha visión integrada que, afirmou, “minimiza os conflitos e maximiza as sinerxías” e defendeu o mar coma un piar cultural, social e económico. “Avogamos por un Pacto que sitúe ás comunidades costeiras no centro, garantindo o traballo decente, o relevo xeracional e o recoñecemento do papel das mulleres na economía azul”.

Neste punto, a directora do CETMAR referiuse aos Grupos de Acción Local de Pesca (GALP) que forman parte dunha rede europea máis ampla e que, apuntou, “ofrecen un modelo probado de gobernanza comunitaria de abaixo a arriba” e que, engadiu, “poden axudar a por en marcha este Pacto sobre o terreo”.

Aliñar o crecemento da economía azul coa acción climática, garantir un acceso equitativo á financiación e a formulación de políticas da Unión Europea para rexións costeiras como Galicia ou investir en ciencia, innovación e formación para apoiar á xestión e a resiliencia dun océano cambiante foron outros dos compromisos suxeridos por Galicia para a súa inclusión explícita no Pacto para os Océanos.

Mai 05
0

No marco de Secweb 2.0

By | Novidades | No Comments

CETMAR colabora cos Grupos de Coordinación Rexional europeos no deseño de ferramentas innovadoras para mellorar a xestión dos datos pesqueiros na UE

  • O desenvolvemento destes novos servizos tecnolóxicos lévase a cabo no marco do proxecto Secweb 2.0, financiado polo Fondo Europeo Marítimo de Pesca e de Acuicultura
  • O Centro Tecnolóxico do Mar é responsable da secretaría que presta apoio administrativo a estes grupos desde o ano 2023

O Centro Tecnolóxico do Mar-Fundación CETMAR e os Grupos de Coordinación Rexional europeos (RCGs, polas súas siglas en inglés) están traballando conxuntamente no deseño e desenvolvemento de ferramentas e servizos innovadores que melloren o funcionamento destes grupos, responsables da recollida e xestión dos datos das pesqueiras na Unión Europea.

Como responsable da secretaría que presta apoio aos RCGs (Regional Coordination Groups), e no marco do proxecto Secweb 2.0, que financia o Fondo Europeo Marítimo de Pesca e de Acuicultura, a institución galega, dependente da Consellería do Mar, está liderando este proceso, que se iniciaba cunha enquisa aos expertos que conforman estes grupos para coñecer as súas demandas de mellora.

Tendo en conta os resultados desa consulta acordouse o desenvolvemento dunha serie de ferramentas e contidos, como unha plataforma para a xestión de recomendacións e decisións, un sistema de rexistro de eventos ou un calendario e unha biblioteca electrónicos, ademais da mellora e actualización do sitio web dos Grupos de Coordinación Rexional e da base de datos das partes interesadas.

O deseño e posta en práctica destas accións foi debatido xa na primeira reunión de co-deseño, que reuniu a 17 representantes dos seis grupos e dos subgrupos e aos puntos focais nacionais, e na que se abordaron os contidos da plataforma para a xestión de recomendacións e decisións, que permitirá facer seguimento das mesmas mais aló do encontro que anualmente celebran os RCGs.

CETMAR abordará cos grupos en vindeiras reunións os contidos doutras ferramentas como o calendario ou o novo sistema de rexistro de eventos, ou da biblioteca virtual, decidindo de común acordo a información a compartir, o xeito de mostrala ou o sistema de acceso, entre outras características.

Trátase dun proceso de deseño cooperativo, continuo e aberto, liderado polo CETMAR, que irá presentando os avances ata o desenvolvemento final destas novas ferramentas, coas que se pretende facilitar o día a día no traballo dos Grupos de Coordinación Rexional.

A área de Promoción e Transferencia de Tecnoloxía do Centro Tecnolóxico do Mar asiste desde 2023 aos RCGs e préstalles  apoio nos procedementos organizativos e de comunicación dos grupos, artellando novos mecanismos e propostas co obxectivo de consolidar unha estrutura de secretaría que os apoie a longo prazo.

