admin

O Centro Tecnolóxico do Mar (CETMAR) organizará un seminario que leva por título Desenvolvementos e Innovacións Biomédicas Vinculadas á Valorización de Subproductos Pesqueiros que se celebrará o próximo venres, 18 de Novembro, no centro. O obxectivo é abordar as posibles aplicacións, en concreto a biomédica, que poden desenvolverse en base á valorización de subproductos pesqueiros e organismos mariños.

A industria pesqueira xera unha gran cantidade de subproductos que só son aproveitados parcialmente a pesar do enorme potencial que teñen. Por outra banda, estase valorando cada vez mais a necesidade de facer un uso completo e sostible das materias primas como un dos baluartes da economía. Os expertos consideran necesario sacar valor en maior medida a estas materias primas e introducilas en canais comerciais que desemboquen en empresas especializadas na valorización.

Así, especialistas de diferentes países valorarán a posibilidade de desenvolver aplicacións biomédicas (moitas delas xa presentes nos mercados) a partires do que ata hai uns anos se catalogaban coma residuos. As presentacións cubrirán tres campos que se teñen considerado básicos: os biomateriais aplicados á enxeñería de tecidos e medicina rexenerativa; os liberadores de fármacos e os productos derivados funcionais.

Os poñentes proveñen do ámbito científico e de empresas encadradas nesta actividade.  O Dr. Rui L. Rei, (Director do 3B’s Research Group de Portugal) disertará sobre o Uso de materiais naturais de orixe mariña en aplicacións biomédicas, máis concretamente sobre desenvolvementos aplicados á rexeneración ósea. Do mesmo xeito, o Dr. Baldur Tumi Baldursson (Medical Director KERECIS de Islandia) falará do Uso de coláxenos e aceites de orixe mariña na rexeneración de tecidos, e centrarase na rexeneración dérmica e as patentes industriais que a súa empresa comercializa.

A Dra. Angela Moraes (Universidade Estadual de Campinas de Brasil) abordará o eido do Uso de polisacáridos de orixe mariña para a administración de fármacos e outros sistemas médicos. Finalmente, o último bloque do seminario terá como títulos Alimentos Funcionais e Nutracéuticos de orixe mariña e Estado do Condroitin sulfato: exemplo de valorización biomédica. Materias primas. Proceso e especificacións. Mercado.. A primeira delas correrá a cargo do Dr. Joan Carles Domingo (BRUDY LAB SA.) e a segunda a conta do Dr. Roger Sabata (BIOIBÉRICA S.A.).

A xornada está organizada polo Cetmar e conta coa colaboración do 3B´s Research Group (Guimarães, Portugal), do Departamento de Física Aplicada da ETS Enxeñeiros Industriais (Vigo) e do Departamento de Farmacia e Tecnoloxía Farmacéutica (Facultade de Farmacia, USC). Todos eles son membros do consorcio do proxecto europeo IBEROMARE (Centro Multipolar de Valorización de Recursos e Residuos Mariños) ao abeiro do cal ten lugar este evento, o cuarto dos levados a cabo. A inscrición poderá facerse a través da web www.cetmar.org/Seminario/AplicacionesBiomedicas/ Inscripcion.asp e é totalmente gratuíta.

Arcopol é un proxecto europeo, financiado no marco do Programa Espazo Atlántico que aborda a loita contra a contaminación mariña derivada do transporte marítimo de maneira global en todas as súas vertentes, antes, durante e despois da contaminación. O seu obxectivo principal é mellorar as capacidades de prevención, resposta e mitigación dos vertidos de hidrocarburos, sustancias químicas nocivas e potencialmente perigosas e inertes, establecendo as bases dunha Rede Atlántica sustentable integrada polos principais actores neste ámbito e apoiada polas ferramentas de xestión da información relevante para a loita contra a contaminación. O proxecto desenvolveuse a través de 12 socios, que son entidades de España, Francia, Irlanda, Reino Unido e Portugal. Entre elas está a Consellería do Mar e os seus centros Intecmar e Cetmar e a Consellería de Medioambiente, Territorio e Infraestruturas.

