Tag

vigo

Out 21
0

ReMAP

By | Novidades | No Comments

ReMAP presenta en Finlandia dez novas ferramentas para mellorar a ordenación mariña europea

  • ReMap é un proxecto de tráfico mariño no que traballa a área de Socioeconomía da Pesca do CETMAR.
  • O proxecto financiado polo FEMPA amosou os seus resultados en Helsinqui: ferramentas abertas e interoperables para unha xestión mariña máis sostible

O proxecto ReMAP, dedicado a desenvolver ferramentas dixitais para reforzar a monitorización e avaliación dos Plans de Ordenación Espacial Mariña (POEM), presentou os días 14 e 15 de outubro os dez módulos deseñados para especialistas en ordenación mariña europea (OEM) durante o evento ReMAP Hands-on Conference no marco do MSP Data Week en Helsinki (Finlandia).

Durante esa semana os desenvolvedores de ferramentas do proxecto ReMAP impartiron obradoiros nos que reuniron a máis de 90 participantes, cunha representación case plena de todos os Estados Membros, así como de autoridades intergobernamentais como HELCOM-VASAB ou PAP/RAC. Tamén estiveron presentes o Assistance Mechanism, o Grupo de Traballo da Rexión do Báltico (BSR WG) e o Grupo Técnico de Expertos en Datos para MSP (TEG).

Jose Santiago explicando a ferramenta de ReMAP desenvolvida desde CETMAR: un visor de datos socioeconómicos relacionados coa Ordenación Espacial Mariña
MSP Data Week en Helsinki

Despois de tres anos de traballo colaborativo, ReMAP presentou nestes obradoiros dez ferramentas dixitais deseñadas para apoiar a implementación da OEM en Europa. Estas ferramentas destacan por ser independentes, reutilizables, combinables, operativas e de acceso público. O obxectivo das sesións foi ensinar o seu uso mediante exercicios prácticos a diferentes escalas: local, rexional e transfronteiriza. Desde CETMAR levouse o testeo das ferramentas a nivel local ademáis de deseñárse dúas ferramentas: Socioeconomic tool e Gov-tool (en colaboración con Marta Ballesteros -IEO-CSIC). Neste vídeo, o coordinador da área explica a ferramenta socioeconómica:

Os asistentes puideron probar as ferramentas, explorando a súa aplicabilidade en contextos reais e o seu potencial para mellorar a xestión dos espazos mariños e dos seus recursos nas distintas fases dos plans MSP. As ferramentas presentadas non só fortalecen a capacidade operativa dos Estados Membros, tamén promoven unha visión compartida cara a unha ordenación mariña máis sostible, coherente e resiliente.

Ademais das sesións técnicas, a conferencia promoveu o diálogo entre os participantes a través de dúas mesas redondas. A sesión do martes, liderada por Stefano Menegon (CNR-ISMAR), centrouse na creación de espazo para a innovación política. A sesión do mércores, facilitada por Marta Ballesteros (IEO-CSIC), buscou engadir valor ás políticas actuais e co-crear novas recomendacións. Nesta última Jose L. Santiago, coordinador da área de socieoconomía en CETMAR, participou como panelista apelando á necesidade de datos compartidos entre os Estados Membro.

Jose Santiago participando nunha mesa redonda en representación da EMODnet. Xunto a el, Céline Frank (Comisión Europea) e Dmitry Frank-Kamenetsky (HELCOM)

Con esta última reunión, REMAP pecha o seu ciclo, pero deixa abertas novas vías de colaboración e aplicación práctica que seguirán alimentando o desenvolvemento de políticas espaciais mariñas en Europa. Ademais, durante o obradoiro sobre Xemelgos Dixitais do TEG, celebrado o xoves 16, destacouse o labor de ReMAP na recollida de datos e información dos países membro e outros stakeholders. Así mesmo, Massimo Zancanaro mencionou o traballo das geostories, coas que se pode comprender mellor os datos ao seren procesados e presentados dun xeito máis atractivo, algo no que ReMAP contribuíu ao recompilar a información das súas ferramentas en forma de xeohistorias que, con mapas, gráficos e textos, permiten mergullarse no mundo dos 10 módulos sen ter que ser un experto técnico.

Set 02
0

Comparecencia no Parlamento de Galicia

By | Novidades | No Comments

A Xunta destaca a traxectoria do CETMAR como eixo de innovación e investigación no ámbito marítimo pesqueiro

  • Rosa Chapela destacou que apostar polo Cetmar é investir no futuro do mar de Galicia, na súa xente, na súa economía e na súa identidade.
  • A Fundación Cetmar presentou o balance dos seus 24 anos de actividade, resaltando a súa contribución á ciencia mariña, á economía azul e á proxección internacional da comunidade.
Rosa Chapela no Parlamento de Galicia | Fotos: Ana Varela

A directora do Centro Tecnolóxico do Mar-Fundación Cetmar, Rosa Chapela, compareceu hoxe na Comisión 8ª do Parlamento de Galicia para presentar a traxectoria e os retos de futuro da entidade, que está a piques de cumprir 25 anos de actividade.