Paralelamente, CETMAR desenvolve o citado proxecto SECWEB 2.0 para mellorar a capacidade dos RCG e fortalecer a coordinación rexional desta rede de mais de 400 expertos dedicada a recollida, xestión e intercambio de datos pesqueiros.

Os Grupos de Coordinación Rexional -Atlántico Norte, Mar do Norte e Ártico Oriental (RCG NANSEA); Báltico (RCG Báltico); Grandes peláxicos (RCG LP); Pesca de longa distancia (RCG LDF); Mediterráneo e Mar Negro (RCG Med&BS) e Asuntos Económicos (RCG ECON)- son o principal centro de recollida de datos das pesqueiras co que conta a Unión Europea para mellorar e asegurar a xestión sostible dos recursos mariños.

O análise desta información constitúe a base cara a avaliación dos stocks, a partir dos cales redáctanse informes científicos que serven de base para determinar as posibilidades de pesca de cada especie.

Abr 24
0

Novas ferramentas

By | Novidades | No Comments

A Xunta desenvolve un visor web de densidade larvaria de bivalvos na costa galega da man do Centro Tecnolóxico do Mar no marco do proxecto Apromex

  • Esta ferramenta mellora a accesibilidade aos datos e facilita a interpretación e consulta mediante paneis interactivos, así como visualizar a posición das estacións de mostraxe e a súa evolución temporal
  • No ano 2023 púxose en marcha un estudo de identificación e marcaxe selectiva de larvas de mexillón mediante anticorpos monoclonais da man do centro de investigación Cinbio da Universidade de Vigo, o CIMA e o Intecmar
  • A Consellería do Mar inviste no impulso de diferentes iniciativas para garantir a sustentabilidade e o desenvolvemento deste recurso acuícola estratéxico máis de 1,2 millóns de euros no período 2024-2026

A Consellería do Mar deu conta no Consello da Xunta do desenvolvemento dun visor web de densidade larvaria de mexilla, un recurso mariño estratéxico para o sector acuícula da comunidade, no marco do proxecto Apromex, que está cofinanciado polo Fondo Europeo Marítimo, de Pesca e Acuicultura (FEMPA). Así, o Centro Tecnolóxico do Mar-Fundación CETMAR, dependente deste departamento autonómico, puxo en marcha unha plataforma web que permite visualizar mediante paneis interactivos os datos de análise larvaria de moluscos, destacando as larvas de mexillón, que son actualizados semanalmente.

Esta ferramenta mellora a accesibilidade a estes datos e facilita a súa interpretación e consulta ofrecendo información de interese como a posición das estacións de mostraxe e permite coñecer a súa evolución temporal para os anos 2023, 2024 e 2025. Tamén inclúe un esquema do ciclo larvario do mexillón, así como comentarios da evolución observada recentemente en cada estación, entre outras observacións. Estes aspectos e o funcionamento deste instrumento están sendo presentados ao sector no marco das xornadas do proxecto Capacitamex, a través do Cetmar, xunto con outros avances e traballos de investigación de interese para o sector.

Esta acción vai en liña con outros traballos anteriores. Xa no período 2009-2011 o Cetmar, por encarga da Consellería do Mar, publicou na web do Intecmar informes semanais sobre a abundancia de larvas de mexillón nas rías galegas co obxectivo de motrar patróns temporais e espaciais. Tamén no ano 2023, se puxo en marcha un estudo de indentificación e marcaxe selectiva de larvas deste molusco mediante anticorpos monoclonais da man do centro de investigación Cinbio da Universidade de Vigo, o Centro de Investigacións Mariñas (CIMA) e o Intecmar.

Máis actuacións

O proxecto Apromex, ademais de abordar a análise das poboacións de larvas de bivalvo no intermareal rochoso e a súa explotación no litoral da comunidade, tamén aborda a avaliación de novos sistemas de captación de semente en estruturas tipo long-line para a provisión de mexilla ao sector e contribuír á sustentabilidade do cultivo de mexillón, un produto esencial para a acuicultura galega. Trasladar ao sector e outros colectivos interesados os resultados logrados e outro dos ámbitos de traballo. A Consellería do Mar inviste no impulso de diferentes iniciativas para garantir a sustentabilidade e o desenvolvemento deste recurso acuícola estratéxico máis de 1,2 millóns de euros no período 2024-2026.

