Tag

CETMAR

Feb 26
0

Esparde

By | Novidades | No Comments

Cetmar avalía os efectos da protección e ordenación mariña na pesca artesanal e costeira do Cantábrico

  • Co financiamento da Fundación Biodiversidad, a institución galega traballará xunto ao Instituto Español de Oceanografía e á Universidad de Oviedo no desenvolvemento do proxecto Esparde, cuxo obxectivo é estudar o impacto social, económico e ambiental do desprazamento das flotas pesqueiras de pequena escala
  • A iniciativa analizará como as restricións nos caladoiros modifican a actividade das embarcacións con base en Galicia, Asturias e Cantabria, co fin de mellorar o deseño das políticas mariñas.

O Centro Tecnolóxico do Mar (Cetmar) traballará nos vindeiros dous anos no proxecto “Esparde-Efectos do Desprazamento Espacial de Flotas Pesqueiras Artesanais e Costeiras Derivados da Conservación e a Planificación do Medio Marino”, unha iniciativa que analiza como as medidas de protección e ordenación do medio mariño inflúen nos desprazamentos da pesca artesanal e costeira no Cantábrico, así como na sostibilidade das comunidades pesqueiras.

Enmarcado no Programa Pleamar 2025, Esparde ten como obxectivo comprender mellor os efectos sociais, económicos e ambientais derivados da reubicación das flotas de pequena escala como consecuencia das restricións espaciais nos caladoiros. “Esparde” pon o foco en embarcacións con porto base en Galicia, Asturias e Cantabria, especialmente naquelas que operan en zonas suxeitas a limitacións actuais ou futuras.

A iniciativa aborda un dos principais retos da política pesqueira actual: como as medidas de conservación modifican os patróns de pesca e condicionan a actividade das flotas artesanais. Tradicionalmente, moitas avaliacións ambientais asumiron que estas embarcacións poden reubicarse sen consecuencias relevantes, unha premisa que non reflicta a complexidade real do sector nin as súas limitacións operativas.

Para dar resposta a este desafío, o proxecto desenvolve metodoloxías interdisciplinarias que permiten avaliar con maior precisión o impacto territorial, ambiental e socioeconómico do desprazamento das flotas. A análise dos cambios na actividade pesqueira e dos costes asociados para os profesionais do sector facilita unha comprensión máis realista das consecuencias das restricións espaciais.

“Esparde” configúrase, ademais, como un proxecto innovador, baseado na colaboración entre a comunidade científica e o sector pesqueiro. Entre as súas principais liñas de traballo destacan a aplicación de técnicas econométricas para medir impactos, o uso de datos de alta precisión sobre a actividade espacial das flotas e o desenvolvemento de modelos para predicir os efectos da súa reubicación en distintos contextos.

De forma pioneira, o proxecto tamén analiza os posibles efectos negativos que o desprazamento das embarcacións pode xerar en novas zonas de pesca, mesmo cando a reubicación responde a obxectivos de protección de hábitats e ecosistemas mariños.

Os investigadores confían en que as metodoloxías desenvolvidas se poidan aplicar a outros eidos de conservación e ao deseño de políticas públicas, incorporando de forma máis realista as prácticas tradicionais, os coñecementos locais e as limitacións das comunidades pesqueiras artesanais. Este enfoque contribúe a unha xestión máis equilibrada, sustentable e socialmente xusta do medio mariño.

Alén das entidades investigadoras mencionadas, o proxecto conta coa colaboración da Fundación Biodiversidade do Ministerio para a Transición Ecolóxica e o Reto Demográfico, a través do programa Pleamar, e está cofinanciado pola Unión Europea mediante o Fondo Europeo Marítimo, de Pesca e Acuicultura (Fempa). 

