December 2011

A directora do Centro Tecnolóxico do Mar, Paloma Rueda, e o director da Fundación Observatorio Español de Acuicultura -OESA-, Javier Remiro, asinaron esta semana un acordo a través do que ambas entidades sumarán esforzos para impulsar a investigación e a promoción da acuicultura española e en concreto a galega, a nivel internacional.

A través deste convenio CETMAR e OESA realizarán accións conxuntas dedicadas á difusión, á investigación e á formación en materia de acuicultura, como a realización de proxectos de I+D+i e estudos sobre o desenvolvemento, consolidación e sostibilidade da acuicultura. Esta colaboración tamén inclúe a realización de cursos formativos, seminarios e conferencias, así como o establecemento de redes e vías de comunicación nesta materia no contexto mediterráneo, atlántico, europeo e iberoamericano. Ademais prevé tamén a colaboración en accións de cooperación ao desenvolvemento en materia acuícola.

A sinatura deste convenio pón de manifesto a aposta destas dúas fundacións de dar visibilidade ao labor de investigación e innovación en materia de acuicultura. Oesa e Cetmar avogan polo desenvolvemento da acuicultura e consideran que pode ser un elemento vital para a consolidación socioeconómica de determinadas áreas territoriais do mundo, ao ser unha importante fonte de recursos económicos e produtivos.

Publicación de investigación
Esta semana o Cetmar tamén acolleu a presentación do libro Enfermidades de Moluscos Bivalvos de interese na Acuicultura, editado pola Fundación OESA. O libro recolle os resultados de investigación sobre as enfermidades de moluscos bivalvos froito do desenvolvemento ao longo de máis de 20 anos. Tamén fai fincapé na necesidade dun diagnóstico rápido destas enfermidades, sobre todo nos moluscos de interese comercial, pola importancia económica deste produto e tamén ante a posibilidade de traslado de animais enfermos a zonas libres dese patóxeno. O acto contou coa participación da directora do centro, Paloma Rueda, con representantes de OESA e cos doutores Antonio Figueras e Beatriz Novoa, coordinadores da publicación.

La Fundación OESA presentará la publicación “Enfermedades de moluscos bivalvos de interés en acuicultura”, el próximo día 14 a las 12h. en las instalaciones de CETMAR.

En el acto participarán representantes de la Fundación CETMAR, la Fundación OESA y los doctores Antonio Figueras y Beatriz Novoa coordinadores de la publicación

Enlaces:
www.fundacionoesa.es/agenda/presentacion-del-libro-enfermedades-de-moluscos-bivalvos-de-interes-en-acuicultura

O Centro Tecnolóxico do Mar, Cetmar, organizará o 13 de decembro o seminario Xestión Sanitaria en Acuicultura: Aplicacións Biotech. O obxectivo deste seminario é amosar como o emprego das ferramentas biotecnolóxicas pode contribuír a mellorar a xestión sanitaria dos animais en acuicultura. Ademais con esta xornada o Cetmar busca crear un foro de encontro entre a investigación e as empresas, favorecendo deste xeito a transferencia de coñecementos e tecnoloxía.

Durante o seminario, os expertos farán referencia a cuestións como as enfermidades de moluscos e peixes de maior impacto económico no sector, destacando entre outros a importancia das aplicacións biotecnolóxicas para diagnosticar as enfermidades de xeito mais preciso e rápido ou á evolución das vacinas tradicionais cara ás vacinas recombinantes, que son máis específicas e eficaces. A primeira das intervencións será Enfermidades de interese zootécnico en moluscos bivalvos e dela encargarase o investigador Antonio Villalba, do Centro de Investigacións Mariñas da Xunta de Galicia. Das enfermidades de interese zootécnico en piscicultura falará Alicia Estévez Toranzo, da Universidade de Santiago de Compostela.

En relación aos desenvolvementos biotecnolóxicos de aplicación en acuicultura haberá dúas intervencións nas que se amosarán os avances experimentados neste campo. Por unha banda, a doutora da Universidade de Granada, Inmaculada Llamas, amosará aos asistentes a eficacia das novas tecnoloxías “Quórum Sensing” na loita contra as enfermidades en acuicultura. Por outra banda, o director de Probeltebio, Sergio Streitenberger, falará sobre o desenvolvemento da primeira vacina oral para uso en acuicultura, que conta con patente biotecnolóxica internacional e está destinada á acuicultura de interese comercial. Esta vacina diferénciase das anteriores porque facilita a súa administración grazas a un sistema de microencapsulación en levaduras.

O último apartado do seminario correrá por conta do doutor da Universidade Autónoma de Barcelona, Francesc Padrós, que falará dos programas de xestión sanitaria en acuicultura, amosando a eficacia do programa GESAC, un exercicio no que se conecta a xestión sanitaria oficial coa xestión sanitaria real dos centros de produción, aportando recursos e ferramentas para a toma de decisións apropiadas.

A asistencia a este seminario é gratuíta e por orde de rexistro e os interesados en inscribirse poden facelo vía web na dirección www.cetmar.org/seminario/gesanbiotech/Inscripcion.asp na que atoparán un formulario de pre-inscrición e máis información sobre o seminario.