Mar 31
0

Financiado por Cooperación Galega

By | Novidades | No Comments

CETMAR analiza a situación actual da investigación científica hondureña para as pesqueiras do Golfo de Fonseca nun obradoiro participativo organizado pola área de Cooperación Internacional

  • A actividade formativa, que se completa con outra sobre identificación taxonómica de moluscos nesta zona de Honduras, enmárcase dentro do proxecto que, financiado por Cooperación Galega, ten como obxectivo mellorar a sustentabilidade da actividade marisqueira dos colectivos de mulleres do sur do país.

A área de Cooperación Internacional do Centro Tecnolóxico do Mar-Fundación CETMAR organiza esta semana un obradoiro participativo co obxectivo de analizar a situación actual da investigación científica hondureña para as pesqueiras do Golfo de Fonseca e un seminario básico para a identificación taxonómica de moluscos nesta zona de Honduras, ambos en liña.

Ambas actividades desenvólvense no marco da asistencia técnica para a recuperación e sostibilidade do recurso pesqueiro no Golfo de Fonseca en Honduras e o desenvolvemento das capacidades das administracións e institucións con competencias no sector pesqueiro, mediante o establecemento de procesos de xeración e xestión de coñecemento.

Trátase dunha actuación do proxecto “Mellorar a sostibilidade da actividade pesqueira de colectivos de mulleres do sur de Honduras, Fase 2” que, financiado pola Xunta de Galicia a través de Cooperación Galega, están a desenvolver nese país Enxeñeiros Sen Fronteiras de Galicia, a Universidade da Coruña e o Comité de Defensa e Desenvolvemento da Flora e Fauna do Golfo de Fonseca (CODDEFFAGOLF)

O primeiro dos obradoiros ten como obxectivo analizar, de xeito participativo, as debilidades, ameazas, fortalezas e oportunidades da investigación pesqueira en Honduras co obxectivo de subliñar a importancia de compatibilizar a explotación sostible dos recursos co respecto ao medio mariño, incluída a conservación da biodiversidade, todo iso no marco do código de conduta para a pesca responsable da FAO.

Estará moderado pola coordinadora e técnica da área de Cooperación Internacional do CETMAR, Guadalupe Martín e Mercedes Martínez respectivamente, e celebrarase mañá martes, 1 de abril, a través de Teams, a partir das 17:00 horas. ás 20:00 h. (9:00 a.m. a 12:00 p.m. en Honduras).

O segundo obradoiro, un seminario básico para a identificación taxonómica de moluscos do Golfo de Fonseca, terá lugar o xoves 3 de abril á mesma hora e será impartido por Jesús Souza, catedrático de Zooloxía e profesor de Zooloxía Mariña da Universidade de Vigo, que formará aos participantes nas ferramentas e mecanismos empregados para a identificación de especies.

Mar 31
0

Certificado profesional

By | Novidades | No Comments

O Centro de Formación A Aixola convoca unha nova edición do Curso de confección e mantemento de artes e aparellos, único en Galicia nesta modalidade

  • A formación, que permite obter un certificado profesional de nivel 2, conta cunha elevada taxa de inserción laboral, dada a alta demanda destes profesionais
  • As clases desenvolveranse na sede do centro no Porto de Marín entre abril e xullo, cunha duración total de 390 horas

O Centro de Formación A Aixola, dependente da Consellería do Mar e xestionado polo Centro Tecnolóxico do Mar-Fundación CETMAR, convoca unha nova edición do curso “Confección e mantemento de artes e aparellos”, unha formación gratuíta e única en Galicia que permite obter un certificado profesional de nivel 2, cunha elevada taxa de inserción laboral.