Este proxecto nace doutro anterior, o EROCIPS, que se centrou exclusivamente nos vertidos de hidrocarburos. Nesta iniciativa tamén participou activamente Galicia, do mesmo xeito que noutros proxectos de gran relevancia neste campo como o EASY, o DRIFTER ou o RAIA.

O plan de continxencias da Xunta incluirá ferramentas do proxecto europeo Arcopol de loita contra a contaminación mariña. Sinalouno a conselleira do Mar, Rosa Quintana, durante a inauguración da conferencia na que se exporán os resultados deste proxecto europeo, do que é socia a Consellería do Mar e que busca mellorar as capacidades de prevención, resposta e mitigación dos vertidos de hidrocarburos e substancias químicas. Durante a súa intervención a conselleira anunciou a continuidade deste proxecto a través da iniciativa Arcopol Plus, aprobada recentemente, o que fai que esta conferencia tamén sirva para “anunciar o principio dunha nova fase de colaboración transnacional”.

Segundo sinalou a conselleira, a través de accións de formación e transferenza, o Arcopol Plus dará prioridade á implementación dos produtos e recursos xerados en Arcopol. A conselleira engadiu que grazas a este proxecto, o seu departamento dispón de información costeira “moito máis completa, precisa e accesible a través de ferramentas web”.Esta información permite, segundo sinalou a titular de Mar, predicir mellor as posibles consecuencias dun vertido accidental e ter unha mellor organización na resposta global a estes episodios de contaminación mariña.

Neste sentido, salientou a importancia de que as administracións conten con plans de continxencia para facer fronte a episodios de contaminación mariña e destacou o labor emprendido polo proxecto Arcopol para desenvolver coñecementos, protocolos e ferramentas innovadores coa finalidade de que poidan incorporarse aos plans de continxencia, baseándose no intercambio de experiencias e boas prácticas entre as rexións.

Rosa Quintana tamén destacou que a través deste proxecto se sentaron as bases para a colaboración europea das rexións atlánticas, “tan importante para as futuras melloras neste campo”. Por último Rosa Quintana recoñeceu o labor e a dedicación dos técnicos no desenvolvemento desta iniciativa.

O Centro Tecnolóxico do Mar, Cetmar, organizará o próximo venres 11 de novembro un seminario para abordar a situación do cultivo do linguado e a súa consolidación como especie de acuicultura. A xornada, que leva como título  Dietas Sustentables no Cultivo de Peixes Planos, está organizada polo Instituto Galego de Formación en Acuicultura (IGAFA) e o Centro de Investigacións Mariñas (CIMA), en colaboración co Cetmar, todas elas entidades pertencentes á Consellería do Mar.

Este seminario é o terceiro dunha serie de eventos encadrado dentro das actividades do proxecto europeo IBEROMARE e, neste caso, está dedicado integramente á problemática do desenvolvemento de dietas sustentables para alimentación de peixes planos, máis concretamente, do linguado.

O linguado é unha das especies de acuicultura á que se dedicou un maior esforzo nos últimos anos a fin de consolidar o seu cultivo. A maioría dos traballos realizados ata o momento, centráronse fundamentalmente no linguado senegalés (Solea senegalensis) e, actualmente, toda a produción industrial do linguado que existe en España, 204 Tm no ano 2010, é desta especie. Estímase que esta produción vaia ter un gran incremento nos próximos anos coa construción de varias plantas de cultivo, o que pode converter ao linguado senegalés nunha das principais especies da piscicultura mariña en España.

Os contidos do seminario teñen por finalidade achegar, de forma monográfica, unha visión conxunta dos aspectos máis transcendentes que concorren no cultivo desta especie, desde a formulación de dietas específicas -impacto ambiental mínimo, elevado valor nutricional- ata o estado actual da produción a escala industrial, pasando por aspectos sanitarios.

As distintas temáticas a desenvolver estarán a cargo de investigadores de recoñecido prestixio, e cuxa identidade pódese consultar no díptico ao que ten acceso a través do seguinte link: www.cetmar.org/seminario/cultivopecesplanos/inscripcion.asp. A inscrición para o seminario, totalmente gratuíta, tamén pode facerse a través do mesmo link.

