Monthly Archives

Outubro 2025

Out 27
0

Foro Empresa Pontevedra

By | Novidades | No Comments

A directora do CETMAR participa no Foro Empresa Pontevedra para falar da xestión do litoral en Galicia

  • Rosa Chapela, directora do CETMAR, presentou a Estratexia Galega de Economía Azul como guía para un mar sostible e competitivo. Destacou o seu encaixe coa nova Lei do Litoral e o impulso a sectores emerxentes.

O Liceo Casino de Pontevedra acolleu hoxe a VI Xornada Triple Hélice. Foro Empresa Pontevedra, un encontro organizado por Foro Empresa Pontevedra coa colaboración e o patrocinio de Santander España, que reuniu representantes da administración, do sector empresarial e do ámbito científico para analizar a nova Lei de ordenación e xestión integrada do litoral de Galicia. A xornada, celebrada en formato xantar-coloquio, centrouse nos retos e oportunidades do novo marco normativo, aprobado pola Xunta de Galicia e recentemente avalado polo Tribunal Constitucional, tras facerse efectivo o traspaso das competencias do litoral á comunidade autónoma o pasado 1 de xullo.

Rosa Chapela, directora do Centro Tecnolóxico do Mar – Fundación CETMAR participou coa ponencia titulada “A Estratexia Galega de Economía Azul: un novo marco para a economía do mar en Galicia”, na que destacou que a Estratexia Galega de Economía Azul (EGEA) define o camiño de Galicia cara a 2030 dentro dun modelo de crecemento sostible baseado no aproveitamento responsable dos recursos mariños e costeiros.

A directora subliñou que a EGEA se articula arredor de tres eixos —sostibilidade ambiental, competitividade económica e cohesión social e territorial— e busca consolidar a Galicia como unha rexión europea líder en economía azul sostible, apoiándose na súa experiencia pesqueira, no potencial científico e tecnolóxico e na capacidade de cooperación entre administración, sector e sociedade civil.

Entre as principais oportunidades que ofrece este marco, mencionou a descarbonización da frota, o impulso ás enerxías renovables mariñas e á biotecnoloxía, o turismo mariñeiro e costeiro, e a formación e o talento azul. A estratexia non deixa de lado actividades tradicionais como a pesca, o marisqueo e a acuicultura, que son consideradas esenciais tanto na EGEA como na Lei do Litoral e conta cun orzamento de 114 millóns de euros ata 2027, destinado a accións como o Observatorio da Economía Azul, programas de formación e proxectos de gobernanza participativa do litoral. Así mesmo, Chapela destacou a coherencia entre a Estratexia e a nova Lei do Litoral, que establece un marco de gobernanza para un desenvolvemento equilibrado do espazo costeiro, resolvendo conflitos de uso e fomentando a colaboración entre sectores tradicionais e emerxentes.

Rosa Chapela concluíu a súa intervención expresando que a Estratexia Galega de Economía Azul representa “un compromiso de país que une tradición e innovación para facer do mar un espazo de futuro sostible, competitivo e inclusivo”.

Out 21
0

ReMAP

By | Novidades | No Comments

ReMAP presenta en Finlandia dez novas ferramentas para mellorar a ordenación mariña europea

  • ReMap é un proxecto de tráfico mariño no que traballa a área de Socioeconomía da Pesca do CETMAR.
  • O proxecto financiado polo FEMPA amosou os seus resultados en Helsinqui: ferramentas abertas e interoperables para unha xestión mariña máis sostible

O proxecto ReMAP, dedicado a desenvolver ferramentas dixitais para reforzar a monitorización e avaliación dos Plans de Ordenación Espacial Mariña (POEM), presentou os días 14 e 15 de outubro os dez módulos deseñados para especialistas en ordenación mariña europea (OEM) durante o evento ReMAP Hands-on Conference no marco do MSP Data Week en Helsinki (Finlandia).

