Neutralidade climática: papel do carbono azul na costa de Portugal e Galicia
Coordinado polo Centro Tecnolóxico do Mar-Fundación CETMAR, o proxecto “Capta” traballará para mellorar a resiliencia costeira na Eurorrexión Galicia-Norte de Portugal sentando as bases de políticas e instrumentos de planificación que axuden a preservar os ecosistemas costeiros e a abordar conxuntamente os riscos climáticos.
Esta iniciativa, na que participa o Observatorio Costeiro da Xunta de Galicia, permitirá a creación dun marco de cooperación transfronteiriza que permita identificar as ameazas, vulnerabilidades e riscos climáticos aos que se enfrontan as zonas costeiras e establecer accións coordinadas para a súa conservación.
O obxectivo é facilitar procedementos homoxéneos e información comparable sobre riscos climáticos, permitindo actuacións conxuntas e avaliando o papel que xogan os ecosistemas costeiros como sumidoiros de carbono mediante o uso de novas tecnoloxías, como satélites, vehículos aéreos non tripulados ou redes neuronais.