O proxecto europeo Marleanet, no que colabora o Cetmar está a desenvolver estes días diversas actividades en Inglaterra, Francia e Galicia. Este programa persegue a mellora da formación marítima no espacio Atlántico e a creación dunha rede de centros de formación que mellore a capacitación dos profesionais do mar e propicie un coñecemento adaptado ás necesidades deste ámbito e da seguridade marítima, así como un achegamento entre a formación marítima civil, pesqueira e militar. Representantes do Cetmar e da Consellería do Mar están a participar nestas actividades para avanzar en materia de seguridade marítima.

O proxecto prevé tamén o intercambio de boas prácticas e de persoal para a implantación conxunta de cursos de calidade e a posta en marcha dunha ferramenta común de e-learning que inclúa aos socios da rede cara a formación on-line (a bordo de buques ou na casa) e nos centros de formación. A meta dos socios de Marleanet é capacitar a arredor de 3.000 persoas ao ano a través dos centros da súa rede, e certificar o valor engadido da formación marítima impartida no espacio Atlántico.

Así, o pasado mércores celebrouse en París o taller E-learning no currículo marítimo, no que se debateron as expectativas profesionais sobre a formación e-learning, as adaptacións necesarias nas normativas regulatorias e os requisitos técnicos e de formación de persoal para unha óptima implantación deste sistema formativo.

Tamén tivo lugar estes días no Cetmar un intercambio de persoal implicado na formación en saúde a bordo e medicina marítima. Unha delegacións francesa e outra portuguesa do proxecto, realizaron unha serie de visitas técnicas e asistiron ao V Congreso hispanofrancófono de medicina marítima, onde se presentaron os primeiros resultados do proxecto.

Por último, esta semana terá lugar en Cornualles (Inglaterra) e en Brest (Francia) un intercambio de persoal implicado na formación en construcción naval en madeira, ao que asistirá persoal do Cetmar e da da Consellería do Mar, do centro de formación A Aixola, que coordina a propia Fundación CETMAR, e da Asociación Galega de Carpintería de Ribeira AGALCARI. Nas actividades programadas participarán ademais representantes das institucións que promoven o proxecto europeo WOOBTA “Wooden Boatbuilders Training Association” (Asociación de aprendizaxe de carpinteiros de ribeira), cuxo obxectivo xeral é a creación dunha asociación de organizacións implicadas na formación de adultos en carpintería naval e na posta en valor do oficio. Nese fin traballa a Fundación CETMAR xunto a Falmouth Marine School do Reino Unido, Les Ateliers de l’Enfer de Francia e Skeppsholmens folkhögskola de Suecia. Durante o intercambio visitarán centros de formación e empresas de construcción naval en madeira da rexión de Cornualles, así coma os museos dedicados a presentar esta actividade. Posteriormente asistirán ás conferencias de clausura do proxecto NeA2, sobre náutica de recreo sostible.

O proxecto Marleanet está coordinado polo Centre Européen de Formation Continue Maritime (CEFCM) de Concarneau (Francia) e ademais do Cetmar conta coa participación do Cork Institute of Technology de Irlanda, a Escola Superior Náutica Infante D. Henrique e a  Mutua dos Pescadores de Portugal, e a Universite de Bretagne Occidentale (Francia). Conta coa cofinanciación da Unión Europea mediante fondos FEDER do programa espacio Atlántico. Todos eles traballan de forma conxunta dende ano 2010 na execución de accións encamiñadas á creación dunha rede transnacional de formación marítima de alta calidade e á posta en común de ferramentas para os seus membros.

A directora do Centro Tecnolóxico do Mar CETMAR, Paloma Rueda, inaugurou esta mañá o último seminario organizado no marco do proxecto Biotecmar, Explotación Biotecnolóxica dos Produtos e Subprodutos Mariños. Este seminario, que se celebra durante a mañá e a tarde de hoxe, ten como obxectivo avanzar na valorización dos recursos mariños a través da exposición e do debate dos resultados máis relevantes do proxecto.