Durante esa semana os desenvolvedores de ferramentas do proxecto ReMAP impartiron obradoiros nos que reuniron a máis de 90 participantes, cunha representación case plena de todos os Estados Membros, así como de autoridades intergobernamentais como HELCOM-VASAB ou PAP/RAC. Tamén estiveron presentes o Assistance Mechanism, o Grupo de Traballo da Rexión do Báltico (BSR WG) e o Grupo Técnico de Expertos en Datos para MSP (TEG).

Jose Santiago explicando a ferramenta de ReMAP desenvolvida desde CETMAR: un visor de datos socioeconómicos relacionados coa Ordenación Espacial Mariña
Consorcio internacional de ReMAP en la MSP Data Week en Helsinki

Despois de tres anos de traballo colaborativo, ReMAP presentou nestes obradoiros dez ferramentas dixitais deseñadas para apoiar a implementación da OEM en Europa. Estas ferramentas destacan por ser independentes, reutilizables, combinables, operativas e de acceso público. O obxectivo das sesións foi ensinar o seu uso mediante exercicios prácticos a diferentes escalas: local, rexional e transfronteiriza. Desde CETMAR levouse o testeo das ferramentas a nivel local ademáis de deseñárse dúas ferramentas: Socioeconomic tool e Gov-tool (en colaboración con Marta Ballesteros -IEO-CSIC). Neste vídeo, o coordinador da área explica a ferramenta socioeconómica:

Os asistentes puideron probar as ferramentas, explorando a súa aplicabilidade en contextos reais e o seu potencial para mellorar a xestión dos espazos mariños e dos seus recursos nas distintas fases dos plans MSP. As ferramentas presentadas non só fortalecen a capacidade operativa dos Estados Membros, tamén promoven unha visión compartida cara a unha ordenación mariña máis sostible, coherente e resiliente.

Ademais das sesións técnicas, a conferencia promoveu o diálogo entre os participantes a través de dúas mesas redondas. A sesión do martes, liderada por Stefano Menegon (CNR-ISMAR), centrouse na creación de espazo para a innovación política. A sesión do mércores, facilitada por Marta Ballesteros (IEO-CSIC), buscou engadir valor ás políticas actuais e co-crear novas recomendacións. Nesta última Jose L. Santiago, coordinador da área de socieoconomía en CETMAR, participou como panelista apelando á necesidade de datos compartidos entre os Estados Membro.

Jose Santiago participando nunha mesa redonda en representación da EMODnet. Xunto a el, Céline Frank (Comisión Europea) e Dmitry Frank-Kamenetsky (HELCOM)

Con esta última reunión, REMAP pecha o seu ciclo, pero deixa abertas novas vías de colaboración e aplicación práctica que seguirán alimentando o desenvolvemento de políticas espaciais mariñas en Europa. Ademais, durante o obradoiro sobre Xemelgos Dixitais do TEG, celebrado o xoves 16, destacouse o labor de ReMAP na recollida de datos e información dos países membro e outros stakeholders. Así mesmo, Massimo Zancanaro mencionou o traballo das geostories, coas que se pode comprender mellor os datos ao seren procesados e presentados dun xeito máis atractivo, algo no que ReMAP contribuíu ao recompilar a información das súas ferramentas en forma de xeohistorias que, con mapas, gráficos e textos, permiten mergullarse no mundo dos 10 módulos sen ter que ser un experto técnico.

Out 14
0

Chile

By | Novidades | No Comments

CETMAR COLABORA EN CHILE NA DEFINICIÓN DA METODOLOXÍA PARA MEDIR O CONSUMO DE PRODUTOS DO MAR

  • O coordinador da área de Socioeconomía do Cetmar, Jose Luis Santiago, leva a súa experiencia a Chile para coñecer e mellorar o consumo de peixe por habitante.
  • O Goberno chileno busca aumentar o consumo de peixe a 20kg por habitante e ano en 2027

Jose Luis Santiago, coordinador da área de Socioeconomía do Centro Tecnolóxico do Mar (Cetmar), participou no taller de revisión e validación metodolóxica do consumo per cápita de produtos do mar en Chile, que busca establecer unha metodoloxía para coñecer o cosumo per cápita e ano de productos do mar en Chile. O encontró celebrouse en Viña del Mar os días 1 e 2 de outubro.

