GALICIA COMPARTE EN MADRID OS SEUS AVANCES NO DESENVOLVEMENTO LOCAL PARTICIPATIVO DAS COMUNIDADES COSTEIRAS
A directora xeral de
Desenvolvemento Pesqueiro, Ángeles V. Suárez, e a directora xerente do Cetmar,
Rosa Chapela, participaron este martes na sesión técnica da Rede Española de
Grupos de Pesca (Regp), onde todas as comunidades autónomas deron conta da evolución
e desenvolvemento dos proxectos impulsados polos Grupos de Acción Local do
Sector Pesqueiro (Galp) como axentes dinamizadores da economía litoral en
Galicia.
No transcurso da xuntanza, as
representantes da Consellería do Mar, detallaron que este entes, creados polo
departamento que dirixe Marta Villaverde, impulsan 160 proxectos no litoral
galego por valor de 9,7 millóns de euros, cofinanciados polo Fondo Europeo
Marítimo de Pesca e de Acuicultura (Fempa) 2021-2027. A este respecto, destallaron que o 60% destas
iniciativas son destinados a actividades sen fins de lucro e o 40% restante a
actividade económica, que mobilizan en conxunto un investimento privado de 6,1
millóns de euros.
Trátase de accións que permiten
afondar na colaboración público-privada impulsando o desenvolvemento económico
e competitividade de Galicia, cun impacto singular nas comunidades costeiras.
Supoñen a creación de 70 empregos a tempo completo e abordan ámbitos como o
aproveitamento do patrimonio cultural e medioambiental das zonas pesqueiras, a
innovación e promoción da produción e subministro de produtos da pesca e da
acuicultura ou o fomento da economía azul, entre outros. En Galicia existen 8
Galp que aglutinan a máis de 400 organizacións locais, que representan a máis
de 13.000 profesionais do mar.
A directora de Cetmar participa en Aquaculture Europe 2025, o maior congreso europeo de acuicultura
A
directora de CETMAR, Rosa Chapela, participa esta semana en Aquaculture Europe
2025, en Valencia. Intervirá na mesa redonda “Attracting new talents in
aquaculture” e modera unha sesión sobre economía.
Rosa Chapela na intervención do mércores 24
A directora do Centro Tecnolóxico do Mar CETMAR,
Rosa Chapela, participa esta semana en Aquaculture Europe 2025, un evento que
se celebra no Palacio de Congresos de Valencia ata o xoves 25 de setembro e que
reúne a profesionais da acuicultura de máis de 70 países.
Baixo o lema “Aquaculture for Everyone”, o
congreso aborda cuestións clave como a sustentabilidade ambiental, a
rexeneración dos sectores primarios e o desenvolvemento do capital humano. Un
dos seus obxectivos é reforzar o papel da acuicultura como elemento estratéxico
na seguridade alimentaria global.
Trátase do maior evento celebrado nunca no Palacio de Congresos de
Valencia e combina sesións científicas, foros sectoriais, obradoiros de
innovación e actividades específicas para estudantes,
Rosa Chapela intervirá o mércores 24 de setembro
na mesa redonda “Attracting new talents in aquaculture”, xunto a representantes
de centros de investigación, asociacións e empresas líderes do sector. O debate
centrarase nos desafíos da industria relacionados coa atracción e retención de
talento, a remuda xeracional e o avance en materia de igualdade de xénero,
analizando como a diversidade e a inclusión poden impulsar a innovación e a
resiliencia do sector.
O xoves 25, Chapela actuará como moderadora na sesión Market &
Value Chain Economics, xunto ao profesor noruegués Ragnar Tveterås. Trátase
dunha das poucas sesións do congreso que aborda especificamente a dimensión
económica e de mercados dos produtos da acuicultura, un ámbito clave para
garantir a viabilidade do sector.
A organización convidou á directora do CETMAR a
coordinar esta sesión con antelación, apoiando na procura de contribucións e
presentacións orais que permitisen dar forma a este espazo de debate. O
programa inclúe intervencións sobre temas tan relevantes como o marco regulador
da acuicultura na UE, as tendencias na cadea de valor da acuicultura e a súa
competitividade e o papel da economía azul como motor de novas oportunidades de
negocio en acuicultura.
Con esta dobre participación no congreso Rosa
Chapela reforza a visibilidade da acuicultura galega nun dos foros
internacionais máis relevantes para o futuro da acuicultura.
Galicia define a súa Estratexia de Observación Mariña para un uso máis eficiente e sostible dos recursos
O Programa de Ciencias Mariñas de Galicia, está a deseñar a Estratexia de Observación e Monitorización do medio mariño de Galicia, un plan que permitirá aproveitar mellor os recursos xa existentes, cubrir necesidades detectadas e anticiparse aos desafíos ambientais, sociais e económicos que afectan ao noso mar.