Cunha duración total de 390 horas distribuídas en horario de mañá, o curso desenvolverase entre o 7 de abril e o 11 de xullo próximos e contempla prácticas en empresas. Para obter unha praza nesta acción formativa abonda con ter o título da ESO ou equivalente.

Durante a formación, o alumnado adquirirá competencias para deseñar, confeccionar, reparar e manter redes de pesca e aparellos tradicionais ou mecanizados, adaptándose ás distintas modalidades do sector. A súa superación conduce directamente á obtención do certificado profesional, necesario para darse de alta no réxime do mar.

O curso está especialmente indicado para persoas novas, desempregadas ou vinculadas ao sector pesqueiro que desexen reorientar o seu perfil profesional ou garantir o relevo xeracional nun oficio altamente especializado e en risco de desaparición, pero con demanda nas confrarías e nas empresas do sector marítimo-pesqueiro. Os datos recollidos en edicións anteriores mostran unha elevada inserción laboral entre o alumnado, dada a escaseza de profesionais cualificados neste ámbito.

As prazas son limitadas e a preinscrición xa é posible a través da páxina web (aixola.cetmar.org) ou contactando vía correo electrónico aixola@cetmar.org ou no 886 206915. Na actualidade A Aixola é o único centro acreditado que imparte esta formación.

Mar 31
0

Formación e sostibilidade

By | Novidades | No Comments

CETMAR e os seus socios no proxecto Green avanzan cara á creación da Rede Europea de Formación Profesional Verde

  • A sede do Centro Tecnolóxico do Mar en Vigo acolle mañá 1 de abril unha xornada de debate na que se recollerán recomendacións de profesionais da educación para o impulso desta iniciativa
  • Os avances desta acción europea para a integración da sostibilidade no desempeño profesional presentáronse no congreso FP Innova na Cidade da Cultura de Galicia

O Centro Tecnolóxico do Mar-Fundación CETMAR e os seus socios no proxecto europeo GREEN avanzan cara á creación dunha Rede Europea de Provedores de Formación Profesional Verde (VET, polas súas siglas en inglés), co obxectivo de integrar as habilidades verdes fundamentais nos plans de estudio da formación profesional e proporcionar formación a profesores, formadores e profesionais en sectores industriais estratéxicos.

Co-financiado polo programa ERASMUS +, o consorcio GREEN  está promovendo solucións de formación innovadoras entre os estudantes en formación e a forza laboral, concretamente en seis sectores industriais: automoción, enerxía renovable, baterías, defensa, tecnoloxías marítimas e fabricación Aditiva (AM).

En Galicia, CETMAR testou as formacións deseñadas para a integración da sostibilidade, tanto en contornos industriais como educativos a través de catro cursos pilotos. Estas sesións formativas adaptáronse ás necesidades de cada colectivo, tanto no seu formato como en canto a súa duración, que oscilou entre 4 e 8 horas. 

Así, promoveuse a integración da sostibilidade no desempeño de traballadores da CT, definindo a través da formación 11 medidas de actuación. Tamén se chegou a un total de 40 educadores, proporcionando ferramentas para integrar a sostibilidade nun currículo formativo de maneira práctica e aplicada.

Todos estes resultados foron obxecto de debate no congreso de innovación na  formación profesional, FP Innova, organizado a semana pasada pola Consellería de Educación, Ciencia, Universidades e Formación Profesional na Cidade da Cultura de Galicia, en Santiago de Compostela.

A Rede de Provedores de Educación Verde promovida polo proxecto GREEN conta xa coa participación de tres centros de Galicia: o Centro de formación A Aixola, o CIFP Ferrolterra e a Universidade da Coruña. Deste xeito, están tomando medidas proactivas para equipar a forza laboral europea coas habilidades e coñecementos necesarios para abordar os desafíos que afectan ao mundo laboral e avanzar cara un futuro sostible.

Complementando estas actividades, mañá martes 1 de Abril terá lugar en CETMAR unha xornada de debate na que se recollerán recomendacións para o impulso desta rede de centros formativos para a sostibilidade, e a mellor orientación das súas actividades. 