A iniciativa, organizada polo Instituto de Fomento Pesquero (IFOP) a petición da Subsecretaría de Pesca e Acuicultura de Chile (SSPA), buscou reforzar os procedementos estatísticos que permiten calcular canto peixe e marisco come a poboación chilena. Este indicador, de carácter estratéxico para as políticas públicas, forma parte dos compromisos do Goberno de Chile para incrementar o consumo nacional de produtos do mar ata os 20 kg por habitante e ano en 2027.

No encontro participaron organismos de prestixio internacional como a Organización das Nacións Unidas para a Alimentación e a Agricultura (FAO), referente mundial en seguridade alimentaria, o Observatorio Europeo do Mercado dos Produtos da Pesca e da Acuicultura (Eumofa), especializado na análise de mercados, e o propio Cetmar, fundación galega recoñecida pola súa experiencia en investigación aplicada e cooperación internacional no ámbito mariño.

Durante dúas xornadas analizáronse diferentes enfoques metodolóxicos, desde o modelo “agregado” ata un enfoque “mixto” que permite desagregar o consumo por especies clave como salmón, xurelo, mexillón ou pescada. A revisión tamén abordou aspectos como a actualización dos factores de conversión, o tratamento de datos incompletos ou a pertinencia de incorporar existencias dun ano a outro.

No marco destas sesións, Jose Luis Santiago achegou a experiencia de Cetmar na construción de indicadores socioeconómicos e na comparación internacional de datos, contribuíndo a un debate que permitirá a Chile dispoñer de cifras máis sólidas e un modelo de cálculo replicable en outros países.

Out 14
0

Rede Española de Grupos de Pesca

By | Novidades | No Comments

GALICIA COMPARTE EN MADRID OS SEUS AVANCES NO DESENVOLVEMENTO LOCAL PARTICIPATIVO DAS COMUNIDADES COSTEIRAS

A directora xeral de Desenvolvemento Pesqueiro, Ángeles V. Suárez, e a directora xerente do Cetmar, Rosa Chapela, participaron este martes na sesión técnica da Rede Española de Grupos de Pesca (Regp), onde todas as comunidades autónomas deron conta da evolución e desenvolvemento dos proxectos impulsados polos Grupos de Acción Local do Sector Pesqueiro (Galp) como axentes dinamizadores da economía litoral en Galicia.

No transcurso da xuntanza, as representantes da Consellería do Mar, detallaron que este entes, creados polo departamento que dirixe Marta Villaverde, impulsan 160 proxectos no litoral galego por valor de 9,7 millóns de euros, cofinanciados polo Fondo Europeo Marítimo de Pesca e de Acuicultura (Fempa) 2021-2027. A este respecto, destallaron que o 60% destas iniciativas son destinados a actividades sen fins de lucro e o 40% restante a actividade económica, que mobilizan en conxunto un investimento privado de 6,1 millóns de euros.

Trátase de accións que permiten afondar na colaboración público-privada impulsando o desenvolvemento económico e competitividade de Galicia, cun impacto singular nas comunidades costeiras. Supoñen a creación de 70 empregos a tempo completo e abordan ámbitos como o aproveitamento do patrimonio cultural e medioambiental das zonas pesqueiras, a innovación e promoción da produción e subministro de produtos da pesca e da acuicultura ou o fomento da economía azul, entre outros. En Galicia existen 8 Galp que aglutinan a máis de 400 organizacións locais, que representan a máis de 13.000 profesionais do mar.