Feb 11
0

Free LitterAT

By | Novidades | No Comments

A Pesca de Lixo no marco da Directiva PRF: experiencias e retos no Atlántico

  • O 6 de febreiro de 2026, o proxecto Free LitterAT organizou o seminario web titulado “Fishing for Litter in the frame of PRF directive: experiences and challenges in the Atlantic”, co obxectivo de intercambiar experiencias e identificar os retos derivados da implementación da Directiva (UE) 2019/883 sobre as instalacións portuarias de recepción de residuos xerados polos buques (Directiva PRF) e a súa conexión cos esquemas de Pesca de Lixo que veñen desenvolvéndose desde hai varios anos nos países europeos coa colaboración dos pescadores.

O evento, moderado desde a UBS, serviu como foro de intercambio de coñecemento entre representantes da Comisión Europea (DG Move), o Convenio OSPAR, KIMO, administracións competentes dos países do Espazo Atlántico (Irlanda, Francia, Portugal e España), portos e centros tecnolóxicos, permitindo compartir perspectivas sobre a xestión actual dos residuos pescados de maneira non intencionada, así como sobre os avances acadados e os retos pendentes para aliñar as prácticas operativas co marco normativo europeo.

Tras unha presentación xeral do contexto xurídico da Unión Europea, abordouse o papel da Directiva PRF na definición dos procedementos de seguimento, notificación e xestión do lixo mariño capturado pasivamente polos buques pesqueiros. Neste sentido, púxose de relevo a importancia de aplicar enfoques harmonizados na recompilación e comunicación de datos, así como de garantir a coherencia entre as prácticas nacionais e os requisitos establecidos a nivel europeo. Así mesmo, presentouse unha panorámica das accións impulsadas no marco do Convenio OSPAR en relación cos esquemas de Pesca de Lixo, abordando o seu grao de implementación no Atlántico Nordeste, as obrigas derivadas do Convenio e a súa aliñación coa Estratexia OSPAR 2030, en particular co Obxectivo Estratéxico 4 orientado á redución do lixo mariño, así como os principais avances, retos e oportunidades identificados, destacando o financiamento como un dos factores clave para a súa sustentabilidade a longo prazo.

CETMAR presentou os primeiros resultados do proxecto Free LitterAT arredor da temática do seminario, ofrecendo unha visión do estado de implementación da Directiva PRF, das prácticas actuais de xestión de residuos nos portos e da experiencia nos esquemas de pesca de lixo nos países participantes, subliñando a importancia de aproveitar a experiencia adquirida nestes proxectos para afrontar os requisitos da Directiva. Na presentación amosáronse tamén os recursos que o proxecto está a xerar: guías para a implantación das Directivas SUP e PRF, un inventario de boas prácticas e un paquete formativo que inclúe guía e infografías para reforzar a xestión deste tipo de residuos. Estes recursos estarán dispoñibles en https://goodpractices.freelitterat.eu/ e na web do proxecto https://freelitterat.eu/.

KIMO compartiu a súa ampla traxectoria no ámbito do lixo mariño, destacando a iniciativa Fishing for Litter, lanzada nos Países Baixos en 2004 e actualmente activa en 11 países europeos. Recoñecida como boa práctica pola Comisión Europea, HELCOM e OSPAR, KIMO coordina proxectos no Reino Unido, nos Países Baixos e en Bélxica, traballando estreitamente cos pescadores para recoller residuos, ofrecer orientación e recursos educativos e promover a reciclaxe, incluídos proxectos piloto como a Isle of Skye Fisheries Recycling Coalition en 2025.

Unha parte específica do seminario dedicouse á exposición de experiencias prácticas na Pesca de Lixo e na xestión dos residuos pesqueiros e portuarios en Portugal e España, Irlanda e Francia, nas que representantes de organismos públicos e entidades xestoras como DOCAPESCA, MITERD, MTU e Repechon les Oceans compartiron a súa experiencia e diferentes modelos organizativos e solucións operativas para facilitar a recepción, caracterización e tratamento adecuado dos residuos desembarcados nos portos, así como os recursos xerados para facilitar a súa xestión. Este é o caso do documento “Criterios Xerais para a Implantación de Esquemas de Pesca de Lixo” desenvolvido polo MITERD no marco do proxecto LIFE IP INTEMARES. Estas intervencións puxeron de manifesto a importancia da cooperación entre pescadores, autoridades portuarias, xestores de residuos e administracións competentes.