Na súa intervención, Chapela subliñou o papel estratéxico de Cetmar no ecosistema da ciencia e da innovación mariña, e apelou aos grupos parlamentarios a manter un compromiso que garanta que Cetmar poida seguir sendo unha ferramenta útil para o sector e para a sociedade. A responsable do centro, dependente da Consellería do Mar, afirmou que “Investir en Cetmar é investir no futuro do mar de Galicia; é investir en emprego, en sostibilidade, en ciencia útil e aplicada”.

Cetmar naceu en 2001 por iniciativa da Xunta e o Ministerio de Ciencia e Innovación como fundación pública de interese galego. Con sede en Vigo, pero cunha clara proxección internacional, a súa misión é conectar universidades, centros de investigación, sector pesqueiro e marisqueiro, empresas, administracións e sociedade. Cetmar é unha plataforma de cooperación que ofrece, a través da investigación científica, solucións prácticas para os problemas do mar e da súa xente.

Na actualidade, o centro conta cun equipo de 54 profesionais cunha ampla diversidade de perfís, que reflicten o carácter interdisciplinar do centro. Entre eles atópanse biólogas mariñas, enxeñeiros de distintas ramas, economistas, xuristas, químicas, antropólogos, politólogos e especialistas en formación e transferencia de coñecemento. Esta combinación de capacidades permite traballar de forma integrada en proxectos complexos, que van dende a investigación aplicada ata a cooperación internacional, sempre cun enfoque práctico e orientado ás necesidades do sector e da sociedade galega.

Dúas décadas de investigación e acción

Ao longo de máis de dúas décadas, Cetmar participou activamente en proxectos locais, europeos e internacionais e contribuíu ao fortalecemento da posición galega na economía azul. Os resultados avalan esta traxectoria: 939 socios en 61 países, cooperación en 31 estados, 122 accións en execución cun 61,5% de éxito, 11,1 millóns de euros mobilizados con 31 financiadores e máis de 2.000 alumnos formados no centro de formación A Aixola desde 2004.

A súa actividade abrangue sete áreas especializadas: Control e xestión de recursos mariños, Tecnoloxía dos produtos pesqueiros, Unidade de tecnoloxías mariñas, promoción e transferencia de tecnoloxía, Socioeconomía da pesca, Cooperación internacional e Formación.

Exemplos dalgúns dos proxectos que ten actualmente en marcha son o control das poboacións de ostra rizada e a análise da semente de mexillón, os proxectos fronte ao lixo mariño e contaminantes emerxentes, a implementación de sistemas de observación en colaboración con Portugal, os estudos de impacto económico da pesca e da acuicultura, a formación de máis de dous milleiros de profesionais ou a cooperación con países africanos a través da FAO. Chapela fixo especial fincapé en dous dos proxectos en activo: a formación de profesionais do mar a través do centro de formación A Aixola e a coordinación xeral do proxecto Ciencias Mariñas de Galicia, enmarcado dentro dun proxecto nacional e cun enfoque global e ambicioso do benestar no medio mariño.

Cetmar forma parte tamén de redes e grupos internacionais de referencia, como o Technical Expert Group for MSP (DGMARE), o European Marine Board, PtPROTECMA, NOR-WATER, FAMENET, o RCG Secretariat e ECON ICES, que reforzan a presenza de Galicia na gobernanza mariña a nivel europeo e mundial.

Set 01
0

Batea Sentinela

By | Novidades | No Comments

A Xunta reforza a investigación sobre cultivo de mexillón co proxecto BATEAS

  • A Consellería do Mar, a través do Centro Tecnolóxico do Mar-Fundación Cetmar, desenvolve esta iniciativa que busca analizar os cambios na produción de mexillón e ofrecer ferramentas útiles ao sector 

A iniciativa BATEAS forma parte das actuacións impulsadas pola Consellería do Mar para mellorar a base de coñecemento sobre a evolución do cultivo de mexillón nas rías galegas. O proxecto ten como obxectivo principal comprender mellor as condicións ambientais que inflúen na produtividade das bateas, achegando respostas aos desafíos detectados polo sector nos últimos anos; así como establecer unha canle de comunicación entre bateeiros e administración.

O proxecto está liderado pola  Consellería do Mar e cofinanciado pola Unión Europea a través do Fondo Europeo Marítimo, de Pesca, e de Acuicultura (Fempa). Compleméntase con outras iniciativas en marcha, como o proxecto APROMEX, liderado polo Centro de Investigacións Mariñas de Galicia (CIMA), centrado na avaliación da dispoñibilidade de mexilla, e Capacitamex, orientado á transferencia de coñecemento mediante obradoiros cos produtores, nos que tamén participa activamente o Cetmar.

Entre os logros alcanzados pola iniciativa BATEAS destaca a implantación dun sistema de recollida sistemática de información ambiental a través dunha batea na Ría de Arousa equipada con sensores, que funciona como “batea sentinela”. O desenvolvemento tecnolóxico e técnico realízase desde o Centro Tecnolóxico do Mar-Fundación Cetmar en colaboración cos propietarios da batea, que participan no deseño da solución. Nela instaláronse equipos de monitorización que permiten realizar un seguimento en tempo real de parámetros como a temperatura e a salinidade da auga a distintas profundidades, así como datos meteorolóxicos  e a variación de peso das cordas de mexillón. Esta información compleméntase con outros datos que se recuperan periodicamente durante as visitas de mantemento, como datos de turbidez ou fluorescencia.

