Decembro 2013

O curso “Ecodeseño e ecoconstrución en embarcacións de madeira” clausurouse o sábado no Centro de Formación A Aixola de Marín, que xestiona a Fundación CETMAR. Organizada pola  Consellería de Economía e Industria a través da Fundación Centro Galego da Artesanía e do Deseño, esta actividade formativa estaba dirixida a carpinteiros de ribeira en activo, tanto xestores de estaleiros como operarios.

O curso dividiuse en varias sesións que se foron desenvolvendo durante os meses de outubro, novembro e decembro. Os alumnos puideron perfeccionar os seus coñecementos na elaboración de tipos de embarcacións como as gamelas e as piraguas a través das diferentes fases do proceso de construción: o laminado, o encolado, etc.

A entrega de diplomas aos participantes no curso correu a cargo da directora do Centro Tecnolóxico do Mar-Fundación CETMAR, Paloma Rueda Crespo, e da directora xeral de Comercio da Consellería de Economía e Industria, Sol Vázquez, quen estivo acompañada pola  xerente da Fundación Centro Galego da Artesanía e do Deseño, Elena Fabeiro.

O curso clausurado o sábado formou parte da programación da devandita fundación, destinada á especialización dos profesionais do sector artesán, e que este ano chegou a ofertar un total de 17 cursos enfocados no traballo ceramista, na cestería, no téxtil, no coiro e na olería tradicional.

Un dos obxectivos da Consellería de Economía e Industria en materia de artesanía é o de dotar ao sector artesanal de Galicia dos profesionais e técnicos que necesite, mediante unha formación especializada e de perfeccionamento, incidindo especialmente no deseño, a innovación, a aplicación de novas tecnoloxías e a xestión.

Pola outra banda, a Asociación Galega de Carpintería de Ribeira (Agalcari), con sede en Boiro, opta ao Premio Promociona para entidades privadas. O traballo da asociación caracterízase por manter viva a tradición na construción de embarcacións de madeira ao tempo que incorpora as últimas innovacións aparecidas no mercado. A súa aposta é conservar o saber facer dos carpinteiros de ribeira e adaptalo ao contexto dunha economía sostible, conservando o seu valor cultural, e promovendo a divulgación e o uso do patrimonio marítimo.

A cosmética mariña e a nutricosmética ou cosmética de terceira xeración serán protagonistas dun seminario organizado polo Centro Tecnolóxico do Mar, que o 10 de decembro reunirá na súa sede en Vigo a expertos nesta materia e a representantes de empresas do sector para abordar a problemática e as perspectivas de futuro destes produtos.

Durante a xornada, que se desenvolve no marco do proxecto europeo MARMED (http://www.marmedproject.eu/), están previstos relatorios sobre a cosmética e os principios activos de orixe mariña,  o papel das algas e das macromoléculas de orixe mariña na formulación de produtos cosméticos, e sobre os nutricosméticos e cosmocéuticos de orixe mariña.

Abordaranse así diferentes aspectos vinculados á cosmética mariña e, paralelamente, introducirase aos asistentes nunha nova área de traballo como é a nutricosmética, baseada en suplementes nutricionais e alimentos funcionais con beneficios cosméticos, tales como mellorar a saúde da pel, do cabelo ou o aspecto físico en xeral dos seus usuarios.

A asistencia ao seminario é gratuíta e as persoas interesadas en participar deberán inscribirse a través da páxina web da Fundación CETMAR .

Inscrición e programa

Seis técnicos da Subsecretaría de Pesca e Acuicultura de Chile iniciaron hoxe no Centro Tecnolóxico do Mar en Vigo un programa de formación que, organizado pola Fundación CETMAR, pretende reforzar as capacidades  deste equipo de expertos mediante sesións formativas, mesas de traballo e visitas guiadas a centros  e institucións de investigación da Consellería do Medio Rural e do Mar e outros, relacionados con este sector.

A formación, centrada no establecemento de plans de xestión na pesca artesanal, iniciouse hoxe na sede do CETMAR en Vigo e prolongarase ata o vindeiro 10 de decembro. Os técnicos chilenos foron recibidos pola directora-xerente da Fundación galega, Paloma Rueda Crespo, quen lles deu a benvida a Galicia.

Durante a mañá, os técnicos recibiron as primeiras clases teóricas sobre plans de explotación e sobre o ciclo da xestión pesqueira da man de persoal do CETMAR e da Consellería do Medio Rural e do Mar. Esta primeira xornada rematará cunha visita ao Instituto Español de Oceanografía en Vigo.

O programa desenvolverase nos vindeiros días e prevé, entre outras, visitas ao Instituto Galego de Formación en Acuicultura-IGAFA, ao Centro de Formación A Aixola en Marín, ao Centro de Investigacións Mariñas e as instalacións de Gardacostas de Galicia. Tamén están previstas mesas de traballo sobre o servicio de extensión pesqueira, sobre comercialización ou sobre a incidencia da formación no desenvolvemento sectorial.

Tamén haberá tempo para manter encontros con representantes do sector, como a Cooperativa de Armadores de Pesca do Porto de Vigo ou a Confraría de Cangas.