O Porto de Vigo destacou a mellora das instalacións de recepción, a experiencia en proxectos de residuos pescados incidentalmente e na limpeza de dársenas, subliñando a importancia de contar con infraestruturas e protocolos eficientes. AIMPLAS achegou a súa experiencia como centro tecnolóxico con ampla traxectoria no desenvolvemento de procesos de reciclaxe, así como a súa visión sobre os principais desafíos asociados á valorización dos residuos procedentes da pesca de lixo. Entre eles destacan a baixa calidade e elevada heteroxeneidade destes materiais, os altos custos de xestión fronte ao seu escaso valor de mercado, as limitacións tecnolóxicas existentes e a falta dun marco regulador e de responsabilidades claramente definido, así como a necesidade dunha maior coordinación entre os distintos actores da cadea de valor para avanzar cara a solucións de economía circular técnica e economicamente viables.

O debate permitiu tamén analizar os principais retos asociados á implantación da xestión dos residuos pescados incidentalmente e á continuidade dos esquemas de Pesca de Lixo, incluíndo as necesidades de infraestruturas, o mantemento da implicación dos pescadores, o uso axeitado dos contedores, a trazabilidade dos fluxos de residuos, a calidade dos datos e, moi especialmente, acadar a sustentabilidade operativa e económica a longo prazo destes sistemas mediante a identificación de mecanismos de financiamento. Destacouse especialmente a relevancia de contar con procedementos claros e cunha adecuada coordinación das responsabilidades entre os distintos actores implicados.

O seminario concluíu resaltando o valor engadido da cooperación transnacional e do intercambio de coñecemento, reafirmando o papel de proxectos como Free LitterAT como ferramentas clave para apoiar a aplicación coherente da Directiva PRF e contribuír á redución do lixo mariño na rexión atlántica.

Feb 09
0

Plan de Igualdade

By | Novidades | No Comments

CETMAR presenta o seu Plan de Igualdade ante a plantilla

  • O novo Plan de Igualdade de CETMAR, presentado o 30 de xaneiro, transforma a análise da realidade interna en medidas concretas para avanzar en igualdade de oportunidades entre homes e mulleres dentro da empresa.
  • Consulta o Plan de Igualdade 2025-2029
Traballadoras de CETMAR, xaneiro 2025

O Centro Tecnolóxico do Mar (CETMAR) presentou o pasado venres 30 de xaneiro ante a súa plantilla o seu novo Plan de Igualdade, un documento que define as liñas de actuación para os vindeiros catro anos co obxectivo de seguir avanzando na igualdade efectiva entre mulleres e homes no ámbito laboral.

O plan parte dunha diagnose interna que ofrece unha visión xeral da situación do centro en termos de composición da plantilla, contratación, formación, conciliación e organización do traballo. Trátase dunha fotografía fixa que serve como punto de partida técnico para identificar ámbitos de mellora e deseñar medidas adaptadas á realidade da organización. A partir desta base, o Plan de Igualdade céntrase en propoñer accións de mellora continua a implantar.

Un dos eixos destacados é a incorporación da igualdade nos procesos de selección, mediante a elaboración dun manual de boas prácticas e o compromiso de garantir a igualdade desde o inicio. Incorporarase a integración de criterios de igualdade desde a acollida do persoal. A día de hoxe, a plantilla de CETMAR está claramente feminizada, cun 75% de mulleres. Das 52 persoas traballadoras no centro, 39 son mulleres e 13 homes.

O plan aposta tamén por reforzar a formación, tanto en igualdade como en prevención do acoso e respecto á diversidade, con accións dirixidas a toda a plantilla e con especial atención aos postos de responsabilidade. A prevención do acoso e dos casos de violencia de xénero, así como o incremento da saúde laboral son os principais obxectoivos destas medidas. Neste sentido, actualízanse tamén os protocolos internos e intégrase a perspectiva de igualdade na avaliación do clima laboral, a través da realización dunha enquisa específica.