A monitorización continua desta infraestrutura permite realizar un seguimento detallado da evolución das condicións ambientais en paralelo ao crecemento do mexillón nas cordas.

Estes datos poden consultarse de forma inmediata a través do portal web de recursos do proxecto APROMEX.

Outro dos piares do traballo é a creación dunha canle de comunicación bidireccional que facilite o intercambio de información entre o sector mexilloeiro e a administración. A través da rede de contactos xerada polos obradoiros Capacitamex, Cetmar mantén un diálogo constante co sector, recollendo información de primeira man sobre o estado dos cultivos e transmitindo á administración as necesidades e prioridades dos produtores. Deste xeito, a Consellería do Mar promove unha xestión máis áxil, eficiente e baseada en datos obxectivos, contribuíndo á sustentabilidade do sector mexilloeiro e á consolidación de Galicia como referente na produción de mexillón.

Ago 25
0

Cooperación Internacional

By | Novidades | No Comments

Cetmar impulsa en Perú o proxecto MARdePiura para fortalecer a economía azul e afrontar o cambio climático

  • Financiada pola Xunta de Galicia a través de Cooperación Galega, Mar de Piura aposta pola innovación acuícola, a sustentabilidade da pesca artesanal e o liderado das mulleres na economía azul.

O Centro Tecnolóxico do Mar-Fundación CETMAR, dependente da Consellería do Mar da Xunta de Galicia, vén de firmar un novo convenio de colaboración ca Consellería de Presidencia, Xustiza e Deportes para a implementacion do proxecto MARdePiura (Mulleres, Acuicultura e Reforzo Institucional para o Desenvolvemento Sostible da economía azul na Rexión de Piura), co obxectivo de contribuír á adaptación ao cambio climático da pesca artesanal e da acuicultura mediante unha estratexia centrada na diversificación e a sustentabilidade.

Financiado pola Xunta de Galicia a través de Cooperación Galega e co apoio do Ministerio da Produción (PRODUCE) peruano —a través da Dirección Xeral de Pesca Artesanal (DGPA) e de FONDEPES—, o proxecto dará continuidade ao traballo desenvolvido nos últimos anos na Baía de Sechura, no noroeste de Perú, con iniciativas como Acuipesca, VerTyCe ou Aquavalora.

Nesta nova etapa, CETMAR traballará estreitamente coas Organizacións Sociais de Pescadores Artesanais (OSPAs) dedicadas ao cultivo da cuncha de abanico (Argopecten Purpuratus). O obxectivo é mellorar a sustentabilidade da cadea produtiva mediante a incorporación de sistemas de aprovisionamento de semente de laboratorio e o reforzo dos protocolos de boas prácticas. Esta liña de acción permitirá incrementar a eficiencia e garantir unha maior resiliencia da actividade fronte aos efectos do cambio climático, asegurando a conservación do recurso.

En paralelo, o proxecto continuará co acompañamento aos emprendementos liderados por mulleres en Sechura, dedicados á comercialización de produtos pesqueiros artesanais. A través da impartición de accións formativas e da elaboración de informes de prospección de mercados, será posible mellorar os estándares de calidade dos produtos ofrecidos e, ao mesmo tempo, favorecer o seu posicionamento en novos mercados.Desta maneira, preténdese mellorar os ingresos destas mulleres e reforzar o seu papel na economía azul local.

Finalmente, o proxecto tamén porá o acento no reforzo das capacidades técnicas das institucións públicas vinculadas tanto á acuicultura como ao turismo mariñeiro-pesqueiro. A través de accións formativas e mesas de coordinación interinstitucional, promoveranse medidas que favorezan a sustentabilidade do sistema produtivo acuícola e a creación de iniciativas de turismo vivencial sostible na rexión de Piura. Este compoñente aspira a diversificar a economía local e a xerar alternativas de desenvolvemento complementarias á pesca artesanal.

Con un orzamento de 106.848,77 euros, o proxecto busca incrementar a sustentabilidade da cadea de valor pesqueira e acuícola, xerar novas oportunidades de negocio e fortalecer a gobernanza institucional para afrontar os retos do cambio climático.

Cooperación Galicia–Perú

O proxecto MARdePiura reforza os estreitos vencellos establecidos entre Galicia e Perú, que contan cunha traxectoria de colaboración de máis de 20 anos. Desde o Plan Director 2006-2009, Perú foi considerado país estratéxico para a Cooperación Galega, unha relación que se mantén no vixente V Plan Director 2023–2026.

En 2004, a Xunta de Galicia e o Ministerio da Produción de Perú asinaron un Memorando de Entendemento sobre Cooperación Pesqueira e Acuícola, renovado en 2014 e que continúa a ser o marco de colaboración que posibilita proxectos como MARdePiura.