O evento terá un formato de world café, e está especialmente dirixido a xestores de formación profesional, formación para o emprego e responsables de capacitación na  industria das tecnoloxías marítimas, que poderán participar previo rexistro completando o formulario de inscrición.

Ao reunir a un grupo diverso de expertos da educación, a investigación e a industria, o proxecto GREEN está fomentando o desenvolvemento e a transferencia de habilidades e  coñecementos verdes, contribuíndo en última instancia a un futuro más sostible e próspero para Europa.

O consorcio GREEN está formado por CETMAR, CT INGENIEROS, a Technical University of Ostrava (VSB), Mercantec, la University of Cyprus, o Comite Europeen de Cooperation des Industries de la Machine-Outil Cecimo Aisbl, Olife Corporation AS e AC- Hydraulic A/S, baixo a coordinación da European Federation For Welding, Joining And Cutting (EWF).

Mar 27
0

Transferencia en Capacitamex

By | Novidades | No Comments

CETMAR presenta ao sector mexilloeiro os resultados de investigación e as novas ferramentas de apoio á planificación das campañas de recolección de mexilla

  • O Centro Tecnolóxico do Mar organizou en O Grove o primeiro dos talleres de transferencia previstos no marco do proxecto Capacitamex e dirixido nesta ocasión aos membros da asociación Amegrove
  • Trátase da primeira das xornadas previstas para achegar a ciencia aos produtores e na que participaron expertos do CIMA, da Universidade de Vigo e do IIM-CSIC

A sede da cooperativa de produtores de mexillón Amegrove foi escenario onte do primeiro dos talleres programados polo Centro Tecnolóxico do Mar-Fundación CETMAR no marco do proxecto Capacitamex, que pretende transferir ao sector produtivo os resultados de investigación e as novas ferramentas desenvolvidas para dar apoio ás campañas de recolección de mexilla.

Financiado polo Fondo Europeo Marítimo, de Pesca e de Acuicultura (FEMPA) e pola Consellería do Mar, Capacitamex está a establecer pontes entre a ciencia e o sector produtivo e xerar diálogo entre investigadores e produtores, mostrando de maneira accesible os avances xerados que permiten coñecer o estado do medio mariño e predicir o seus comportamento e as súas repercusións para o cultivo do mexillón, entre outros.

Durante esta primeira xornada os asistentes puideron coñecer de primeira man os resultados de Apromex, un proxecto financiado tamén polo FEMPA e desenvolvido polo Centro de Investigacións Mariñas (CIMA) co apoio técnico do CETMAR, e que abordou no seu día o análise das poboacións de xuvenís de mexillón no intermareal rochoso; a avaliación de novos sistemas de captación de mexilla e o desenvolvemento de sistemas de produción de semente en criadeiro.

Expertos do propio CIMA, do Centro de Investigación en Nanomateriais e Biomedicina da Universidade de Vigo (CINBIO), do Instituto de Investigacións Mariñas (IIM-CSIC) e da Unidade de Tecnoloxías Mariñas do CETMAR foron os encargados de trasladar aos produtores presentes eses e outros resultados de investigación de interese para o sector, así como as novas ferramentas xeradas froito deses estudios.

É o caso dos visores web que permiten acceder aos datos recollidos nas mostraxes de precampaña sobre o estado da poboación de mexilla no litoral galego, así como os relativos as cuantificacións de larvas de mexillón nas rías que se realizan semanalmente, e que agora están a disposición do sector grazas a estas novas ferramentas. A maiores, os investigadores deron conta dos resultados dos últimos estudos científicos que relacionan os afloramentos e ventos dominantes nas rías coa dispoñibilidade de mexilla.

A xornada concluíu cunha presentación a cargo dun técnico do CETMAR sobre as novidades da aplicación para a declaración da recolección de mexilla, tanto en bancos naturais como en cordas colectoras, e que fai posible este trámite a través dun terminal móbil.