A conciliación da vida persoal, familiar e laboral constitúe outro dos grandes fitos do Plan de Igualdade. Incorpóranse medidas de flexibilización horaria, mellora e ampliación de permisos e a habilitación dun espazo adecuado a persoas embarazas e mulleres lactantes. Tamén se prevén accións de difusión para garantir que toda a plantilla coñeza e poida facer uso destes dereitos en condicións de igualdade.

Por último, o plan inclúe actuacións orientadas a promover unha comunicación e linguaxe inclusivas, coa revisión da documentación institucional e accións de sensibilización que contribúan a consolidar unha cultura organizativa baseada no respecto e na igualdade de oportunidades.

Xan 26
0

Xira Galicia El Salvador

By | Novidades

Galicia comparte o seu modelo de xestión marisqueira con profesionais e mandatarios de El Salvador

  • Unha delegación de El Salvador visita Galicia para coñecer a experiencia galega en xestión pesqueira
  • O Centro Tecnolóxico do Mar-Fundación CETMAR acompañará do 26 ao 30 de xaneiro a unha delegación institucional de El Salvador nunha visita técnica a Galicia centrada no intercambio de experiencias en xestión e ordenación pesqueira, con especial atención á regulación do sector marisqueiro.

O Centro Tecnolóxico do Mar-Fundación CETMAR acompañará do 26 ao 30 de xaneiro a unha delegación institucional de El Salvador nunha visita técnica a Galicia orientada ao intercambio de coñecementos e experiencias en materia de xestión, ordenación e gobernanza pesqueira, con especial atención ao sector marisqueiro.

A delegación, integrada por catro persoas, está composta por representantes da Dirección General de Desarrollo de la Pesca y la Acuicultura (CENDEPESCA), do Comité Directivo do Fideicomiso PESCAR e da Confederación Salvadoreña de Pesca, Acuicultura y Agropecuaria en Pequeña Escala (CONFESPESCA de R.L.).

A visita enmárcase no servizo técnico promovido pola Asociación para a Cooperación pola Paz (ACPP) “Deseño e implementación dunha xira internacional de intercambio en Galicia, para coñecer experiencias relevantes en xestión e ordenación pesqueira”, coordinado e desenvolvido por CETMAR, e impulsado polo Programa Abraza tu Mar, que nace como continuidade do Plan Integral de Apoio ao Sector da Pesca Artesanal Salvadoreña, financiado por la Xunta de Galicia desde 2019, que ao mesmo tempo se enlaza coa estratexia da AECID no marco do Convenio Manos que Alimentan.  

O obxectivo desta visita é promover unha visión compartida sobre sustentabilidade, inclusión social e fortalecemento institucional no ámbito pesqueiro artesanal. O programa está especialmente focalizado na mellora da regulación do sector marisqueiro en El Salvador, a partir do coñecemento de modelo galego.

Ao longo da semana, a delegación salvadoreña manterá encontros con diferentes entidades públicas e privadas vencelladas á cadea mar-pesca. As actividades previstas inclúen encontros coa directiva de CETMAR e a Consellería do Mar da Xunta de Galicia.

O programa complétase con visitas a confrarías de pescadores e lonxas, onde se abordarán aspectos como a organización do marisqueo, os procedementos de control e venda, a trazabilidade e a valorización do produto; a empresas da cadea de valor pesqueira e da transformación, para coñecer experiencias en manipulación, elaboración e comercialización; así como a iniciativas vinculadas á conservación e restauración de bancos marisqueiros, á cultura marítima e ao turismo pesqueiro como ferramenta de diversificación económica.

Ademáis, o programa da visita incorpora aspectos relacionados coa innovación tecnolóxica a partir do deseño e construción de embarcacións, adaptadas ás necesidades do sector pesqueiro artesanal de El Salvador.  