O obxectivo é contar cun sistema de observación máis eficiente, coordinado e sostible, que sexa útil tanto para a comunidade científica como para sectores produtivos, administracións, entidades de conservación ou mesmo o turismo e a divulgación. A Estratexia recollerá propostas que melloren a eficiencia, a capacidade de resposta, a gobernanza e a comunicación dos sistemas de monitorización do medio mariño, e estará rematada a finais de 2025.
Neste contexto, o Centro Tecnolóxico do Mar CETMAR acolleu o terceiro obradoiro participativo. Nel participaron 33 representantes de entidades e sectores moi diversos, entre eles MeteoGalicia, a Subdirección Xeral de Investigación e Apoio Científico-Técnico da Consellería do Mar, o INEGA, GALP, o Instituto de Investigacións Mariñas (IIM-CSIC), o Instituto Español de Oceanografía (IEO-CSIC), a Universidade da Coruña, a Universidade de Vigo, CIMA, IGAFA, as Autoridades Portuarias da Coruña e Vigo, confrarías de Pontevedra e Cambados, a Federación Galega de Confrarías, CEMMA, BDRI, INTECMAR e CETMAR. A diversidade de perfís implicados garante que a futura Estratexia sexa unha ferramenta útil e realista, que responda ás necesidades de todos os axentes vinculados ao mar en Galicia.
O proxecto europeo TransformAr celebra o seu evento final en Bruxelas coa participación galega de CETMAR e da Consellería do Mar
O proxecto europeo TransformAr chega á súa conclusión tras catro anos de traballo orientado ao desenvolvemento de solucións de resiliencia fronte ao cambio climático en rexións e cidades europeas. Entre os seus principais resultados destaca a coordinación, por parte do CETMAR, dun demostrador en Galicia centrado na adaptación do sector produtor de bivalvos aos efectos do cambio climático.
O evento final do proxecto celebrouse o pasado 11 de setembro en Bruxelas, no espazo Jardin Hospice, e reuniu representantes da Comisión Europea, gobernos rexionais, centros de investigación e axentes de distintos sectores.
Durante o encontro Manuel García Tasende, xefe de Servizo de Innovación Tecnolóxica da Acuicultura da Consellería do Mar da Xunta de Galicia, participou presentando o interese da Dirección Xeral nos resultados acadados polo demostrador galego. Na súa intervención, destacou tamén as propostas de accións de resiliencia identificadas para impulsar a adaptación do sector mexilloeiro, algunhas das cales continúan a desenvolverse a través de proxectos como:
CAPACTAMEX, que promove o diálogo entre o sector mexilloeiro, a Administración e a comunidade investigadora.
O evento puxo de relevo a necesidade de reforzar a resiliencia das rexións europeas fronte ao cambio climático, máis alá do concepto clásico de “adaptación”. Neste sentido, subliñouse o papel das organizacións de interface, como CETMAR, que facilitan o diálogo entre administracións rexionais, investigadores, industria e sociedade civil para deseñar e implementar propostas innovadoras e sostibles.
TransformAr supuxo un paso adiante na procura de solucións innovadoras e transferibles que poidan aplicarse en diferentes territorios europeos para afrontar os retos que presenta o cambio climático.
A Xunta reforza a investigación sobre cultivo de mexillón co proxecto BATEAS
A Consellería do Mar, a través do Centro Tecnolóxico do Mar-Fundación Cetmar, desenvolve esta iniciativa que busca analizar os cambios na produción de mexillón e ofrecer ferramentas útiles ao sector
A iniciativa BATEAS forma parte das actuacións impulsadas pola Consellería do Mar para mellorar a base de coñecemento sobre a evolución do cultivo de mexillón nas rías galegas. O proxecto ten como obxectivo principal comprender mellor as condicións ambientais que inflúen na produtividade das bateas, achegando respostas aos desafíos detectados polo sector nos últimos anos; así como establecer unha canle de comunicación entre bateeiros e administración.
O proxecto está liderado pola Consellería do Mar e cofinanciado pola Unión
Europea a través do Fondo Europeo Marítimo, de Pesca, e de Acuicultura (Fempa).
Compleméntase con outras iniciativas en marcha, como o proxecto APROMEX,
liderado polo Centro de Investigacións Mariñas de Galicia (CIMA), centrado na
avaliación da dispoñibilidade de mexilla, e Capacitamex, orientado á
transferencia de coñecemento mediante obradoiros cos produtores, nos que tamén
participa activamente o Cetmar.