Este foi o primeiro dunha serie de obradoiros, deseñados para procurar unha visión común de investigadores, xestores e produtores respecto da importancia do coñecemento sobre o ciclo do mexillón e do análise dos factores ambientais que inflúen nel, facilitando a adaptación aos cambios do entorno e apoiando a sostibilidade ambiental, económica e social do sector mexilloeiro.

Mar 24
0

Proxecto Sol-Ouxa

By | Novidades | No Comments

CIMA e CETMAR conclúen o estudo preliminar sobre a presenza da ouxa no litoral galego e sentan as bases dun futuro proxecto Redemar

  • Na elaboración do documento participaron a Federación Galega de Confrarías de Pescadores e a Unidade Técnica de Pesca (UTPB)
  • O obxectivo foi coñecer o estado actual das poboacións de ouxa no litoral de Galicia

O Centro de Investigacións Mariñas (CIMA) concluiu o estudo preliminar sobre a presenza da ouxa no litoral galego, un traballo no que contou coa colaboración do Centro Tecnolóxico do Mar-Fundación CETMAR e que senta as bases da folla de ruta a seguir neste eido para a posta en marcha dun futuro proxecto Redemar.

A directora xeral de Desenvolvemento Pesqueiro, Marta Villaverde, acompañada pola directora do CETMAR, Rosa Chapela, asistiu ao acto no que se deu conta desta iniciativa, na que, segundo apuntou o director do CIMA, Carlos Gabín, se leva traballando sete meses en colaboración coa Federación Galega de Confrarías de Pescadores, a Unidade Técnica de Pesca de Baixura (UTPB) e o Centro Tecnolóxico do Mar (CETMAR), ademais de contar coas achegas das confrarías de pescadores.

Para a elaboración deste estudo previo integrouse o coñecemento investigador dos técnicos da administración con experiencia no sector pesqueiro e marisqueiro. O obxectivo, entre outros, era coñecer a percepción do sector sobre esta especie pero, sobre todo, poder planificar actividades que permitan coñecer o comportamento e a abundancia, e nun futuro non moi lonxano contar con ferramentas que permitan avaliar e cuantificar o impacto que esta especie provoca sobre os bancos marisqueiros.

Como parte importante deste estudo realizáronse 60 enquisas remitidas desde 10 pósitos, tarefa que se completou con varias entrevistas a colectivos e se finalizou o pasado mes de febreiro cun obradoiro de traballo en Arcade.

O obxectivo era afondar no comportamento desta especie e obter información suficiente que permita adoptar medidas de xestión e convivencia entre a actividade do sector e as poboacións naturais desta especie.

Alcanzar estes obxectivos implicará a monitorización dos cardumes de ouxas través dunha rede de observación que proporcione información sobre os patróns de mobilidade, o rexistro e cuantificación dos avistamentos, as épocas e condicións ambientais que favorezan a súa presenza, os períodos de reprodución e a base da súa alimentación nas distintas idades de crecemento.

Toda esta información será necesaria para facer de xeito obxectivo unha análise das medidas que poidan axudar a mitigar o seu efecto sobre os bancos marisqueiros e abordar un estudo que permita cuantificar as perdas asociadas á incidencia das ouxas sobre a produción marisqueira.

Máis coñecemento

No transcurso do encontro, adiantaron que está previsto que o Instituto Español de Oceanografía (CSIC-IEO) se incorpore a este grupo de traballo, así como máis confrarías de pescadores, que serán o valor máis importante á hora de poder realizar as experiencias que se enmarcan dentro dun futuro proxecto Redemar que, probablemente, verá a luz a finais deste primeiro semestre de 2025.

Todos os avances serán trasladados aos sectores pesqueiro e marisqueiro a través de xuntanzas, obradoiros e documentación, na procura de atopar unha convivencia sustentable entre este peixe e a xente do mar.