Con esta acción, CETMAR reafirma, a través da área de Cooperación Internacional, o seu papel como entidade de referencia na cooperación técnica, facilitando espazos de transferencia de coñecemento e contribuíndo ao fortalecemento das capacidades institucionais e sectoriais en países socios.

Dec 16
0

Programa de Ciencias Mariñas

By | Novidades | No Comments

O Programa de Ciencias Mariñas encara o seu pehe apostando pola continuidade da cooperación científica

  • A fase final do programa abre un proceso de reflexión sobre como manter viva a rede científica creada arredor do mar en Galicia.
  • A continuidade do programa, que conta con financiamento da Consellería do Mar, pasa, entre outras vías, pola creación dun Foro de Reflexión Científica sobre as ciencias mariñas de Galicia

O Programa de Ciencias Mariñas de Galicia, unha das iniciativas máis ambiciosas de investigación e innovación arredor do mar desenvolvidas na comunidade nos últimos anos, afronta a súa fase final coa vontade de preservar e reforzar a rede de cooperación científica e técnica xerada durante a súa execución. Con este obxectivo, o equipo de coordinación do programa reuniuse este martes no Centro Tecnolóxico do Mar–Fundación Cetmar para reflexionar sobre o seu impacto e sobre as vías para dar continuidade ao esforzo colectivo impulsado desde Galicia.

Enmarcado nos Plans Complementarios do Ministerio de Ciencia e Innovación, no contexto do Mecanismo de Recuperación e Resiliencia (Next Generation EU), o Programa de Ciencias Mariñas de Galicia forma parte do Programa Conxunto de Ciencias Mariñas estatal, no que colaboran Galicia, Andalucía, Cantabria, a Rexión de Murcia, Canarias, Illas Baleares e a Comunidade Valenciana. A Consellería do Mar de Galicia financiou as competencias de coordinación de CETMAR con 4.000.000 €.

Desde 2022, o programa permitiu artellar o ecosistema científico-técnico galego vencellado ao mar, a través da colaboración entre universidades, centros de investigación, institutos tecnolóxicos e administracións públicas, e mediante un diálogo continuo co sector mariño e costeiro. O obxectivo é despregar unha estratexia coordinada de investigación e innovación para afrontar retos clave como o seguimento e a observación do medio mariño, o cambio climático, a acuicultura e outros ámbitos da economía azul. En total, participaron 363 persoas investigadoras e técnicas, pertencentes a 82 grupos de investigación de 13 institucións.

Os resultados acadados concrétanse en 184 solucións e avances científico-técnicos, con aplicación directa ou potencial na xestión sustentable do medio e dos recursos mariños. Un dos elementos máis destacados do programa foi a súa contribución ao fortalecemento do capital humano. 117 persoas foron contratadas directamente, incorporando novos doutores e doutoras que traballaron de xeito colaborativo e interinstitucional, unha experiencia que se agarda que teña continuidade nas dinámicas futuras de cooperación científica en Galicia.

Durante a reunión celebrada no Cetmar, as persoas responsables da coordinación coincidiron en sinalar que un esforzo desta envergadura non debería esmorecer unha vez finalizado o programa. O traballo en rede desenvolvido ao longo destes tres anos contribuíu a un sistema máis eficiente, capaz de responder ás necesidades do país sen renunciar á investigación fundamental, cuxos resultados poderán materializarse a medio e longo prazo.

Diante da incerteza actual sobre os mecanismos de financiamento que permitan manter tanto os traballos como a propia estrutura de colaboración, os participantes asumiron o compromiso de volver a xuntarse a curto prazo para deseñar, como legado do programa, a creación dun Foro de Reflexión Científica sobre as ciencias mariñas de Galicia. Este foro concíbese como un espazo de carácter consultivo e de coordinación que facilite o intercambio sistemático de información entre especialistas, a planificación de accións conxuntas e a preparación de respostas coordinadas a convocatorias estratéxicas, co obxectivo de captar recursos que permitan dar continuidade e reforzar os vínculos entre a comunidade investigadora e o resto das organizacións con intereses no mar, promovendo unha relación sustentable co medio mariño e cos seus recursos.