Entre os logros alcanzados pola iniciativa BATEAS destaca a implantación dun sistema de recollida sistemática de información ambiental a través dunha batea na Ría de Arousa equipada con sensores, que funciona como “batea sentinela”. O desenvolvemento tecnolóxico e técnico realízase desde o Centro Tecnolóxico do Mar-Fundación Cetmar en colaboración cos propietarios da batea, que participan no deseño da solución. Nela instaláronse equipos de monitorización que permiten realizar un seguimento en tempo real de parámetros como a temperatura e a salinidade da auga a distintas profundidades, así como datos meteorolóxicos e a variación de peso das cordas de mexillón. Esta información compleméntase con outros datos que se recuperan periodicamente durante as visitas de mantemento, como datos de turbidez ou fluorescencia.
A monitorización continua desta infraestrutura permite realizar un seguimento detallado da evolución das condicións ambientais en paralelo ao crecemento do mexillón nas cordas.
Outro dos piares do traballo é a creación dunha canle de comunicación bidireccional que facilite o intercambio de información entre o sector mexilloeiro e a administración. A través da rede de contactos xerada polos obradoiros Capacitamex, Cetmar mantén un diálogo constante co sector, recollendo información de primeira man sobre o estado dos cultivos e transmitindo á administración as necesidades e prioridades dos produtores. Deste xeito, a Consellería do Mar promove unha xestión máis áxil, eficiente e baseada en datos obxectivos, contribuíndo á sustentabilidade do sector mexilloeiro e á consolidación de Galicia como referente na produción de mexillón.
Cetmar impulsa en Perú o proxecto MARdePiura para fortalecer a economía azul e afrontar o cambio climático
Financiada pola Xunta de Galicia a través de Cooperación Galega, Mar de Piura aposta pola innovación acuícola, a sustentabilidade da pesca artesanal e o liderado das mulleres na economía azul.
O Centro
Tecnolóxico do Mar-Fundación CETMAR, dependente da Consellería do Mar da
Xunta de Galicia, vén de firmar un novo convenio de colaboración ca
Consellería de Presidencia, Xustiza e Deportes para a implementacion do proxecto
MARdePiura (Mulleres, Acuicultura e Reforzo Institucional para o
Desenvolvemento Sostible da economía azul na Rexión de Piura), co obxectivo de
contribuír á adaptación ao cambio climático da pesca artesanal e da acuicultura
mediante unha estratexia centrada na diversificación e a sustentabilidade.
Financiado pola Xunta de Galicia a través de Cooperación Galega e co apoio do Ministerio da Produción (PRODUCE) peruano —a través da Dirección Xeral de Pesca Artesanal (DGPA) e de FONDEPES—, o proxecto dará continuidade ao traballo desenvolvido nos últimos anos na Baía de Sechura, no noroeste de Perú, con iniciativas como Acuipesca, VerTyCe ou Aquavalora.
Nesta nova etapa, CETMAR traballará estreitamente coas Organizacións Sociais de Pescadores Artesanais (OSPAs) dedicadas ao cultivo da cuncha de abanico (Argopecten Purpuratus). O obxectivo é mellorar a sustentabilidade da cadea produtiva mediante a incorporación de sistemas de aprovisionamento de semente de laboratorio e o reforzo
dos protocolos de boas prácticas. Esta liña de acción permitirá incrementar a
eficiencia e garantir unha maior resiliencia da actividade fronte aos efectos
do cambio climático, asegurando a conservación do recurso.
En paralelo, o proxecto continuará co acompañamento aos emprendementos liderados por mulleres en Sechura, dedicados á comercialización de produtos pesqueiros artesanais. A través da impartición de accións formativas e da elaboración de informes de prospección de mercados, será posible mellorar os estándares de calidade dos produtos ofrecidos e, ao mesmo tempo, favorecer o seu posicionamento en novos mercados.Desta maneira, preténdese mellorar os ingresos destas mulleres e reforzar o seu papel na economía azul local.
Finalmente, o proxecto tamén porá o acento no reforzo das capacidades técnicas das institucións públicas vinculadas tanto á acuicultura como ao turismo mariñeiro-pesqueiro. A través de accións formativas e mesas de coordinación interinstitucional, promoveranse medidas que favorezan a sustentabilidade do sistema produtivo acuícola e a creación de iniciativas de turismo vivencial sostible na rexión de Piura. Este compoñente aspira a diversificar a economía local e a xerar alternativas de desenvolvemento complementarias á pesca artesanal.
Con un orzamento de 106.848,77 euros, o proxecto busca incrementar a sustentabilidade da cadea de valor pesqueira e acuícola, xerar novas oportunidades de negocio e fortalecer a gobernanza institucional para afrontar os retos do cambio climático.