Un dos logros do proxecto Biotecmar dos que se deu conta no seminario foi a creación dunha Rede Europea de Laboratorios, Centros de Investigación e Empresas vinculados coa problemática  da valorización dos recursos mariños. Outro dos resultados acadados foi a creación dunha Bolsa de Subproductos Pesqueiros con vistas ao seu aproveitamento real na industria, especificándose algúns dos seus logros pero tamén as dificultades que se observaron tras varios meses de experiencia.Tamén se deu conta dos estudos de viabilidade, realizados sobre a potencialidade de materias primas útiles pero infrautilizadas. Ao longo desta mañá tamén se trataron aspectos relativos ao abastecemento, á súa continuidade, aos prezos de adquisición e á competencia de mercado.

As intervencións da mañá correron a cargo de investigadores e empresas acreditadas a nivel europeo e mundial dentro do terreo da valorización. Nesta parte abordáronse estratexias para o aproveitamento de subprodutos derivados da pesca, das algas e das augas de cocción. A sesión da tarde será práctica e desenvolverase nas instalacións do Instituto de Investigacións Mariñas de Vigo (CSIC), membro do consorcio do proxecto. Realizaranse dúas accións piloto; unha inicial sobre “Péptidos hidrolizados obtidos a partir da pel de peixes planos” e unha segunda centrada na “Obtención de péptidos e pigmentos a partires de crustáceos descartados”.

O proxecto Biotecmar

Este seminario foi o último dunha serie de cinco seminarios organizados ao longo dos tres últimos anos no marco do proxecto Biotecmar, que é un proxecto europeo no que CETMAR traballou dentro dun consorcio con representación de organismos e entidades de Francia, Portugal, Irlanda e España. O seu principal obxectivo foi o de dar a coñecer e transferir ferramentas biotecnolóxicas e procesos de valorización  ás empresas da Área Atlántica, contribuíndo de este xeito a diversificar as actividades vinculadas á explotación e á xestión sostible dos recursos mariños.

A situación actual do sector biotecnolóxico en Galicia centrou hoxe un seminario organizado polo Centro Tecnolóxico do Mar na súa sede en Vigo e no que se presentaron ademais iniciativas exitosas nese campo no terreo da valorización de subprodutos e organismos mariños, como é o caso das empresas Seanergy ou Iuvenor. A escasa presenza ata o de agora de empresas galegas neste segmento industrial quedou patente ao longo da xornada, que se celebrou no marco do proxecto BIOTECMAR no que participa a Fundación galega.

Precisamente da creación de empresas biotecnolóxicas coma unha materia pendente en Galicia falou a directora-xerente do CETMAR, Paloma Rueda Crespo, na apertura do seminario, que proseguiu cun relatorio a cargo de Rafael Camacho Fumanal, director da Fundación Genoma España. Camacho corroborou o feito de que Galicia está á cola na posta en marcha de iniciativas neste sector, ao que se incorporan entre cincuenta e sesenta novas empresas ao ano.

Pola súa banda, Lucía Cecilia, responsable de Comunicación da Asociación Española de Bioempresas (ASEBIO), cifrou na súa intervención en 1.050 as empresas que na actualidade empregan biotecnoloxía dentro dos seus procesos en España. Delas, 400 son de carácter estrictamente biotecnolóxico e a súa cifra de negocio sitúase nos 53.000 millóns de euros, segundo informe ASEBIO 2010. Cecilia, que interveu para presentar a Plataforma de Mercados Biotecnolóxicos creada o ano pasado, asegurou que a presenza de socios galegos tanto en ASEBIO como na devandita plataforma e testemuñal.

Precisamente para promover a creación e mellora das empresas biotecnolóxicas da Eurorexión Galicia-Norte de Portugal xurdiu o proxecto Bioemprende, do que falou a directora xeral do BIC Galicia, Maite Cancelo Márquez. Froito do traballo desenvolvido no marco dese proxecto detectáronse mais de 70 ideas de negocio biotecnolóxico, algunhas delas relacionados cos produtos do mar, ao tempo que constituíronse cinco empresas nese ámbito e outras cinco están en fase de constitución.