Nov 03
0

Centro de formación A Aixola

By | Novidades | No Comments

A Aixola inicia un novo curso con sesenta persoas matriculadas e proxectos internacionais

  • O Centro de Formción A Aixola oferece formación gratuita nas áreas de construción naval, artes e aparellos, velería e mecánica.

O Centro de Formación da Aixola, dependente da Consellería do Mar e xestionado polo CETMAR, vén de iniciar un novo ciclo de cursos que se desenvolverán ata o mes de decembro, con arredor de sesenta persoas matriculadas en catro áreas do centro. Todos os cursos da Aixola impártense en instalacions cedidas pola Autoridade Portuaria de Marín e Ría de Pontevedra e están cofinanciadospolo  Fondo Europeo Marítimo Pesqueiro e de Acuicultura (FEMPA), polo que son gratuítos para os participantes.

Unha das novidades máis importantes deste trimestre será a implicación do alumnado no  programa FISH4ACP da FAO, un proxecto de cooperación internacional liderado polo CETMAR que busca mellorar a sustentabilidade da pesca e a acuicultura en África, Caribe e Pacífico. Colaborará nel o alumnado do curso en Laminado manual en poliéster para pezas de uso en acuicultura e en construción naval, que está a adquirir destrezas no uso de diferentes tipos de resinas; e o de Restauración de embarcacións menores, apoiando a construción do modelo de fibra e elaborando doutra embarcación en contrachapado mariño.

Os resultados de ambas formacións se extenderán posteriormente a São Tomé e Príncipe, onde persoal experto de CETMAR impartirá talleres con carpinteiros e profesionais locais en fibra e madeira, culminando na construción final das dúas embarcacións. Ademais, técnicos da Aixola colaborarán en pequenas formacións no país africano sobre reparación e mantemento de equipos de pesca, redes e motores, orientadas a fortalecer as competencias de pescadores e mulleres comerciantes (palaiês).

Outro dos cursos relevantes que acaba de comezar é o que conduce á obtención do Certificado de Profesionalidade en Confección e mantemento de artes e aparellos, sendo o CF A Aixola o único centro de Galicia homologado permanentemente para impartilo. Trátase dun certificado de nivel 2 que responde á demanda das asociacións de redeiras, que ven nesta formación unha ferramenta clave para garantir o relevo xeracional no sector.

A construción en madeira continúa a ser un piar esencial en Aixola. O centro mantén viva a tradición da carpintería de ribeira, recoñecida como Ben de Interese Cultural do Patrimonio Inmaterial desde 2017. En Aixola combínanse as técnicas clásicas coa innovación, conservando embarcacións e materiais mentres se promoven novas formas de entender a construción naval.

A oferta formativa péchase co curso de Mecánica básica naval para embarcacións menores, que integra un módulo de 40 horas de soldadura e rexistrou máis de cincuenta preinscricións para doce prazas. Así mesmo, está en marcha o curso de Velería e acastillaxe, valorado tanto por profesionais do mantemento naval como por afeccionados ao mundo da vela. Nesta formación o alumnado aprende a deseñar, confeccionar e instalar diferentes tipos de velas, desde as tradicionais das dornas ata as elaboradas con novos materiais como as de windsurf.

Out 14
0

Rede Española de Grupos de Pesca

By | Novidades | No Comments

GALICIA COMPARTE EN MADRID OS SEUS AVANCES NO DESENVOLVEMENTO LOCAL PARTICIPATIVO DAS COMUNIDADES COSTEIRAS

A directora xeral de Desenvolvemento Pesqueiro, Ángeles V. Suárez, e a directora xerente do Cetmar, Rosa Chapela, participaron este martes na sesión técnica da Rede Española de Grupos de Pesca (Regp), onde todas as comunidades autónomas deron conta da evolución e desenvolvemento dos proxectos impulsados polos Grupos de Acción Local do Sector Pesqueiro (Galp) como axentes dinamizadores da economía litoral en Galicia.