Cooperación Galicia–Perú
O proxecto
MARdePiura reforza os estreitos vencellos establecidos entre Galicia e Perú,
que contan cunha traxectoria de colaboración de máis de 20 anos. Desde o
Plan Director 2006-2009, Perú foi considerado país estratéxico para a
Cooperación Galega, unha relación que se mantén no vixente V Plan Director
2023–2026.
En 2004, a Xunta
de Galicia e o Ministerio da Produción de Perú asinaron un Memorando
de Entendemento sobre Cooperación Pesqueira e Acuícola, renovado en 2014 e
que continúa a ser o marco de colaboración que posibilita proxectos como
MARdePiura.
CETMAR pecha o ano con 52 proxectos e servizos en marcha e un presuposto para 2025 que supera os 4,5 millóns de euros
O Padroado da Fundación aprobou hoxe o plan de actuación e o orzamento do centro para 2025 nunha reunión ordinaria presidida polo conselleiro do Mar, Alfonso Villares
O Centro Tecnolóxico do Mar pecha un exercicio no que traballou en mais de sesenta accións relacionadas coa gobernanza mariña, a xestión de recursos a observación mariña, a formación ou a cooperación internacional, entre outros ámbitos
O Padroado do Centro Tecnolóxico do Mar-Fundación CETMAR reuniuse esta mañá na sede da institución en Vigo nun encontro presidido polo conselleiro do Mar, Alfonso Villares, como vicepresidente do mesmo, e no que a súa directora-xerente, Rosa Chapela, fixo balance do exercicio 2024 e presentou o plan de actuación e o presuposto para 2025, que supera os 4,5 millóns de euros.
A institución dependente da Consellería do Mar
traballa na actualidade en 52 proxectos e servizos, a maioría de ámbito
internacional, relacionados coa gobernanza mariña, a loita contra a
contaminación no mar, a xestión dos recursos mariños, a formación, a
cooperación internacional ou a observación mariña e a promoción e transferencia
de tecnoloxía, entre outros campos de actividade.
A directora-xerente do Cetmar deu conta aos
membros do Padroado das accións levadas a cabo no exercicio 2024, cando os
técnicos da institución galega estiveron involucrados nun total de 62 proxectos
e servizos que na súa maioría continuarán ao longo do ano 2025. Ademais de dar
continuidade a este traballos, a Fundación galega está pendente da resolución
de oito novas propostas presentadas a diferentes convocatorias nos últimos
meses.
O Centro Tecnolóxico do Mar mantén a súa liña de
traballo en torno á loita contra a contaminación mariña en proxectos como
Free-Litter AT, centrado na prevención, monitorización e redución do lixo
mariño, ou BlueWWater, para o tratamento, control e redución de microplásticos
e contaminantes emerxentes.
No ámbito da gobernanza mariña, Cetmar traballa en
diferentes proxectos e servizos relacionados coa ordenación espacial mariña
-Remap-MSP, POEM- e en diferentes tarefas de apoio aos Grupos de Coordinación
Rexional (RCGs) por encargo da Comisión Europea, así como aos Grupos de Acción
Local do Sector Pesqueiro galego, nun servizo da Consellería do Mar.
A maioría dos proxectos e servizos relacionados
coa xestión de recursos mariños nos que o Centro traballou neste ano
proseguirán no 2025, como é o caso de Transformar, que busca solucións para a
adaptación ao cambio climático, no caso de Galicia, nos sectores do mexillón e
do marisqueo a pe, ou Apromex, no que apoia ao CIMA no análise das poboacións
de semente de mexillón.
Tamén neste ámbito, Cetmar desenvolve xunto a dous
grandes consorcios europeos proxectos para minimizar e eliminar a captura
accidental de especies prioritarias en perigo de extinción, ameazadas e
protexidas (LIFE Cibbrina) e reducir as capturas incidentais de megafauna
mariña -aves, tartarugas, eslamobranquios e cetáceos-.
O Centro Tecnolóxico do Mar proseguirá no 2025 cos diferentes traballos relacionados co mantemento da rede de observación do Observatorio Costeiro da Xunta de Galicia, así como coa análise de datos a través da súa implicación na Rede Europea de Observación e Datos Mariños (Emodnet), no Observatorio Europeo para os Produtos da Pesca e Acuicultura (Eumofa) ou no Observatorio Europeo da Economía Azul.
Utilizamos cookies para asegurar que damos la mejor experiencia al usuario en nuestra web. Si sigues utilizando este sitio asumiremos que estás de acuerdo.ValePolítica de privacidad