Mar 19
0

Semana Marítima Mundial

By | Novidades | No Comments

A directora do CETMAR aposta por situar o peixe e a proteína azul no centro das políticas europeas de seguridade alimentaria

  • No marco da Semana Marítima Mundial, que se celebra en Bilbao, Rosa Chapela avogou por políticas que dean protagonismo ás comunidades costeiras na planificación estratéxica da economía azul
  • A responsable do Centro Tecnolóxico do Mar destacou tamén a importancia da pesca e a acuicultura para a seguridade alimentaria nun relatorio no congreso Eurofishing

A directora-xerente do Centro Tecnolóxico do Mar-Fundación CETMAR, Rosa Chapela Pérez, participou hoxe na Semana Marítima Mundial que se celebra en Bilbao con dous relatorios sobre a importancia da proteína azul e do peixe na seguridade e na soberanía alimentarias e sobre o desenvolvemento sostible da economía azul.

Na súa intervención no marco do Eurofishing, un dos catro congresos que se desenvolven de xeito paralelo e que está dedicado á industria pesqueira, a directora do CETMAR falou da  importancia da pesca e da acuicultura na seguridade e soberanía alimentarias.

Neste eido, recordou que a FAO ven advertindo desde 2014 da importancia da sostibilidade da pesca e da acuicultura para a seguridade alimentaria e que a súa consecución pasa por unha mellor ordenación pesqueira e acuícola, por estratexias de adaptación ao cambio climático e pola protección e fomento da pesca artesanal.

“A proteína azul é fundamental para a saúde humana, o desenvolvemento económico e a sostibilidade do planeta”, afirmou, e defendeu o recoñecemento dese papel clave na resiliencia alimentaria europea e global, así como o reforzo das políticas que promovan o consumo de peixe e a inclusión “real” da pesca e da acuicultura nas estratexias alimentarias das diferentes administracións.

Por outra banda, e na sesión transversal que abriu a Semana Marítima Europea, Rosa Chapela defendeu unha efectiva ordenación do espazo marítimo  e unha planificación marítima participada como claves para o crecemento sostible da economía azul que, afirmou, “depende dunha maior integración entre sectores, o desenvolvemento de novas tecnoloxías e unha regulación que incentive a colaboración”.

A directora do CETMAR recordou que a consolidación dos plans marítimos integrados dos Estados Membros está aínda pendente e incidiu en que a devandita planificación debe integrar todas as actividades da economía azul e debe desenvolverse contando con todos os actores clave (ciencia, administracións, sector marítimo-pesqueiro, ONGs e sociedade).

Mostrouse así partidaria de “establecer prioridades para as actividades tradicionais das que viven as comunidades costeiras, como a pesca, o marisqueo e a acuicultura”, dando paso ademais “ás actividades emerxentes da economía azul”, sempre nun proceso de convivencia.

Insistiu en que a clave para acelerar esa transición sen comprometer a competitividade estaría “en políticas que combinen incentivos económicos, regulacións intelixentes e apoio financeiro” e que “sitúen ás comunidades costeiras no centro”. Deste xeito, engadiu, serán “actores e non vítimas do cambio” desa transición azul sostible, poñendo aos Grupos de Acción Costeira (GALP) de Galicia como exemplo desa implicación.

Para cumprir eses obxectivos, Rosa Chapela resaltou a importancia de medidas de financiación como o Fondo Europeo Marítimo da Pesca e da Acuicultura e avogou porque se manteñan no tempo, permitindo a modernización da flota, a aplicación de tecnoloxías sostibles ou a diversificación das fontes de ingresos. Resaltou tamén como importantes os programas de capacitación de xeito que os traballadores do sector marítimo poidan adaptarse ás novas oportunidades da economía azul ou ás sinerxías que esta poda propiciar.

Semana Marítima Mundial

A World Maritime Week se celebra en Bilbao desde hoxe e ata o 21 de marzo e está sendo punto de encontro dos principais actores da industria marítima mundial. Este foro marítimo reúne cada dous anos a profesionais do sector co obxectivo de establecer alianzas internacionais, compartir información e abordar novos retos do sector. Para elo están programados catro congresos internacionais, ademais dun área de exposicións e dun espazo para o traballo en rede.