No transcurso da xuntanza, as representantes da Consellería do Mar, detallaron que este entes, creados polo departamento que dirixe Marta Villaverde, impulsan 160 proxectos no litoral galego por valor de 9,7 millóns de euros, cofinanciados polo Fondo Europeo Marítimo de Pesca e de Acuicultura (Fempa) 2021-2027. A este respecto, destallaron que o 60% destas iniciativas son destinados a actividades sen fins de lucro e o 40% restante a actividade económica, que mobilizan en conxunto un investimento privado de 6,1 millóns de euros.

Trátase de accións que permiten afondar na colaboración público-privada impulsando o desenvolvemento económico e competitividade de Galicia, cun impacto singular nas comunidades costeiras. Supoñen a creación de 70 empregos a tempo completo e abordan ámbitos como o aproveitamento do patrimonio cultural e medioambiental das zonas pesqueiras, a innovación e promoción da produción e subministro de produtos da pesca e da acuicultura ou o fomento da economía azul, entre outros. En Galicia existen 8 Galp que aglutinan a máis de 400 organizacións locais, que representan a máis de 13.000 profesionais do mar.

Set 25
0

Aquaculture Europe

By | Novidades | No Comments

A directora de Cetmar participa en Aquaculture Europe 2025, o maior congreso europeo de acuicultura

  • A directora de CETMAR, Rosa Chapela, participa esta semana en Aquaculture Europe 2025, en Valencia. Intervirá na mesa redonda “Attracting new talents in aquaculture” e modera unha sesión sobre economía.
Rosa Chapela na intervención do mércores 24

A directora do Centro Tecnolóxico do Mar CETMAR, Rosa Chapela, participa esta semana en Aquaculture Europe 2025, un evento que se celebra no Palacio de Congresos de Valencia ata o xoves 25 de setembro e que reúne a profesionais da acuicultura de máis de 70 países.

Baixo o lema “Aquaculture for Everyone”, o congreso aborda cuestións clave como a sustentabilidade ambiental, a rexeneración dos sectores primarios e o desenvolvemento do capital humano. Un dos seus obxectivos é reforzar o papel da acuicultura como elemento estratéxico na seguridade alimentaria global.  Trátase do maior evento celebrado nunca no Palacio de Congresos de Valencia e combina sesións científicas, foros sectoriais, obradoiros de innovación e actividades específicas para estudantes,

Rosa Chapela intervirá o mércores 24 de setembro na mesa redonda “Attracting new talents in aquaculture”, xunto a representantes de centros de investigación, asociacións e empresas líderes do sector. O debate centrarase nos desafíos da industria relacionados coa atracción e retención de talento, a remuda xeracional e o avance en materia de igualdade de xénero, analizando como a diversidade e a inclusión poden impulsar a innovación e a resiliencia do sector.

O xoves 25, Chapela actuará como moderadora na sesión Market & Value Chain Economics, xunto ao profesor noruegués Ragnar Tveterås. Trátase dunha das poucas sesións do congreso que aborda especificamente a dimensión económica e de mercados dos produtos da acuicultura, un ámbito clave para garantir a viabilidade do sector.

A organización convidou á directora do CETMAR a coordinar esta sesión con antelación, apoiando na procura de contribucións e presentacións orais que permitisen dar forma a este espazo de debate. O programa inclúe intervencións sobre temas tan relevantes como o marco regulador da acuicultura na UE, as tendencias na cadea de valor da acuicultura e a súa competitividade e o papel da economía azul como motor de novas oportunidades de negocio en acuicultura.

Con esta dobre participación no congreso Rosa Chapela reforza a visibilidade da acuicultura galega nun dos foros internacionais máis relevantes para o futuro da acuicultura.