Cancelo recoñeceu que o biotecnolóxico é un sector estratéxico para Galicia pero coincidiu co resto dos expertos en que o seu desenvolvemento é “moi baixo”. Pese a todo, durante o seminario quedou patente o feito de que existen as ferramentas e os medios necesarios para que a medio prazo xurdan empresas biotecnolóxicas que permitan á comunidade autónoma galega situarse nos niveis do resto do Estado.

A xornada completouse con dous relatorios sobre empresas que se desenvolven no terreo da valorización de subprodutos e organismos mariños, como é o caso de IUVENOR, compañía con sede en O Carballiño que emprega as macroalgas na fabricación de cosméticos. Desta falou o seu director xerente, Juan Velasco, mentres que Xavier Ribas, responsable de I+D+I de Seanergy, expuxo a experiencia desta compañía con sede nas Illas Feroe na produción de hidrolizado de coláxeno mariño a partir de peles.

O seminario que tivo lugar hoxe no Centro Tecnolóxico do Mar en Vigo desenvolveuse no marco do proxecto BIOTECMAR, “Explotación BIOTECnolóxica de produtos e subprodutos MARiños”, no que a institución galega traballa xunto a entidades de Portugal, España, Francia e Irlanda.

“Creación de empresas de base biotecnolóxica no segmento da valorización de subprodutos e organismos mariños” é o título do seminario que vai ter lugar o 22 de xuño no Centro Tecnolóxico do Mar en Vigo e que se desenvolve no marco do proxecto BIOTECMAR, “Explotación BIOTECnolóxica de produtos e subprodutos MARiños”, no que a institución galega traballa xunto a entidades de Portugal, España, Francia e Irlanda.

O obxectivo da xornada, que será inaugurada ás 10.30 horas pola directora da Fundación CETMAR, Paloma Rueda Crespo, é dar a coñecer as capacidades e instrumentos dispoñibles no noso ámbito para afrontar a creación de novas empresas de corte biotecnolóxico. Será a través de relatorios a cargo de representantes de entidades que traballan nese ámbito. Os asistentes poderán coñecer ademais de primeira man a experiencia exitosa dalgunhas empresas que se desenvolven no terreo da valorización de subprodutos e organismos mariños.

Trala apertura, Rafael Camacho Fumanal, director xeral da Fundación Genoma España, falará da importancia das empresas de base biotecnolóxica e spin-off como vector de transferencia tecnolóxica do laboratorio ao mercado. A continuación terá lugar un novo relatorio sobre subprodutos mariños na base da estratexia dunha empresa biotecnolóxica, a cargo de Xavier Ribas, representante de SEANERGY, empresa de capital catalán situada nas Illas Feroe e dedicada a valorización de subprodutos pesqueiros. Juan Velasco, director xerente de IUVENOR, pechará este bloque cunha charla sobre esta empresa biotecnolóxica dedicada á cosmética e que ten a súa base nas macroalgas.

O seminario culminará con dous novos relatorios esta vez enfocados cara ás ferramentas dispoñibles para acceder ao sector industrial biotecnolóxico. Así, Maite Cancelo Márquez, directora xeral de BIC Galicia, falará das iniciativas orientadas á formación, asesoramento e financiamento de empresas biotecnolóxicas. Finalmente, Lucía Cecilia, responsable de comunicación de ASEBIO (Asociación Española de Bioempresas), intervirá para presentar en Galicia a Plataforma de Mercados Biotecnolóxicos.

O proxecto BIOTECMAR, no que se enmarca este seminario, desenvólvese no programa de cooperación transnacional do Espacio Atlántico (2007-2013). O seu obxectivo e dar a coñecer e transferir ferramentas biotecnolóxicas e procesos de valorización ás empresas da Área Atlántica, contribuíndo á diversificación das actividades vinculadas á explotación e xestión sostible dos recursos mariños.

Enlaces:
www.biotecmar.eu