Set 22
0

Programa de Ciencias Mariñas de Galicia

By | Novidades | No Comments

Galicia define a súa Estratexia de Observación Mariña para un uso máis eficiente e sostible dos recursos

O Programa de Ciencias Mariñas de Galicia, está a deseñar a Estratexia de Observación e Monitorización do medio mariño de Galicia, un plan que permitirá aproveitar mellor os recursos xa existentes, cubrir necesidades detectadas e anticiparse aos desafíos ambientais, sociais e económicos que afectan ao noso mar.

O obxectivo é contar cun sistema de observación máis eficiente, coordinado e sostible, que sexa útil tanto para a comunidade científica como para sectores produtivos, administracións, entidades de conservación ou mesmo o turismo e a divulgación. A Estratexia recollerá propostas que melloren a eficiencia, a capacidade de resposta, a gobernanza e a comunicación dos sistemas de monitorización do medio mariño, e estará rematada a finais de 2025.

O seu deseño baséase nun amplo proceso colaborativo iniciado hai tres anos. En anteriores encontros consultáronse expertos en observación oceanográfica, biolóxica e socioeconómica e doutras áreas para identificar necesidades e definir prioridades de actuación. O Programa De Ciencias Mariñas de Galicia conta con web propia na que se poden ir consultando os avances.

Neste contexto, o Centro Tecnolóxico do Mar CETMAR acolleu o terceiro obradoiro participativo. Nel participaron 33 representantes de entidades e sectores moi diversos, entre eles MeteoGalicia, a Subdirección Xeral de Investigación e Apoio Científico-Técnico da Consellería do Mar, o INEGA, GALP, o Instituto de Investigacións Mariñas (IIM-CSIC), o Instituto Español de Oceanografía (IEO-CSIC), a Universidade da Coruña, a Universidade de Vigo, CIMA, IGAFA, as Autoridades Portuarias da Coruña e Vigo, confrarías de Pontevedra e Cambados, a Federación Galega de Confrarías, CEMMA, BDRI, INTECMAR e CETMAR. A diversidade de perfís implicados garante que a futura Estratexia sexa unha ferramenta útil e realista, que responda ás necesidades de todos os axentes vinculados ao mar en Galicia.

Set 15
0

TransformAr

By | Novidades | No Comments

O proxecto europeo TransformAr celebra o seu evento final en Bruxelas coa participación galega de CETMAR e da Consellería do Mar

  • O proxecto europeo TransformAr chega á súa conclusión tras catro anos de traballo orientado ao desenvolvemento de solucións de resiliencia fronte ao cambio climático en rexións e cidades europeas. Entre os seus principais resultados destaca a coordinación, por parte do CETMAR, dun demostrador en Galicia centrado na adaptación do sector produtor de bivalvos aos efectos do cambio climático.

O evento final do proxecto celebrouse o pasado 11 de setembro en Bruxelas, no espazo Jardin Hospice, e reuniu representantes da Comisión Europea, gobernos rexionais, centros de investigación e axentes de distintos sectores.

Durante o encontro Manuel García Tasende, xefe de Servizo de Innovación Tecnolóxica da Acuicultura da Consellería do Mar da Xunta de Galicia, participou presentando o interese da Dirección Xeral nos resultados acadados polo demostrador galego. Na súa intervención, destacou tamén as propostas de accións de resiliencia identificadas para impulsar a adaptación do sector mexilloeiro, algunhas das cales continúan a desenvolverse a través de proxectos como:

O evento puxo de relevo a necesidade de reforzar a resiliencia das rexións europeas fronte ao cambio climático, máis alá do concepto clásico de “adaptación”. Neste sentido, subliñouse o papel das organizacións de interface, como CETMAR, que facilitan o diálogo entre administracións rexionais, investigadores, industria e sociedade civil para deseñar e implementar propostas innovadoras e sostibles.

TransformAr supuxo un paso adiante na procura de solucións innovadoras e transferibles que poidan aplicarse en diferentes territorios europeos para afrontar os retos que presenta o cambio climático.